ރަސްމާލެ ހިއްކުމުގެ ޕްރޮޖެކްޓަކީ 70 ބިލިއަން ރުފިޔާގެ ކޮރަޕްޝަނެއް ކަމަށާއި އެ މައްސަލަ އެންޓި ކޮރަޕްޝަން ކޮމިޝަނުން ނުބަލާތީ ހައިރާންވާ ކަމަށް އިދިކޮޅު ޕާޓީ އެމްޑީޕީން މިރޭ ބުނެފި އެވެ.
އެމްޑީޕީން މިރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޕާޓީގެ ތަރުޖަމާނު އަހުމަދު އީސާ ވިދާޅުވީ، ރަސްމާލެ ހިއްކާ ބޭރުގެ ކުންފުންޏަށް ހުޅުމާލެއިން ވިއްކަން ދިން ބިންތަކުގެ އަގު ޕްރޮޖެކްޓުގެ އަގާ ނުބައްދަލު ކަމަށެވެ.
"އަޅުގަނޑުމެން އެންމެ ކުޑަ ރޭޓަށް ބެލީމާ ވެސް އެ ވިއްކާ ބިންތަކުގެ އަގު 70 ބިލިއަން ރުފިޔާ އާއި 100 ބިލިއަން ރުފިޔާ ދޭތެރޭގެ އަދަދަކަށް އަރައިގެން ދޭ. އަޅުގަނޑު ދައްކާ ވާހަކައެއް ނޫން. ތިބޭފުޅުން އަމިއްލައަށް ހިސާބުތައް ހައްދަވާ ބިން ވިއްކާފައި ހުރި ރޭޓުތަކާއި ބިމުގެ ސައިޒާ ބަލާފައި. އެ އަދަދުތަކަށް ބެއްލެވީމަ 70 ބިލިއަން ރުފިޔާއަށް ވުރެ ބޮޑު އަދަދެއް ދިވެހި ދައުލަތަށް ގެއްލޭ. މިއީ 70 ބިލިއަން ރުފިޔާގެ ބޮޑު ކޮރަޕްޝަނެއް،" އީސާ ވިދާޅުވި އެވެ.
އީސާ ވިދާޅުވީ އޭސީސީ ފަދަ މިނިވަން މުއައްސަސާތަކުން ރަސްމާލޭގެ މައްސަލަ ނުބަލާތީ "އަޖައިބުވެ، ހައިރާންވާ" ކަމަށެވެ.
"މިއީ ސިއްސައިގެންދާވަރުގެ ކޮރަޕްޝަން އެކުލެވޭ ޕްރޮޖެކްޓެއްކަން އަޅުގަނޑުމެން ތަކުރާރުކޮށް ތުހުމަތު ކުރަމުން މި އަންނަނީ. އަޅުގަނޑު ހަމަ އަޖައިބުވަން، ހައިރާންވަން އޭސީސީ ފަދަ ދައުލަތުގެ މިނިވަން މުއައްސަސާއަކުން، މިވަރަށް މުޅި ރާއްޖޭގެ ރައްޔިތުން އެކަމާ ކަންބޮޑުވާއިރު އެކަންކަން ބައްލަވަމުން ނުގެންދަވާތީ،" އީސާ ވިދާޅުވި އެވެ.
އެ މައްސަލަ ބަލަން އެއްވެސް ފަރުދަކު ހުށަނޭޅި ނަމަވެސް އަމިއްލަ އިސްނެގުމުން ވެސް ބަލަންޖެހޭ ކަމަށް އީސާ މިރޭ ވިދާޅުވި އެވެ.
"ވަކި ފަރުދަކުން ޝަކުވާ ހުށަނޭޅި ކަމުގައި ވިޔަސް ދައުލަތުގެ މުއައްސަސާތަކަށް ގާނޫނުތަކުން ދީފައި ހުރި ބާރުތައް ހުރީ ވަރަށް ސާފުކޮށް ފެންނަން. އެބޭފުޅުން އަމިއްލައަށް އިސް ނަގައިގެން ވެސް މިފަދަ ކަންކަން ބަލަންޖެހޭނެ،" އޭނާ ވިދާޅުވި އެވެ.
ރަސްމާލޭގެ ނަމުގައި ސަރުކާރުން ހިއްކަނީ ފުށިދިއްގަރުފަޅެވެ. އެތަނުގެ 1153 ހެކްޓަރު ހިއްކާއިރު ބިން ހިއްކަނީ ހުޅުމާލެ އާއި ފުށިދިއްގަރު ފަޅުން ބިން ވިއްކަން ކޮންޓްރެކްޓަރަށް ފުރުސަތު ދޭ ގޮތަށެވެ.
ފުށިދިއްގަރުފަޅު ހިއްކަނީ ސްރީ ލަންކާގެ ކެޕިޓަލް މެރިން އެންޑު ކޮންސްޓަރަކްޝަން ކޮމްޕެނީ (ސީއެމްސީސީ) އެވެ. ރަސްމާލެ ހިއްކާ މަތިން އެ ކުންފުންޏަށް 70 ހެކްޓަރުގެ ބިން ސަރުކާރުން ދެ އެވެ. އެއީ ހުޅުމާލެއިން 10 ހެކްޓަރާއި ފުށިދިއްގަރުފަޅުން ހިއްކާ 60 ހެކްޓަރުގެ ބިމެވެ.
