ފީފާ އާއި އޭއެފްސީ އަދި ބައިނަލްއަގުވާމީ އެކި ގައުމުތަކުގެ އެސޯސިއޭޝަންތަކުން، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދޭ ފައިސާ އަށް ހިޔާނަތްތެރިވެފައިވާ މައްސަލައިގެ ތެރޭގައި ހިމެނޭ 10،000 ޑޮލަރުގެ މައްސަލައެއްގައި އެފްއޭއެމްގެ ދެ ފަރާތެއްގެ މައްޗަށް ދައުވާކުރަން ފުލުހުން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފި އެވެ.
ފުލުހުން މި ގޮތަށް ހާމަކޮށްފައިވަނީ މިއަދު އެ އިދާރާއިން ކުރިއަށްގެންދިޔަ ނޫސްވެރިންގެ ބައްދަލުވުމުގަ އެވެ. މި 10،000 ޑޮލަރުގެ މައްސަލައިގެ އިތުރުން ދެން ފުލުހުން ބަލަމުން އަންނަ އެފްއޭއެމްގެ އެހެން މައްސަލައެއްގެ ގޮތުގައި ފާހަގަކޮށްފައިވަނީ އެފްއޭއެމަށް ފީފާ އިން ދިން 1.9 މިލިއަން ޑޮލަރުގެ އިންޓަރެސްޓް ފްރީ ލޯނަށް ހިޔާނާތްތެރިވެފައިވާ މައްސަލަ އެކެވެ.
މިއަދު ބޭއްވި ފުލުހުންގެ ނޫސްވެރިންގެ ބައްދަލުވުމުގައި ފުލުހުންގެ ހެޑް އޮފް ފައިނޭންޝިއަލް ކްރައިމް އިންވެސްޓިގޭޝަން ޔުނިޓް، ޗީފް އިންސްޕެކްޓަރު، ޔޫސުފް ލޫތު ވިދާޅުވީ އެފްއޭއެމް މައްސަލައާ ގުޅުން ހުރި ބައެއް ތަންތަން ބަލާ ފާސްކޮށް، ޑޮކިއުމެންޓަރީ ހެއްކާއި އިލެކްޓްރޯނިކް ބައެއް ޑިވައިސްތައް ހެކީގެ ގޮތުގައި ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
އޭނާ ވިދާޅުވީ މި ފަދަ މައްސަލަތައް ތަހުގީގު ކުރުމުގައި ގިނަ ވަގުތުތަކެއް ނަގާއިރު ހުންނަ ގޮންޖެހުންތައް ވެސް ގިނަ ކަމަށެވެ.
"މި މައްސަލައިގެ ވަކި ވަކި ޓްރާންސެކްޝަންތަކުގެ މައްސަލަ ވެސް އަޅުގަނޑުމެން މި ދަނީ ތަހުގީގުކުރަމުން. އެ ގޮތުން އަޅުގަނޑުމެންނަށް ފާހަގަކުރެވިފައިވަނީ ފީފާ އިން އެފްއޭއެމަށް ޖަމާކޮށްފައިވާ 10،000 ޑޮލަރު، އެފްއޭއެމްގެ އިސްވެރިއެއްގެ އެކައުންޓަށް ޖަމާކޮށް އެ ފައިސާ އެ ފަރާތުން އަމިއްލަ އަށް ބޭނުންކޮށް އޭގެއިން މަންފާ ހޯދައިވާ ކަމަށް ތުހުމަތު ކުރެވޭ އެކަށީގެންވާ ހެކި ލިބިފައިވާތީވެ އެ ބައި ތަހުގީގު ފުރިހަމަ ކުރުމަށް ފަހު މިހާރު ވާނީ ތަހުގީގު ކުރުމަށް ޕްރޮސެކިއުޓާ ޖެނެރަލް އޮފީހަށް ފޮނުވިފަ،" ލޫތު ވިދާޅުވި އެވެ.
އޭނާ ވިދާޅުވީ، 1.9 މިލިއަން ޑޮލަރުގެ ކޮވިޑް ލޯނުގެ ތަހުގީގު މައްސަލައިގެ ވެސް ބޮޑުބައި ނިމިފައިވާ ކަމަށެވެ.
އެފްއޭއެމް މައްސަލައިގައި ދައުވާ ކުރަން ފޮނުވި ފަރާތްތަކުގެ ތެރޭގައި އެ އެސޯސިއޭޝަންގެ ރައީސް ބައްސާމް ހިމެނޭތޯ ސުވާލުކުރުމުން، ލޫތު ވިދާޅުވީ، ތަހުގީގު ކުރިއަށްދާ ގޮތުން މި ވަގުތު އެ ދެ ފަރާތުގެ ނަން ހާމަކުރެވެން ނެތް ކަމަށެވެ.
"މި ވަގުތު އެއީ ކޮން ފަރާތެއްކަން ހާމަކޮށްލަން އަދި ދަތި، މި ވަގުތު ހާމައެއް ނުއެއްކުރާނަން، އެހެން ނަމަވެސް ދެ ފަރާތެއްގެ މައްޗަށް، ދެ ދިވެހިންގެ މައްޗަށް ދައުވާ ކުރުމަށް ޕްރޮސެކިއުޓާ ޖެނެރަލް އޮފީހަށް ވާނީ ފޮނުވިފަ،" ލޫތު ވިދާޅުވި އެވެ.
ފުލުހުންނާއި ޕީޖީ އޮފީހުން ކުރިއަށްގެންދާ އެފްއޭއެމްގެ މި ތަހުގީގުގައި ފާހަަގަކުރެވުނު ކަންތައްތަކަށް ބަަލައި، އެފްއޭއެެމްގެ ރައީސް ބައްސާމް އަދީލް ޖަލީލްގެ ޕާސްޕޯޓް ވަނީ މިދިޔަ ޑިސެމްބަރު މަހު ކުރީކޮޅުގައި އޮތީ ހިފަހައްޓައިފަ އެވެ.
އެހެންކަމުން، ފުލުހުން ދައުވާ ކުރަން މި ހުށަހެޅި ދެ މީހުންގެ ތެރޭގައި ބައްސާމް ހިމެނުމުގެ ފުރުސަތު އެބައޮތެވެ.
އެފްއޭއެމަށް ލިބޭ ފައިސާ ނަހަމަ ގޮތުގައި ބޭންކުރާ ކަމަށް ކުރެވޭ ތުހުމަތުތަކާ ގުޅިގެން އެފްއޭމްގެ ރައީސް ބައްސާމް އާއި އެ ޖަމިއްޔާގެ އެހެން ވެރިންނަށް ވަރަށް އަވަހަށް ދައުވާކުރެވޭ ވަރަށް ހެކި ލިބޭނެ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވެސް ވަނީ ނޮވެމްބަރު މަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފަ އެވެ.
ޝަމީމް، އެ ދުވަހުގެ ނޫސްވެރިންގެ ބައްދަލުވުމުގައި ވިދާޅުވީ، އެފްއޭއެމްގެ ހިޔާނާތުގެ މައްސަލައިގެ ޕްރައިމް ސަސްޕެކްޓަކީ ބައްސާމް ކަމަށެވެ.
ފުލުހުންނާއި ޕީޖީން އެފްއޭއެމްގެ މައްސަލަ ތަހުގީގު ކުރަމުން ދަނިކޮށް، ފީފާގެ އޮޑިޓަރުންގެ ޓީމެއް ވަނީ ރާއްޖެ އަށް އައިސްފަ އެވެ. އެނގިފައިވާ ގޮތުގައި ފުލުހުންނާއި ފީފާގެ ޓީމުން ވަނީ ބައްދަލުވެސް ކޮށްފަ އެވެ. ފީފާ އިން ވެސް އަންނަނީ ރާއްޖެ އަށް ދިން، 1.9 މިލިއަން ޑޮލަރުގެ ކޮވިޑް ލޯންގެ ހަރަދުތައް ކުރި ގޮތުގެ ލިޔެކިޔުންތައް ލިބިފައިނުވާތީ އެ ކަން ބަލަމުންނެވެ.
އެފްއޭއެމް އިން އެ އެސޯސިއޭޝަންގެ މުވައްޒަފުންނަށް މުސާރަ ނުދީ އެތައް މަހެއް ވެފައިވަނިކޮށް، ފީފާ އިން ވަނީ މުވައްޒަފުންގެ މުސާރަ ދޭން ޝަރުތުކޮށް، އެފްއޭއެމަށް އެއް ލައްކަ ޑޮލަރު ވެސް ދީފަ އެވެ.
