ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ގެ ރައީސް ކަމަށް ދެ ވަނަ ދައުރަކަށް ކުރިން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުހައްމަދު ލަތީފް އިންތިހާބު ކޮށްފި އެވެ.
ކާވާގެ އަހަރީ އާންމު ޖަލްސާގައި ރައީސް ކަމަށް ލަތީފް އިންތިހާބުކުރީ ސެންޓްރަލް އޭޝިއާ ސަރަހައްދުގެ ގައުމުތަކުގެ އިއްތިފާގުންނެވެ.
ޖުމްލަ 14 ގައުމު ހިމެނޭ ކާވާގެ އަހަރީ އާންމު ޖަލްސާ މި މަހު ތައިލެންޑްގެ ބެންކޮކްގައި ކުރިއަށް ދިޔައިރު, އަހަރީ އާންމު ޖަލްސާގައި 13 ގައުމުން ބައިވެރިވި އެވެ. މި ޖަލްސާގައި އިންޑިއާ ބައިވެރިނުވީ އެ ގައުމު މިވަގުތު ވޮލީބޯޅައިގެ މައި ޖަމިއްޔާ އެފްއައިވީބީގެ ސަސްޕެންޝަނެއްގައި އޮތުމުންނެވެ.
ކާވާގެ އަހަރީ އާންމު ޖަލްސާގައި އެފްއައިވީބީގެ އިސްވެރިންގެ އިތުރުން, އޭޝިއާ ވޮލީބޯލް ފެޑަރޭޝަން (އޭވީސީ) ގެ ރައީސް ޑރ. ރީތާ ޝުބޯވޯ ގެ އިތުރުން އޭވީސީގެ ޖެނެރަލް ސެކެޓްރީ ބައިވެރިވެވަޑައިގަތެވެ.
ރައީސްގެ އިތުރުން ކާވާއިން ވަނީ އެ ޖަމިއްޔާގެ އިތުރު މަގާމުތަކަށް ވެސް މެމްބަރުން އައްޔަނު ކޮށްފަ އެވެ. އެގޮތުން ފަސްޓް ވައިސް ޕްރެޒިޑެންޓުގެ މަގާމަށް އިރާނުގެ ވޮލީބޯޅަ ފެޑެރޭޝަންގެ ސީނިއާ އެޑްވައިޒަރ ޑރ. ޑަވަރުޒާން އިންތިހާބުކުރިއިރު, ވައިސް ޕްރެޒިޑެންޓް ސެންޓްރަލް އޭޝިއާގެ މަގާމަށް އުޒްބަކިސްތާންގެ ވޮލީ އެސޯސިއޭޝަނުގެ ސެކްރެޓަރީ ޖެނެރަލް ފަރުހޫދް އަލިމޯވް އިންތިހާބުކުރި އެވެ.
އަދި ވައިސް ޕްރެޒިޑެންޓް ސައުތު އޭޝިއާގެ މަގާމަށް ނޭޕާލް ވޮލީބޯޅަ އެސޯސިއޭޝަންގެ ރައީސް ޖީތެންދުރާ ވަނީ އިންތިހާބުކޮށްފަ އެވެ.
މީގެ އިތުރުން ބޯޑު މެންބަރުގެ ގޮތުގައި ކުޝާލް މަލިކު ޒައި އާއި، ބަންގްލަދޭޝް ވޮލީ އެސޯސިއޭޝަނުގެ ރައީސް އާތިކް އިސްލާމާއި، ބޫޓާނުގެ ކިންޒޭންގ އާއި، އިންޑިއާގެ ވޮލީބޯޅަ ފެޑެރޭޝަންގެ ފަރާތުން ރޯހިތު ރާޖްޕާލް އާއި، އިރާން ވޮލީބޯޅަ ފެޑަރޭޝަނުން ލަވަރު ޒާން އާއި، ވޮލީބޯޅަ ފެޑަރޭޝަން އޮފް ކަޒަކިސްތާންގެ ސެކްރެޓަރީ ޖެނެރަލް ޔަރުމިކާއި، ކިރްގިސްތާން ވޮލީބޯޅަ ފެޑަރޭޝަންގެ ސެކްރެޓަރީ ޖެނެރަލް ކްލިޗާއި، ރާއްޖޭގެ ވޮލީބޯޅަ އެސޯސިއޭޝަންގެ ހަޒާންދާރު މުޙައްމަދު ރާމިޒާއި، ކަޒަކިސްތާން ވޮލީބޯޅަ ފެޑެރޭޝަންގެ ސެކްރެޓަރީ ޖެނަރަލް ލަޓިޕޯވް ހިމެނެ އެވެ.
އަދި ނޭޕާލް ވޮލީބޯޅަ އެސޯސިއޭޝަންގެ ރައީސް ޖިތެންދުރާއި، ޕާކިސްތާން ވޮލީބޯޅަ ފެޑަރޭޝަންގެ ޗެއާމަން ޗައުދަރީ މުޙައްމަދު ޔައުގޫބާއި، ސްރީ ލަންކާ ވޮލީބޯޅަ ފެޑަރޭޝަންގެ ޖެނަރަލް ސެކްރެޓަރީ ނާލަކަ އާއި، ވޮލީބޯޅަ ފެޑަރޭޝަން އޮފް ތުރުކުމެނިސްތާނުގެ ސެކްރެޓަރީ ޖެނަރަލް އަޓަގެލްޑީ ހަނޯވް އާއި، އުޒުބަކިސްތާން ވޮލީބޯޅަ ފެޑަރޭޝަންގެ ސެކްރެޓަރީ ޖެނަރަލް ފަރުހޫދު އަލިމޯވް ވަނީ އިންތިހާބު ކޮށްފަ އެވެ.
ކާވާގެ މި ދައުރުގެ ސެކެޓްރީ ޖެނެރަލަކަށް ލަތީފް ހަމަޖެއްސެވީ ނާލަކަ އެވެ. އަދި އެގްޒެކެޓިވް ޑިރެކްޓަރުގެ ގޮތުގައި ހަމަޖެއްސީ ކްލިޗް އެވެ.
