އަހަރު ނިމުމާ ދިމާކޮށް ލެނޯވޯ ބްރޭންޑުގެ އެންމެ ފަހުގެ އައިއޭ ޓެކްނޮލޮޖީ އެކުލެވޭ ލެޕްޓޮޕްތަކަށް ހާއްސަ ޕްރޮމޯޝަނެއް ސިމްޑީ ޓެކްއިން މިއަދު ފަށައިފި އެވެ.
"ލެނޯވޯ އިޔާ އެންޑް ލެޕްޓޮޕް ޕްރޮމޯޝަން 2026" ގެ ނަމުގައި ކުރިއަށްގެންދާ މި ޕްރޮމޯޝަން ކުރިއަށްދާނީ ޑިސެމްބަރު 31، ގެ ނިޔަލަށެވެ.
މި މުއްދަތުގެ ތެރޭގައި ޕްރޮމޯޝަންގައި ހިމެނޭ ލެޕްޓޮޕެއް ގަންނަ ފަރާތަކަށް ހާއްސަ ހަދިޔާތަކެއް ލިބިގެންދާނެ ކަމަށް ސިމްޑީން ބުންޏެވެ. އެ ގޮތުން ކޮންމެ ލެޕްޓޮޕަކާއެކު ހިލޭ ލެނޯވޯ ބެކްޕެކެއްގެ އިތުރުން ކެނަން E470 މޮޑެލްގެ ޕްރިންޓަރެއް ލިބޭނެކަމަށް އެ ފިހާރައިން ބުންޏެވެ.
މި ޕްރޮމޯޝަންގެ ދަށުން ލެނޯވޯގެ އެންމެ ފަހުގެ ތިން މޮޑެލްއެއް ބާޒާރަށް ވަނީ ނެރެފަ އެވެ. އޭގެ ތެރޭގައި ޓަޗް ސްކްރީން އަދި 360 ޑިގްރީއަށް އަނބުރާލެވޭ ލެނޯވޯ ޕެން ހިމެނޭ އައިޑިއާ ޕެޑް5 ޓޫ އިން ވަން އަލްޓްރާ5 މޮޑެލް ހިމެނެ އެވެ.
މީގެ އިތުރުން މަތީ ފަންތީގެ މަސައްކަތްތަކަށް ހާއްސަ އައިޑިއާޕެޑް5 ޓޫ އިން ވަން އަލްޓްރާ7 މޮޑެލް އާއި، އޯއެލްއީޑީ ޑިސްޕްލޭއެއް ހިމެނޭ ލުއި ފަރުމާއެއްގެ އައިޑިއާޕެޑް ސްލިމް5 މޮޑެލް ވެސް މި ޕްރޮމޯޝަންގެ ދަށުން ލިބެން ހުންނާނެ ކަމަށް ސިމްޑީން ބުންޏެވެ.
ސިމްޑީ ގްރޫޕްގެ މާކެޓިން އެގްޒެކެޓިވް ފާތިމަތު މުޝްފާ ވިދާޅުވީ މި ޕްރޮމޯޝަނުގެ މައިގަނޑު މަގުސަދަކީ ކިޔަވާ ދަރިވަރުންނާއި އެކި ދާއިރާތަކުގެ ޕްރޮފެޝަނަލް މަސައްކަތްތެރިންނަށް އެންމެ ފަހުގެ ޓެކްނޮލޮޖީ ހެޔޮ އަގުގައި ފޯރުކޮށްދިނުން ކަމަށެވެ. އަދި މިއީ އާ އަހަރަކަށް ތައްޔާރުވާއިރު ކަސްޓަމަރުންނަށް ލިބިގެންދާނެ ވަރަށް ބޮޑު ލުޔެއްކަން އޭނާ ފާހަގަކުރެއްވި އެވެ.
މި ޕްރޮމޯޝަންގައި ހިމެނޭ ލެޕްޓޮޕްތައް ބަލާލުމުގެ ފުރުސަތު މާލެ އަދި އައްޑޫ ސިޓީގައި ހުންނަ ސިމްޑީ ޓެކްގެ ޝޯރޫމްތަކުގައި މިހާރު ވަނީ ހުޅުވާލައިފަ އެވެ.
