ގައުމީ ވޮޮލީބޯޅަ މުބާރާތުގައި ޔޫތު ނިއު ޖެނެރޭޝަން އާއި އަލްމާ ސްޕޯޓްސް ކުލަބުން ކުޅުނު ފުރަތަމަ މެޗު ކާމިޔާބުކޮށް ފެށުން ރަނގަޅު ކޮށްފި އެވެ.
ޒުވާނުންގެ މަރުކަޒު އެތެރޭ ކޯޓުގައި އިއްޔެ ހަވީރު ޔޫތު ނިއު ޖެނެރޭޝަނުން ނުކުތީ ވޮލީބޯލް އެކަޑަމީ އޮފް މޯލްޑިވްސްއާ ދެކޮޅަށެވެ. އެ މެޗު ނިއު ޖެނެރޭޝަނުން ކާމިޔާބުކުރީ 3-1 ސެޓުންނެވެ. މި މެޗުގެ ސެޓުތައް ދިޔައީ 23-25, 16-25, 25-20 އަދި 20-25 އިންނެވެ.
މި މެޗުގެ ފުރަތަމަ ސެޓުގެ ކުރީކޮޅު ނިއު ޖެނެރޭޝަނުން ލީޑުކޮށްގެން ކުޅުނު ނަމަވެސް ސެޓުގެ ވަކި ހިސާބަކުން ވޮލީބޯލް އެކަޑަމީން ވަނީ ރަނގަޅު ފައިޓެއްދީ ނިއު ޖެނެރޭޝަނަށް ޕްރެޝަރުކޮށްފަ އެވެ. އެކަމަކު ޝަހާ ޝާމިންގެ މޮޅު ކުޅުމާއެކު ޔޫތު ނިއު ޖެނެރޭޝަނުން މި ސެޓު ކާމިޔާބުކުރީ 25-23 އިންނެވެ.
މި މެޗުގެ ދެވަނަ ސެޓުގައި ވޮލީބޯލް އެކަޑަމީގެ ފަރާތުން އާދައިގެ ކުޅުމެއް ފެނުނުއިރު, އޭގެ ފައިދާ ނަގާ ޔޫތު ނިއު ޖެނެރޭޝަނުން މި ސެޓު ކާމިޔާބުކުރީ ފަސޭހަކަމާއެކު 25-16 އިންނެވެ.
މެޗުގެ ތިންވަނަ ސެޓު ފަށައިގެން ވޮލީބޯލް އެކަޑަމީން ވަނީ ލީޑުކޮށް ކުޅެފައެވެ. އަދި މި ސެޓުގައި ޔޫތު ނިއު ޖެނެރޭޝަން ކުޅުންތެރިންގެ ފަރާތުން އާދައިގެ ގޯސްތަކެއް ފެނިގެންދިޔައިރު, މި ސެޓު ވޮލީބޯލް އެކަޑަމީން ކާމިޔާބުކުރީ 20-25 އިންނެވެ. އަދި ހަތަރުވަނަ ސެޓުގައި ޔޫތު ނިއުޖެނެރޭޝަނުން ވަނީ ތިންވަނަ ސެޓުގައި ހެދުނު ގޯސްތައް ބަދަލުކޮށް 25-20 އިން ސެޓު ކާމިޔާބުކޮށްފަ އެވެ.
ރޭ ކުޅުނު ދެވަނަ މެޗުގައި އަސްދިގަ ސްޕޯޓްސް ކުލަބްގެ މައްޗަށް އަލްމާ އިން ކުރިހޯދީ ސީދާ ތިން ސެޓުންނެވެ.
އަލްމާއިން މި މެޗުގެ ހުރިހާ ސެޓެއްގައިވެސް ޖުމްލަ ގޮތެއްގަައި ތަފާތުކޮށް ފެނުނުއިރު, މި މެޗުގެ ސެޓުތައް އަލްމާއިން ގެންދިޔައީ 25-10, 25-14 އަދި 25-13 އިންނެވެ.
