ކޯޓުތަކުގެ ނިންމުންތައް އެއް ތަނަކުން ބެލޭ، އަދި އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ސާޗުކުރުން ފަދަ ފަންކްޝަންތައް އެކުލެވޭ "ސަރިޔަތް" ވެބްސައިޓު ލޯންޗުކޮށްފި އެވެ.
ހައި ކޯޓުގެ ފަނޑިޔާރު އަބްދުލްމާނިއު ހުސެއިންގެ ސަރިޔަތް ވެބްސައިޓަކީ އެއް ޕްލެޓްފޯމެއްގެ ދަށުން ހުރިހާ ކޯޓުތަކުގެ ނިންމުންތައް ބެލޭ ގޮތަށް، ފަރުމާކޮށްފައިވާ ފުރަތަމަ ވެބްސައިޓެވެ. ކޯޓުތަކުގެ ނިންމުންތަކުގެ އިތުރުން ގާނޫނީ ދާއިރާގެ ފޮތްތަކާއި ދިރާސީ ކަރުދާސްތަކާއި އެހެނިހެން ލިޔެކިޔުންތައް ވެސް މި ވެބްސައިޓުގައި ހިމެނެ އެވެ.
ސަރިޔަތް ގެ އެންމެ ހާއްސަ އެއް ފީޗާއަކީ އޭއައި ސާޗް ފަންކްޝަން އެވެ. މި ސާޗު ފަންކްޝަން ބޭނުންކުރާއިރު، މައުލޫމާތު ބޭނުންވާ ހާދިސާއެއް ލިޔުމަށް ފަހު ސާޗު ކުރުމުން، އެކަމާ ގުޅޭ ނިންމުންތަކާއި އެހެނިހެން ލިޔެކިޔުންތައް ހޯދައިދީ، ދިރާސާކޮށްދޭނެ އެވެ.
ހިލޭ ރަޖިސްޓްރީކޮށްގެން ބޭނުންކުރެވޭ މި ވެބްސައިޓުގެ ގިނަ ފީޗާތައް ވަނީ މި ވެބްސައިޓުގެ އޮތޮރައިޒްޑް ޔޫސާޒްއަށް ލީގަލް ބްރީފިން ތައްޔާރުކޮށްދީ ގާނޫނީ ލިޔެކިޔުންތައް އިތުރަށް ދިރާސާ ވެސް ކުރެވެ އެވެ.
މި ވެބްސައިޓު ލޯންޗުކުރިއިރު ޝާއިއުކޮށްފައި ވަނީ ސުޕްރީމް ކޯޓާއި ހައި ކޯޓުގެ ނިންމުންތަކެވެ. ކައިރި މުސްތަގުބަލެއްގައި ދަށު ކޯޓުތަކުގެ ނިންމުންތަކާއި ސުޕްރީމް ކޯޓާއި ހައި ކޯޓުގެ ކުރީގެ ނިންމުންތައް ވެސް ޝާއިއުކުރަން ދަނީ މަސައްކަތް ކުރަމުންނެވެ.
