މީގެ ހަތް އަހަރެއްހާ ދުވަސް ކުރިން، ދުޝްމަނެއް ކަމަށް ހީކޮށް އޮޅިގެން މަރާލި ރ. މީދޫ، ފެންފިޔާޒުގޭ, މުހައްމަދު އަނަސް މަރާލުމުގައި ބައިވެރިވުމުގެ ތުހުމަތު އޮތް މީހުންގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން ކުރި ހުކުމާ އެކު މިނިވަންވި މީހެއް މަސްތުވާތަކެތީގެ މައްސަލައެއްގެ ރޭ ހައްޔަރުކޮށްފި އެވެ.
ޖުލައި 31، 2017 ގައި ހިނގި އެ ހާދިސާއާ ގުޅިގެން ކްރިމިނަލް ކޯޓުގައި ކުރިއަށް ދިޔައީ، އޭނާ މަރާލުމުގައި ބައިވެރިވުމުގެ ދައުވާ އުފުލާފައިވާ ހަތަރު މީހުންނާއި މަރާލުމުގެ ދައުވާ އުފުލި ތިން މީހެއްގެ މައްސަލަ އެވެ. އޭގެ ތެރެއިން ރޭގެ ވަގުތެއްގައި ހައްޔަރުކުރީ ކާކު ކަމެއް ފުލުހުން ހާމަނުކުރެ އެވެ.
"ލޯންޗެއް ހުއްޓުވައި ބަލައި ފާސްކޮށް މަސްތުވާތަކެއްޗާ ބަނގުރަލުގެ, ވަރަށް ގިނަ އަދަދެއްގެ ބަނގުރަލާ އެކު ބަޔަކު ފުލުހުންގެ ބެލުމުގެ ދަށަށް ގެނެސްފައިވޭ. މި ބަނގުރަލާ މަސްތުވާއެއްޗެހީގެ އުޅަނދު ހުއްޓުވިއިރު އަނަސް މައްސަލާގައި ދައުވާ އުފުލައި ކުށް ސާބިތު ނުވުމުގެ ސަބަބުން ދޫކޮށްލާފައިވާ ފަރާތެއްވޭ," ޑެޕިއުޓީ ކޮމިޝަނާ އޮފް ޕޮލިސް އިސްމާއީލް ނަވީން ވިދާޅުވި އެވެ.
އެކަމާ ގުޅިގެން ކަންބޮޑުވުން ހުރި ކަމަށް ފުލުހުން ބުނެފައިވެ އެވެ. އަދި, ތަހުގީގުގެ ތަފްސީލުތައް ހާމަކުރަން އާދިއްތަ ދުވަހު މައުލޫމާތު ދޭނެ ކަމަށް ފުލުހުން ބުންޏެވެ.
އަނަސްގެ މަރާ ގުޅިގެން ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ދައުވާ އުފުލާފައިވާ ހަތަރު މީހުންނަކީ ލ. ގަން، ތުނޑި، ޖުނައިހު އަބްދުﷲ އާއި ސ. ފޭދޫ ވެސްޓަންވިލާ، ހަސަން މަހްފޫޒާއި ތ. ކިނބިދޫ ގުލްފާމުގޭ، މުހައްމަދު ޝާޒާއި ދަފްތަރު ނަންބަރު 1746، ސިމާހް މޫސާ އެވެ.
ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގެ ދައުވާ ކުރި ތިން މީހުންނަކީ ޅ. ކުރެންދޫ، އަސުރުމާގޭ، އަހްމަދު ޒަޔާނާއި މ. ދިމިޝްގުގޭ، އުސްމާން ޝަރީފް އަދި މ. ލޮނުމިދިލިގޭ، އަފްރާހު އަބްދުއްރައްޒާގެވެ.
އަނަސްއަށް ހަމަލާ ދިން މީހުންގެ މޫނު ފާހަގަވާން ނެތް އިރު، ދައުލަތުން ހުށަހެޅި ހެކިންގެ ތެރެއިން ހެކިބަސް ދިން މީހުންނަށް ވެސް މޫނު ފާހަގަ ކޮށްދެވިފައެއް ނުވެ އެވެ.
ކްރިމިނަލް ކޯޓުގައި މައްސަލަ ބެއްލެވި ގާޒީ އަލީ ނަދީމް ފެބްރުއަރީ 25, 2024 ގައި ހުކުމް އިއްވަވަމުން ފާހަގަކުރެއްވީ ވެސް ހެކީގެ ގޮތުގައި ހުށަހެޅި ފޮޓޯތަކާއި ވީޑިއޯ ފުޓޭޖުތަކުން ފެންނަނީ ދައުވާ އުފުލާފައިވާ މީހުން ކަން ކަށަވަރުކޮށްދޭނެ ނޫނީ އެ ކަމަށް ބާރު ދޭނެ އިތުރު ހެކި ނެތް ކަމަށެވެ. އަދި ސިއްރު ހެކިވެރިންގެ ހެކިބަހުންނާއި، ހަބީރުންގެ ހެކިބަހުން ވެސް އެ ކަން ސާބިތު ނުވާ ކަމަށެވެ.
