ވިލާ ކޮލެޖުން ކުރިއަށް އޮތް 2027 ވަނަ އަހަރުގެ ޖަނަވަރީ އިންޓޭކަށް ކުރިމަތިލުމުގެ ފުރުސަތު އިއްޔެ ރަސްމީކޮށް ހުޅުވާލައިފި އެވެ.
މި އިންޓޭކްގައި ސެޓްފިކެޓް ލެވެލް 4 އިން ފެށިގެން މާސްޓަރސް ޑިގްރީއާ ހަމައަށް، ތަފާތު އެކި ދާއިރާތަކުން 100 އަށްވުރެ ގިނަ ޕްރޮގްރާމްތަކަށް ކުރިމަތިލުމުގެ ފުރުސަތު ވަނީ ހުޅުވާލާފަ އެވެ. މި އިންޓޭކަށް އެޕްލިކޭޝަން ހުށަހެޅުމުގެ އެންމެ ފަހު ތާރީހަކީ 26 ޑިސެމްބަރު 2026 އެވެ.
މި އިންޓޭކްގައި ހުޅުވާލާފައިވާ ދާއިރާތަކުގެ ތެރޭގައި އިންފޮމޭޝަން ޓެކްނޮލޮޖީ، ކޮމްޕިއުޓަރ ސައިންސް، ސައިބަރ ސެކިއުރިޓީ، ލޯ، ޝަރީޢާ، އިސްލާމީ ފައިނޭންސް، ޕޮލިޓިކަލް ސައިންސް، އަދި ތަޢުލީމީ ދާއިރާގެ އެކި ސްޕެޝަލައިޒޭޝަންތައް ހިމެނެއެވެ. މީގެ އިތުރުން ބިޒްނަސް މެނޭޖްމަންޓް، އެކައުންޓިންގ، އިންޖިނިއަރިންގ، ނަރސިންގ، ސައިކޮލޮޖީ، އަދި ކަލިނަރީ އާރޓްސް ފަދަ މުޖުތަމަޢަށް ބޭނުންތެރި ގިނަ ދާއިރާތަކަކުން ކިޔެވުމުގެ ފުރުޞަތު ވަނީ ފަހިކޮށްދީފައެވެ.
ވިލާ ކޮލެޖަކީ ރާއްޖޭގައި ތިބެގެން ބައިނަލްއަޤްވާމީ ފެންވަރުގެ ތަޢުލީމު ހޯދުމަށް އޮތް އެންމެ އިތުބާރު ހުރި އެއް މުއައްސަސާއެވެ. އެގޮތުން އިނގިރޭސިވިލާތުގެ ޔުނިވަސިޓީ އޮފް ދަ ވެސްޓް އޮފް އިންގްލެންޑް (ޔޫ.ޑަބްލިޔު.އީ ބްރިސްޓަލް) އާއި ޕޯޓްސްމޯތް ޔުނިވަރސިޓީ، އަދި ޔުނިވަރސިޓީ އޮފް ސައިބަރޖާޔާގެ ޕްރޮގްރާމްތައް އެ ކޮލެޖުގައި ކުރިއަށް ގެންދެއެވެ. ޚާއްޞަކޮށް ޕޯޓްސްމޯތް ޔުނިވަރސިޓީއާ ގުޅިގެން ހިންގާ އިންޖިނިއަރިންގ ޕްރޮގްރާމްތަކުގެ ފަހު އަހަރުތައް އިނގިރޭސިވިލާތުގައި ފުރިހަމަކުރުމުގެ ފުރުޞަތު ދަރިވަރުންނަށް ލިބިގެންދާނެއެވެ.
ތަޢުލީމީ ފެންވަރުގެ ގޮތުން ބަލާއިރު، ވިލާ ކޮލެޖަކީ ކިއު.އެސް ސްޓާޒް ރޭޓިން ސިސްޓަމުން ފައިވް ސްޓާރ އެކްސެލެންޓް ރޭޓިންގ ލިބިފައިވާ ރާއްޖޭގެ ހަމައެކަނި މަތީ ތަޢުލީމުދޭ މުއައްސަސާއެވެ. އަދި ޓައިމްސް ހަޔާ އެޑިއުކޭޝަންގެ އިމްޕެކްޓް ރޭންކިންގްސްގައި، ފެންވަރު ރަނގަޅު ތަޢުލީމުގެ ގިންތިން ދުނިޔޭގެ އެންމެ މަތީ 100 މުއައްސަސާގެ ތެރޭގައި އެ ކޮލެޖު ހިމެނެއެވެ. 2007 ވަނަ އަހަރު ރާއްޖޭގެ ފުރަތަމަ ޕްރައިވެޓް ކޮލެޖުގެ ގޮތުގައި ފެށި މި މުއައްސަސާއިން މިހާތަނަށް 27،000 އަށްވުރެ ގިނަ ދަރިވަރުން ވަނީ ދަސްވެނިވެފަ އެވެ.
ވިލާ ކޮލެޖުގެ އެކައުންޓިން އެންޑް ފައިނޭންސް ޕްރޮގްރާމަކީ ބައިނަލްއަޤްވާމީ ގޮތުން ބޮޑެތި އިޢުތިރާފުތަކެއް ލިބިފައިވާ ޕްރޮގްރާމެކެވެ. އެގޮތުން ސީމާ (ސީ.އައި.އެމް.އޭ) އިން މެނޭޖްމަންޓް ލެވެލްއާ ހަމައަށް އެގްޒެމްޕްޝަން ދީފައިވާއިރު، އޭ.ސީ.ސީ.އޭ އިން ވަނީ މި ޕްރޮގްރާމަށް ހަ އެގްޒެމްޕްޝަން ދީފައެވެ. މިއީ ރާއްޖޭގެ ޑިގްރީއަކަށް މިހާތަނަށް އޭ.ސީ.ސީ.އޭ އިން ދީފައިވާ އެންމެ ގިނަ އެގްޒެމްޕްޝަނެވެ.
ދަރިވަރުންގެ ކިޔެވުން ބައްޓަންކޮށްފައިވަނީ މަސައްކަތުގެ މާހައުލަށް ބޭނުންވާ އަމަލީ ތަޖުރިބާ ލިބޭނެ ގޮތަށެވެ. މިގޮތުން އިންޓާންޝިޕްތަކާއި، ސިމިއުލޭޝަންތަކުގެ އިތުރުން މިއަހަރު އަލަށް ތައާރަފުކުރި "ގްރެޖުއޭޓް އިމްޕެކްޓް ސެމިސްޓަރ" އާއި "ގްރެޖުއޭޓް ލާރނިންގ ޕްރޮފައިލް" މެދުވެރިކޮށް ދަރިވަރުންގެ ހުނަރުތައް ވަޒީފާދޭ ފަރާތްތަކަށް ހާމަކޮށްދެވެއެވެ. މީގެ އިތުރުން، ދަރިވަރުންގެ ނަފްސާނީ ދުޅަހެޔޮކަމަށް "ވީ-ކެއަރ" ކައުންސެލިންގ ހިދުމަތާއި، ޒަމާނީ ޓެކްނޮލޮޖީ ހިމެނޭ ލާރނިންގ ހަބްތަކާއި ލެބޯޓަރީތައް ކޮލެޖުގައި ޤާއިމުކޮށްފައިވެ އެވެ.
ވަޒީފާ އަދާކުރާ ފަރާތްތަކަށް ލުއިފަސޭހަވާނޭހެން ގިނަ ޕްރޮގްރާމްތަކެއް އޮންލައިންކޮށް ކިޔެވުމުގެ ފުރުޞަތު ވެސް ވިލާ ކޮލެޖުން ވަނީ ހުޅުވާލާފަ އެވެ. ކޯސްތަކަށް ކުރިމަތިލާން ބޭނުންވާ ދަރިވަރުންނަށް ކޮލެޖުގެ ވެބްސައިޓް މެދުވެރިކޮށް އޮންލައިންކޮށް އެޕްލިކޭޝަން ހުށަހެޅޭނެއެވެ. އަދި އޯ ލެވެލް އާއި އޭ ލެވެލް ނަތީޖާ ފަހުން ލިބޭ ދަރިވަރުންނަށް ވެސް މި އިންޓޭކަށް ކުރިމަތިލުމުގެ ފުރުސަތު އޮންނާނެ ކަމަށް ވިލާ ކޮލެޖުން މައުލޫމާތުދެ އެވެ.
