ނިމިދިޔަ ރިޔާސީ އިންތިހާބަށް ޕީއެންސީގެ ކެންޑިޑޭޓަކު ނެރެން ކުރީގެ ރައީސް އަބްދުﷲ ޔާމީން ފުރުސަތު ދެއްވީ "ހިޔަޅު ވިސްނުމުގައި" ކަމަށް ވިދާޅުވެ ޔޫތު މިނިސްޓްރީގެ ޑެޕިއުޓީ މިނިސްޓަރު މަރިޔަމް ޝިއުނާ އެކްސްގައި ޕޯސްޓެއް ކުރުމުން ރައީސް ޑރ. މުހައްމަދު މުއިއްޒު އެ ވާހަކަ އިއްޔެ ރިޕޯސްޓު ކުރައްވައިފި އެވެ.
އިންޑިއާގެ ބޮޑުވަޒީރު ނަރެންދުރަ މޯދީއަށް މަލާމާތް ކުރި މައްސަލައިގައި ސަސްޕެންޑުކޮށްފައި ހުރި ޝިއުނާ އެކްސްގައި ވިދާޅުވެފައި އޮތީ "ހުކުމުގެ ކުރިން ކެންޑިޑޭޓް ނެރެން ފުރުސަތު ދީފައި ކަންކުރަން އުޅުނީ ވަރަަށް ހިޔަޅު ވިސްނުމުގަ" ކަމަށެވެ.
"އަސްލު އުޅުނީ ރައީސް މުއިއްޒު ޕީޕީއެމުން ވަކިކޮށް، ޕްރައިމަރީއިން ބަލިކުރަން. ހޭވި ހުރިހާ ހަޑިއެއް ގާތުން ދެކުނިން. ﷲ ގެ ވާގިފުޅާއިއެކު ޑރ. މުއިއްޒު ޕްރައިމަރީ ކާމިޔާބު ކުރީމަ ވެސް ޖަމީލު ނުކުމެ ބުނީ އެއީ ޕްލޭން ސީ އޭ! ރޭވިހާ ނުބައި ރޭވުންތައް ނާކާމިޔާބުވެ ގޮތްހުސްވީ. ވެެރިކަމަކީ ﷲ ދެއްވާ އެއްޗެއް!،" ޝިއުނާ ވިދާޅުވެފައިވެ އެވެ.
ރައީސް މި ޕޯސްޓް ރީޕޯސްޓް ކުރެއްވީ ރޭގެ ވަގުތެއްގައި
ޔާމީންއަށް ފާޑުކިޔާފައިވާ ޕޯސްޓެއް ރައީސް މުއިއްޒު ރިޕޯސްޓު ކުރައްވާފައި މި ވަނީ، ޔާމީން އާއި ޕީއެންސީގެ ލީޑާޝިޕާ ދެމެދު ވަރުގަދަ ބަހުގެ ހަމަލާތަކެއް ބަދަލު ކުރަމުންދާ ދަނޑިވަޅެއްގަ އެވެ. އެކަން ފެށުނީ، ރައީސް މުއިއްޒާއި ސަރުކާރުގެ ވެރިން މަސައްކަތް ކުރަނީ ޕީޕީއެމް ނައްތާލަން ކަމަށް ޔާމީން ވިދާޅުވުމުންނެވެ.
"ރައީސް މުއިއްޒު އާއި ކައިރިގައި ތިބި އާރުކާޓީއިން ގެންދަނީ ޕީޕިއެމް ނައްތާލުމަށް މަސައްކަތްކުރަމުން. އެމިހުން ބޭނުމެއް ނުވޭ ޕީޕީއެމްއަށް އެއްވެސް ދިރުމެއް ދޭކަށް،" ޔާމީން މިދިޔަ ހަފުތާގައި ވިދާޅުވި އެވެ.
ޔާމީން އެހެން ވިދާޅުވުމުން ޕީއެންސީގެ ލީޑާޝިޕުގެ ބައެއް މެންބަރުން ބުނީ ޔާމީން މަސައްކަތް ކުރީ ރިޔާސީ އިންތިހާބު ބޮއިކޮޓްކޮށް ޕީޕީއެމް މަގުމަތި ކުރަން ކަމަށެވެ. ނަމަވެސް ޔާމީން ވިދާޅުވީ ޕާޓީ މަގުމަތިނުވާނެ މަގު އެމަނިކުފާނު އޮންނާނީ ދައްކާފައި ކަމަށެވެ.
"އަޅުގަނޑުގެ މައްސަލަ އަޅުގަނޑަށް ކުރިމަތި ނުލެވޭ ގޮތަށް ސްޕްރީމް ކޯޓުން ނިންމުމުގެ ކުރިން ޕީއެންސީގެ ރިޔާސީ ކެންޑިޑޭޓަކު ހުންނާނީ ދައްކާފައި. އެހެންވީމާ ކޮން ވާހަކައެއް މިދައްކަނީ މަގުމަތިވާ ވާހަކަ. އެ އުޅެނީ ކޮން ހަނދާނެއް ބަލިވެގެން، ކޯއްޗެއް އޮޅުވާލަންތޯ އެ އުޅެނީ," ޔާމީން ވިދާޅުވި އެވެ.
