ރޯދަ މަހުގެ ފަހު ދިހައެއް ބަންދުކުރުމަށް ނިންމާފައި ވާތީ، އެ ދުވަސްތަކުގައި މަސައްކަތް ކުރާ ޖުޑިޝަރީގެ މުވައްޒަފުންނަށް ލިބޭނީ ރަސްމީ ބަންދު ދުވަހަކު ނުވަތަ ރަސްމީ ވަގުތުން ބޭރުގައި މަސައްކަތްކުރާއިރު ލިބިދޭ އުޖޫރަ ކަމަށް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން ބުނެފި އެވެ.
ރޯދަ މަހުގެ ފަހު ދިހައެއް، ސަރުކާރު ބަންދު ދުވަސްތަކުގެ ގޮތުގައި ކަނޑައެޅުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
ނަމަވެސް ޑީޖޭއޭއިން ކޯޓުތަކަށް ފޮނުވި ލިޔުމެއްގައި ބުނެފައިވަނީ އެ ދުވަސްތަކަކީ ގެއިން އޮންލައިންކޮށް މަސައްކަތް ކުރެވޭ ދުވަސްތަކެއް ގޮތުގައި ހަމަޖައްސައި، އަދި އެ ދުވަސްތަކަކީ މޯލްޑިވްސް އީކޯޓް މެނޭޖުމަންޓު ސިސްޓަމް (މެމްސް) ގެ ތެރެއިން ބަންދު ނޫން ދުވަސްތަކެއް ގޮތުގައި ކަނޑައަޅާފައިވާ ކަމަށެވެ.
"ރަމަޟާން މަހުގެ ފަހުދިހައިގެ ދުވަސްތަކަކީ ވޯކް ފްރޮމް ހޯމްގެ ދުވަސްތަކެއްގެ ގޮތުގައި މި ޑިޕާޓްމަންޓުގައި ހަމަޖެއްސިފައިވާ ވާހަކަ ދެންނެވިން، އަދި މި ދުވަސްތަކަކީ މެމްސްގެ ތެރެއިން ބަންދު ދުވަސްތަކެއްގެ ގޮތުގައި ހަމަޖެއްސިފައި ނުވާނެ ވާހަކަ ދެންނެވީމެ," އެ ލިޔުމުގައިވެ އެވެ.
އެހެންވިޔަސް ޑީޖޭއޭއިން މިއަދު ހެނދުނު އިރާކޮޅު ނެރުނު ނޫސް ބަޔާނެއްގައި ވަނީ ރައީސް ޑރ. މުހައްމަދު މުއިއްޒު ނިންމެވުމާ އެއް ގޮތަށް އެ ފުރުސަތު ޖުޑީޝަރީގެ މުވައްޒަފުންނަށް ވެސް ދިނުމުގެ ގޮތުން އާންމު އުސޫލުން އޮފީހަށް ހާޒިރުވާން ނުޖެހޭ ގޮތަށް ހަމަޖައްސާފައިވާ ކަމަށެވެ.
ރައްޔިތުންނަށް ޖުޑިޝަރީން ކޮންމެހެން ދޭން ޖެހޭ ހިދުމަތްތައް ދިނުމަށް، އެ މަސައްކަތަށް ވީހާވެސް މަދު މުވައްޒަފުން މަސައްކަތަށް ނުކުންނަ ގޮތަށް އިސްކަންދީ، އެ ދުވަސްތަކުގައި މަސައްކަތަށް ހާޒިރުވާ މުވައްޒަފުުންނަށް ރަސްމީ ބަންދު ދުވަސްތަކުގައި ދޭ ނިސްބަތަށް އިތުރު ގަޑީގެ ފައިސާ ވެސް ލިބޭނެ ކަމަށް ޑީޖޭއޭއިން ބުންޏެވެ.
ޑީޖޭއޭ އިން ވަނީ ޖުޑިޝަރީ އިން ފޯރުކޮށްދޭ ހިދުމަތްތަކުގެ ތެރެއިން ކުށާއި ދަރަނީގެ ރެކޯޑު ސާފުކޮށްދިނުމުގެ ހިދުމަތާއި ކޯޓުތަކުގެ ހުކުމްތަކާ ގުޅިގެން ކޯޓުތަކަށް ދައްކާ ފައިސާ އޭގެ ހައްގުވެރިންނަށް ރައްދު ކުރުމުގެ ހިދުމަތް އާންމު ދުވަސްތަކެކޭ އެއް ގޮތަށް ފަހު ދިހައެއްގައި ވެސް ފޯރުކޮށްދިނުމަށެވެ.
