އެންމެ ގިނައިން ޓޫރިސްޓުން ގެންނަ މާކެޓަކަށް ޗައިނާ ގެންނަން ކުރަމުންދާ މަސައްކަތާ އެކީ ޗައިނާއިން އަންނަ ޓޫރިސްޓުންގެ އަދަދު ކޮވިޑު ކުރިން އައި ވަރަށް ވުރެ ދެ ގުނަ އިތުރުވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ ޗައިނާއަށް ކުރެއްވި ފުރަމާނަ ދަތުރު ނިންމަވާލެއްވުމަށް ރާއްޖެ ވަޑައިގެން އެ ދަތުރުގައި ހާސިލުކުރެވުނު ކަންކަން ކިޔައިދެއްވަމުންނެވެ. އެގޮތުން ރައީސް ވަނީ، ޓޫރިޒަމާ ގުޅޭ ކަންކަން ފާހަގަކުރައްވަމުން، އެ ދަތުރުގައި އެންމެ ފުރަތަމަ ވަޑައިގެން ފޫޖިއާން ޕްރޮވިންސުގެ ޝިއާމެން އެއާލައިންސް އިން އަންނަ މާޗުން ފެށިގެން މާލެއަށް ސީދާ ދަތުރުތައް ފަށާނެ ކަން ރައީސް އިއުލާންކުރައްވާފަ އެވެ.
"ޗައިނާއިން ޓޫރިސްޓުން އިތުރުކުރުމަށްޓަކައި ވަރަށް ގިނަ މަޝްވަރާތައް ކުރެވި ވަރަށް ގިނަ ކާމިޔާބީތައް ލިބިގެން ދިޔަ. ޑައިރެކްޓް ފްލައިޓުތައް އިތުރުކުރުމަށް ޓަކައި ވަރަށް ގިނަ މަޝްވަރާތައް އެންމެ މަތީ ލެވަލްގައި ކުރެވިގެން ދިޔަ. މި ދަތުރުގައި ޝިއަމެން އެއާއިން ރާއްޖެއަށް ޑައިރެކްޓް ފްލައިޓުތައް މި ސްޕްރިންގުގައި ފެށުމަށްޓަކައި އެ ފަރާތުން ވަނީ ކަނޑައަޅާފައި،" އެމަނިކުފާނު ވިދާޅުވި އެވެ.
ޝިއާމެން އެއާލައިންގެ ފުރަތަމަ ދަތުރުތައް އެ އެއާލައިން ނިސްބަތްވާ ޝިއާމެންއިން މާލެއަށް ފެށުމަށް ފަހު، ޗައިނާގެ އެ ނޫން ޑެސްޓިނޭޝަންތަކަށް ދަތުރުތައް ފުޅާކުރެވިގެން ދާނެ ކަމަށް ރައީސް ވިދާޅުވި އެވެ. މިގޮތަށް ޑައިރެކްޓް ފްލައިޓުތައް އިތުރުކޮށް، މާކެޓިން އިތުރުކުރުމުން ގިނަވެގެން ދެ އަހަރުގެ ތެރޭގައި ޗައިނާއިން އަންނަ ޓޫރިސްޓުންގެ އަދަދު ކޮވިޑު ކުރިން ހުރި އަދަދުގެ ދެ ގުނައަށް އިތުރުކުރެވޭނެ ކަމަށް އެމަނިކުފާނު ވިދާޅުވި އެވެ.
"[ޑައިރެކްޓް ފްލައިޓުތަކުގެ] ސަބަބުން އަދި އޭގެ އިތުރަށް މާކެޓިން ފުޅާކުރެވިގެން ދާނެ ޗައިނާގެ ޓޫރިސްޓުންނަށް ކޮވިޑުގެ ކުރިން ރާއްޖެއަށް، ރާއްޖޭގެ ނަމްބާ ވަން، އެންމެ ގިނަ ޓޫރިސްޓުން އައި ގައުމަކީ ޗައިނާ ކަމަށްވާއިރުގައި އެ އަދަދުގެ ކޮވިޑުގެ ކުރިން ހުރި އަދަދުގެ ދެ ގުނައަށް، ޗައިނާއިން ޓޫރިސްޓުން ދެ އަހަރު ތެރޭގައި، ގިނަވެގެން ދެ އަހަރުގެ ތެރޭގައި އިތުރުކުރުމަށްޓަކައި މަސައްކަތްތައް ތަރުތީބުވެގެން ދިޔަ،" ރައީސް ވިދާޅުވި އެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި ކޮވިޑުގެ ކުރީ އަހަރު، 2019 ގައި ޗައިނާއިން ރާއްޖެއަށް 284,000 ޓޫރިސްޓުން އައެވެ. އޭގެ ކުރީ ދިހަ އަހަރުގައި އެވަރެޖުކޮށް 250،000 އަށް ވުރެ ގިނަ ޓޫރިސްޓުން އައެވެ.
މި އަދަދުތަކުގެ މައްޗަށް ހިސާބުކުރާއިރު ރައީސް ސީދާ ވިދާޅުވި ގޮތަށް ކޮވިޑުގެ ކުރިން ހުރި އަދަދުގެ ދެ ގުނައަށް ޗައިނާއިން ޓޫރިސްޓުން ގެންނަންޏާމުން، އެ ގައުމުން މަދުވެގެން ފަސް ލައްކަ ޓޫރިސްޓުން އަންނަން ޖެހެ އެވެ. މީގެ ކުރިން ޗައިނާއިން އެންމެ ގިނަ ޓޫރިސްޓުން އައި 2014 ގައި ރާއްޖެ އައީ 363،626 ޓޫރިސްޓުންނެވެ. މިދިޔަ އަހަރު އެ ގައުމުން ރާއްޖެ އައީ 187،118 ޓޫރިސްޓުންނެވެ.
ޗައިނާ ރާއްޖޭގެ އެއް ނަމްބަރު މާކެޓަށް ގެންނަން ކުރަމުންދާ މަސައްކަތުގެ ތެރެއިން ޓޫރިޒަމް މިނިސްޓްރީ އާއި މޯލްޑިވްސް މާކެޓިން އެންޑް ޕަބިލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ވަނީ ޗައިނާ ވިޔަފާރިތަކާ ގުޅިގެން މަސައްކަތް ފަށައި، އެ ގައުމުގެ ބޮޑެތި ސިޓީތަކުގައި ބިޔަ މާކެޓިން ކެމްޕެއިނެއް ފަށަން ރާވާފަ އެވެ.
ދެ ސަރުކާރު ގުޅިގެން މަސައްކަތް ކުރިޔަސް، ޗައިނާއިން އަންނަ ޓޫރިސްޓުންގެ އަދަދަށް ކުއްލި އިތުރުވުމެއް ނާންނާނެ ކަމަށް އެ ގައުމުގެ ތަޖުރިބާކާރުން އަންނަނީ ބުނަމުންނެވެ.
