ބަންޑާރަ ކުލަބުން ބޭއްވި ބަންޑާރަ ކަޕް 2024 ގެ ފިރިހެން ޑިވިޝަނުގެ ޗެމްޕިއަންކަން ޑްރަގް ކޯޓުން ހޯދިއިރު, އަންހެން ޑިވިޝަނުގެ ޗެމްޕިއަންކަން ކްރިމިނަލް ކޯޓު ރެކްރިއޭޝަން ކުލަބުން ހޯދައިފި އެވެ.
މި މަހުގެ 15 ގައި ފެށި މި މުބާރާތުގެ ފިރިހެން ޑިވިޝަނުގައި 13 ޓީމުން ބައިވެރިވިއިރު, އަންހެން ޑިވިޝަނުގައި ބައިވެރިވީ 11 ޓީމުންނެވެ.
ފިރިހެން ޑިވިޝަނުގެ ޗެމްޕިއަންކަން ޑްރަގް ކޯޓުން ހޯދީ ސީއާރުސީ 5-3 ގެ ނަތީޖާއަކުން ބަލިކޮށްގެންނެވެ. މި މެޗުގައި ޑްރަގް ކޯޓުގެ އަންސަރު އިބްރާހީމް (އަންކޮ) ހަތަރު ގޯލު ޖެހި އެވެ.
ފިރިހެން ޑިވިޝަނުގައި އެންމެ ގިނަ ގޯލު ޖެހި ކުޅުންތެރިޔަކީ އަންކޮ އެވެ. އޭނާ ވަނީ ފައިނަލް މެޗުގައި ޖެހި ހަތަރު ގޯލާއެކު މުޅި ޖުމްލަ 20 ގޯލު ޖަހައިފަ އެވެ. މުބާރާތުގެ އެންމެ މޮޅު ކުޅުންތެރިޔަކަށްވެސް ހޮވުނީ އަންކޮ އެވެ.
ބަންޑާރަ ކަޕް ތައްޓާއެކު އަންހެން އަދި ފިރިހެން ޑިވިޝަނުގެ ޗެމްޕިއަން ޓީމުން އުފާފާޅުކުރަނީ...
މުބާރާތުގެ އަންހެން ޑިވިޝަނުގެ ޗެމްޕިއަންކަން ސީއާރުސީ އިން ހޯދީ ފައިނަލުގައި އޮޑިޓާ ޖެނެރަލް ރެކްރިއޭޝަން ކުލަބްގެ މައްޗަށް 5-0 ގެ ނަތީޖާއަކުން ކުރިހޯދައިގެންނެވެ.
އަންހެން ޑިވިޝަނުގެ އެންމެ މޮޅު ކުޅުންތެރިޔަކަށް ސީއާރުސީގެ ޒުލައިހާ ހަބީބް ހޮވުނުއިރު, އަންހެން ޑިވިޝަނުގެ އެންމެ ގިނަ ގޯލު ޖެހި ކުޅުންތެރިޔަކީ ސީއާރުސީގެ އައިޝަތު ފަޒީލާ އެވެ. އޭނާ ވަނީ މި މުބާރާތުގައި ޖުމްލަ 12 ގޯލު ޖަހާފަ އެވެ.
ޝަރުއީ އަދި ގާނޫނީ ދާއިރާގައި މަސައްކަތް ކުރަމުން އަންނަ ފަރާތްތައް މެދުގައި 2022 ވަނަ އަހަރުން ފެށިގެން ބާއްވަމުން އަންނަ ބަންޑާރަ ކަޕަކީ މި ދާއިރާގައި މަސައްކަތް ކުރަމުން އަންނަ ގިނަ ފަރާތްތަކެއްގެ ބޮޑު ތަރުހީބެއް ލިބެމުން އަންނަ މުބާރާތެކެވެ.
