ޖުޑީޝަލް ސާވިސް ކޮމިޝަން (ޖޭއެސްސީ) އަށް ފެނިއްޖެނަމަ ވަކި ސަބަބެއް ބަޔާންނުކޮށް ކޯޓުތަކުގެ އިސްފަނޑިޔާރުން މަގާމުން ދުރުކުރެވޭ ގަވާއިދެއް ހަދައި އަމަލުކުރަން ފަށައިފި އެވެ.
ކޯޓުތަކަށް އިސް ފަނޑިޔާރުން އައްޔަނުކުރުމާއި ދުރުކުރުމުގައި އަމަލުކުރާނެ ގޮތުގެ ގަވާއިދު މިއަދު މެންދުރު ވަނީ ގެޒެޓުގައި ޝާއިއުކޮށްފަ އެވެ. އެ ގަވާއިދުގައި އިސްފަނޑިޔާރުން އައްޔަނުކުރުމުގައި އަމަލުކުރާނެ ގިނަ އިޖުރާއަތްތަކެއް ހިމަނާފައިވީ ނަމަވެސް ވަކިކުރުމުގައި އިހުތިޔާރު އޮތީ ޖޭއެސްސީއަށް ދޫކޮށްލާފަ އެވެ.
"ކޯޓުތަކަށް އައްޔަނުކުރާ އިސް ފަނޑިޔާރުން، ކޯޓުތަކުގެ ހިންގުން ހަރުދަނާކުރުމަށްޓަކައި އެ މަގާމުން ދުރުކުރަން ޖެހޭ ކަމަށް، ޖުޑީޝަލް ސާވިސް ކޮމިޝަނަށް ފެނިއްޖެނަމަ، އެ މަގާމުން ފަނޑިޔާރަކު ދުރުކުރުމުގެ ބާރު، ޖުޑީޝަލް ސާވިސް ކޮމިޝަނަށް ލިބިގެންވެ،" ގަވާއިދުގެ އަށްވަނަ މާއްްދާގައި ބުނެފައިވެ އެވެ.
އިސްފަނޑިޔާރުން އައްޔަނުކުރުމުގައި ގާނޫނުތަކަށް އަހުލުވެރިވެފައިވާ މިންވަރަށާއި، މުޖުތަމައުގައި ދިމާވާ ކަންތައްތަކާ މެދު ގެންގުޅޭ ނަޒަރިއްޔާތާއި، މުއާމަލާތް ކުރުމުގެ ހުނަރާއި، އަމިއްލަ ނަފްސަށް އިތުބާރު ކުރާ މިންވަރާއި، މަސައްކަތުގެ އަހުލާގު އަދި ހިންގުމުގެ ހުނަރާއި، މައްސަލަތައް ހައްލުކުރުމުގެ ވިސްނުން ހުރި މިންވަރަށް ބަލާނެ އެވެ.
ސުޕީރިއާ ކޯޓެއްގެ އިސްފަނޑިޔާރުގެ މަގާމަށް ކުރިމަތިލެވޭނީ އެ ކޯޓެއްގައި މަސައްކަތް ކުރާ ފަނޑިޔާރުންނަށެވެ. އަދި ޖުޑީޝަލް ދާއިރާގެ އިސްމެޖިސްޓްރޭޓުގެ މަގާމަށް ކުރިމަތިލެވޭނީ އެ ދާއިރާއެއްގެ ކޯޓުތަކުގައި މަސައްކަތްކުރާ މެޖިސްޓްރޭޓުންނަށެވެ.
ޖޭއެސްސީ އިން އެފަދަ ގަވާއިދެއް ހެދިއިރު، އެ ކޮމިޝަން އެކުލެވިގެންވާ ގޮތުން ސަރުކާރަށް އޮތީ ކޮންޓްރޯލް ލިބިފަ އެވެ. ސަރުކާރުން ބޭނުންވި ގޮތަށް، ސުޕްރީމް ކޯޓުގެ ތިން ފަނޑިޔާރަކު މަގާމުން ވަކި ކުރުމުގައި ވެސް ޖޭއެސްސީ އިން ބޮޑު ރޯލެއް ކުޅުނެވެ.
