ޓިއުރިން (ޑިސެމްބަރު 26) - އިޓަލީގެ ލެޖަންޑަރީ ގޯލްކީޕަރު ޖިއަންލުއީޖީ ބުފޮން ފުޓުބޯޅަ ކުޅުން ހުއްޓާލުމަށް ފަހު, ސްޕޯޓްސް ޑިރެކްޓަރުގެ ކޯސް ފުރިހަމަ ކުރަމުން އެބަ އާދެ އެވެ.
އުމުރުން 45 އަހަރުގައި ފުޓުބޯޅަ ކުޅުން ހުއްޓާލި ބުފޮން އަކީ އިޓަލީގައި އުފެދުނު އެންމެ މޮޅު ކީޕަރެވެ. އަދި ދުނިޔޭގެ ތާރީހުގައި ވެސް ފާހަގަކޮށްލެވޭ ކީޕަރަކެެވެ. އޭނާ ވަނީ 2006 ވަނަ އަހަރު އިޓަލީއާ އެކު ފީފާ ވޯލްޑް ކަޕް ވެސް ކާމިޔާބުކޮށްފަ އެވެ.
ސްޕޯޓްސް ޑިރެކްޓަ ދާއިރާއިން މަތީ ތައުލީމު ހާސިލްކުރާކަން ބުފޮން ހާމަކޮށްފައިވަނީ ސޯޝަލް މީޑިއާ މެދުވެރިކޮށެވެ. އެ ގޮތުން ސްޕޯޓްސް ޑިރެކްޓަރު ދާއިރާއިން ކިޔަވަމުން އަންނަކަން ހާމަކޮށް ބުފޮން ބުނީ މި ދާއިރާ އިން މަތީ ތައުލީމު ހާސިލްކުރަމުން އަންނަތާ ދުވަސްވެފައިވާ ކަމަށެވެ. އަދި ދާދި ފަހުން ކޯހުގެ ފަހު އިމްތިހާނު ފުރިހަމަކޮށްފައިވާ ކަމަށާއި, އިންތިޒާރު ކުރަމުން އަންނަނީ ނަތީޖާއަށް ކަމަށް ބުފޮން ވަނީ ބުނެފަ އެވެ.
ފަހު އިމްތިހާނަށް ފަހު ބުފޮން ވަނީ ތައުލީމު ހާސިލްކުރުމުގައި އެހީތެރިވި އެންމެހާ ފަރާތްތަކަށް ޝުކުރުއަދާކޮށްފަ އެވެ.
ޔުވެންޓަސްއާ އެކު، އިޓަލީ ލީގުގެ ޗެމްޕިއަންކަން 10 ފަހަރު ހޯދި ބުފޮން ކުޅުން ހުއްޓާލީ އޭނާ އެންމެ ފުރަތަމަ ކުޅުނު ކްލަބް، ޕާމާގައި ހުރެ އެވެ.
ސަތާރަ އަހަރަށް ފަހު ޔުވެންޓަސް ދޫކޮށް ބުފޮން ވަނީ ފްރާންސްގެ ޕީއެސްޖީ އަށް 2018-2019 ވަނަ ސީޒަނުގައި ކުޅެފަ އެވެ. ޕީއެސްޖީގައި އެއް ސީޒަނަށް ފަހު ބުފޮން އަލުން ވަނީ ޔުވެންޓަސް އަށް ބަދަލުވެފަ އެވެ. ޔުވެންޓަސްއާ އެކު ބުފޮންގެ އެންމެ ބޮޑު އަމާޒަކަށްވީ ޗެމްޕިއަންސް ލީގު ކާމިޔާބު ކުރުމެވެ. އެކަމަކު އެ ޓީމުގައި ހުރެ އެކަން ހާސިލްކުރެވޭ ގޮތެއްނުވި އެވެ.
