ދުނިޔޭގެ މޫސުމަށް އަންނަ ބަދަލުތަކުގެ ސަބަބުން މި ގަރުނު ނިމެންވާއިރަށް ރާއްޖޭގެ ކަނޑުތަކުން މަސް ބޭނޭ މިންވަރު 75 ޕަސެންޓަށް ވެއްޓުމުގެ ނުރައްކާ އެބައޮތް ކަމަށް ދިރާސާއަކުން ދައްކައިފި އެވެ.
ރައްޔިތުންގެ މަޖިލީހުގެ އިގްތިސާދީ ކޮމިޓީ އާއި ތިމާވެށި ކޮމިޓީ ގުޅިގެން ބޭއްވި ބައްދަލުވުމެއްގައި މި ދިރާސާގެ ހޯދުންތައް ހުށަހެޅީ މޯލްޑިވްސް ރެޒިލިއަންޓް ރީފްސް ޖަމިއްޔާއިންނެވެ.
އެ ޖަމިއްޔާއިން ބުނީ ކަނޑުގެ ފިނިހޫނުމިން މަތިވާ ވަރަކަށް، ރާއްޖޭގެ ކަނޑުތަކުގައި އުޅޭ މަސް އައިންތައް އިންޑިއާ ކަނޑުގެ ފިނި ސަރަހައްދުތަކަށް ދަތުރުކުރާނެ ކަމަށް ލަފާކުރެވޭ ކަމަށެވެ. އަދި މި ބަދަލުތަކާ ގުޅޭގޮތުން އެކި ސަރަހައްދުތަކުގެ މަސްވެރިންގެ ތަޖުރިބާތަކާއި ކަންބޮޑުވުންތައް ހިމެނޭ ޑޮކިއުމެންޓްރީއެއް ވެސް އެ ޖަމިއްޔާއިން ކޮމިޓީގައި ދެއްކި އެވެ.
"މިތާ ތިބެ މަސް ބާނާއިރު މިތާ އަތިރިމަތީގައި، ރަށު އެ ފަރާތުގައި ފުއްޓަރު ފަރާތުން އަތިރިމަތީގައި ހުންނަ މީހާއަށް އެނގޭނެ ދޮށި އަޅައިގެން މަސް ބާނަނީ އަހަރެންކަން. އެހާ ހިސާބު ކައިރިން މަސް ބޭނީ. އެހެނެއް ކަމަކު މިހާރު މަސްވެރިކަން ކުރަން ދާން މި ޖެހެނީ ހަތްދިހަ މޭލު، އައްޑިހަ މޭލު ބޭރަށް." ޑޮކިއުމެންޓްރީގައި ވާހަކަ ދެއްކި މަސްވެރިޔަކު ބުންޏެވެ.
މަސްވެރިންގެ ތަޖުރިބާތަކަށް އަލިއަޅުވާލައި އެ ޖަމިއްޔާއިން ބުނީ، ފަރުތައް ހަލާކުވެ އެންވެރިކަން ދަތިވުމުގެ ސަބަބުން އެއް އަތޮޅުން އަނެއް އަތޮޅަށް ބޮޑު ހަރަދުކޮށްފައި ދަތުރުކުރަން ޖެހިފައިވާ ކަމަށެވެ. އަދި ކުރިން ރަށު ކައިރިން ތިލައިގައި މަސް ބޭނި ނަމަވެސް، މިހާރު މާކަނޑުގެ ދުރަށް ދަތުރުކުރަން ޖެހުމުން މަސްވެރިކަމަށް ލިބޭ ވަގުތު ކުޑަވެ ބޮޑެތި ތަކުލީފުތަކާ ކުރިމަތިލާން ޖެހިފައިވާ ކަމަށް ބުންޏެވެ.
މި ކަންބޮޑުވުންތަކާ ގުޅިގެން ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ސުވާލުކުރެއްވީ، ކަނޑުގެ އޮއިވަރު ބަދަލުވެ ދޮށީގެ މަސްވެރިކަން ހުއްޓޭ ހިސާބަށް ދާތީ، ދިވެހިން ވެސް ބޭރު ކަނޑަށް ނިކުމެ ބޮޑުދާ އަޅަންވީތޯ އެވެ. އެ ސުވާލުގެ ޖަވާބުގައި އެ ޖަމިއްޔާއިން ބުނީ ދުނިޔޭގެ އެހެން ގައުމުތަކުގެ ތަޖުރިބާއިން ދައްކަނީ އެއީ ފެއިލްވެފައިވާ ކަމެއް ކަމަށެވެ.
"ދުނިޔޭގެ އެހެން ގައުމުތަކުގައި އޮތް ޓްރެޑިޝަނަލް ފިޝަރީޒް ފަހުން ކޮމާޝަލައިޒްކުރީމަ ހަމަ ގިނަ ތަންތަނުގައި ވެސް އޮތީ ވަރަށް ބޮޑަށް ފެއިލްވެފަ. މަހުގެ ސްޓޮކް އިންތިހާއަށް ދަށްވޭ." މޯލްޑިވްސް ރެޒިލިއަންޓް ރީފްސްގެ އެގްޒެކެޓިވް ޑިރެކްޓަރު އާމިނަތު ޝާހާ ހާޝިމް ވިދާޅުވި އެވެ.
ޝާހާ ވިދާޅުވީ ބޮޑުދާ އެޅުމުން ގެއްލުން ވާނީ އާންމު ދިވެހި މަސްވެރިންނަށް ކަމަށާއި، އޭގެ ސަބަބުން ރާއްޖޭގެ ދެމެހެއްޓެނިވި މަސްވެރިކަމުގެ ބްރޭންޑާއި ބައިނަލްއަގުވާމީ އަގު ގެއްލޭނެ ކަމަށެވެ. އަދި މިކަމަށް އޮތް ހައްލަކީ ރާއްޖޭގެ ކަނޑުފަޅުގެ މަދުވެގެން 30 ޕަސެންޓް ސަރަހައްދު ހިމާޔަތްކޮށް، ގުދުރަތީ ވިލުންވެރިކަން އިތުރުކުރުން ކަމަށް އޭނާ ވިދާޅުވި އެވެ.
މޯލްޑިވްސް ރެޒިލިއަންޓް ރީފްސްއިން ފާހަގަކުރި ގޮތުގައި، އުތުރުގެ ކަންނެލި މަސްވެރިކަން މިހާރު ވަނީ މުޅިންހެން ހުއްޓުމަކަށް އައިސްފަ އެވެ. އަދި އޮޑިދޯނިފަހަރު ބޮޑެތިވެ ތެލާއި އެހެނިހެން ހިންގުމުގެ ހަރަދުތައް އިންތިހާއަށް އުފުލިފައިވާއިރު، މަސްވެރިކަން ދަށްވެ ސިނާއަތް އޮތީ ދެކޮޅުނުޖެހި ތާށިވެފަ އެވެ.
ރާއްޖޭގެ މަސްވެރިކަމުގެ ހާލަތު ދަށަށް ގޮސްފައިވާއިރު، ރަސްމީ ތަފާސްހިސާބުތަކުން ދައްކާ ގޮތުގައި މި އަހަރުގެ ފުރަތަމަ ހަ މަސްދުވަހު ކުންފުނިތަކުން މަސް ގަތް މިންވަރު ވަނީ 60 ޕަސެންޓް ދަށްވެފަ އެވެ. މިއީ ފާއިތުވި 26 އަހަރުގެ ތެރޭގައި ރާއްޖޭގެ މަސްވެރިކަން މިހާ ބޮޑަށް ދަށަށް ދިޔަ ފުރަތަމަ ފަހަރެވެ.
