ދިރާގު ދިވެހި ޕްރިމިއާ ލީގުގައި މި ސީޒަނުގައި ވާދަކުރަމުން އަންނަ، ނޯތު ރީޖަން ލީގުގެ ޗެމްޕިއަން، ހއ. ދިއްދޫ ފުޓްބޯޅަ ޓީމާއި ސައުތު ރީޖަން ލީގުގެ ޗެމްޕިއަން، ގދ. ގައްދޫ ފުޓްބޯޅަ ޓީމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ދާއިމީ މެމްބަރުކަން ދޭން ފާސްކޮށްފި އެވެ.
މިއީ، ދިވެހި ޕްރިމިއާ ލީގު މުޅި ރާއްޖެ އަށް ފުޅާކުރަން އެފްއޭއެމްގެ މިހާރުގެ ލީޑަޝިޕުން ނިންމި ނިންމުމަށް ފަހު، އެ ފޯމެޓްގައި ކުރިއަށް އައިސް، އަތޮޅު ތެރޭގެ ޓީމުތައް ޕްރިމިއާ ލީގުގައި ކުޅެން ފުރުސަތު ލިބުމާ އެކު، އެފްއޭއެމް އިން މެމްބަރުކަން ދިން ފުރަތަމަ ފަހަރެވެ.
ދިއްދޫ އާއި ގައްދޫ އަށް އެފްއޭއެމް މެމްބަރުކަން ދޭން ފާސްކުރީ ރޭ އެފްއޭއެމްގެ އެކްސްޓްރާ އޯޑިނަރީ ކޮންގްރެސްގައި ބައިވެރިވި ހުރިހާ މެމްބަރުންގެ އިއްތިފާގުންނެވެ.
"މިއީ، ރާއްޖޭގެ ފުޓްބޯޅަ ލާމަރުކަޒީކޮށް، އަތޮޅުތަކުގެ ޓީމުތަކަށް އެސޯސިއޭޝަންގެ ނިންމުންތަކުގައްޔާއި ވާދަވެރި މުބާރާތްތަކުގައި ފުރިހަމަ ބައިވެރިވުން ކަށަވަރުކޮށްދިނުމަށް އެޅުނު ވަރަށް މުހިންމު ފިޔަވަޅެކެވެ،" އެފްއޭއެމް އިން ރޭ ނެރުނު ނޫސްބަޔާނުގައި ބުނެފައިވެ އެވެ.
އެފްއޭއެމް އިން ބުނީ، ފުޓްބޯޅައިގެ ފޯރި ގަދަ ދެ ރަށުގެ ގޮތުގައި އޮތް ގައްދޫ އާއި ދިއްދޫ އަށް ފުރިހަމަ މެމްބަރުކަން ލިބިގެންދިއުމާ އެކު، އެފްއޭއެމްގެ އިންތިހާބުގައި ވޯޓު ލުމުގެ ހައްގާއި އެފްއޭއެމް އިން ރާވާ ހިންގާ ރަސްމީ މުބާރާތްތަކާއި ހަރަކާތްތަކުގައި ބައިވެރިވުމުގެ ފުރުސަތު ފުޅާދާއިރާއެއްގައި މި ދެ ރަށަށް ލިބޭނެ ކަމަށެވެ.
އެންމެ ބޮޑު އަމާޒަކީ ރާއްޖޭގެ ހުރިހާ ސަރަހައްދެއްގައި ވެސް ފުޓްބޯޅަ ތަރައްގީކޮށް، ގައުމީ ފެންވަރުގައި ވާދަކުރުމުގެ ހަމަހަމަ ފުރުސަތު ހުރިހާ ކަންކޮޅަކަށް ވެސް ފަހިކޮށްދިނުން ކަމަށް އެފްއޭއެމް އިން ވަނީ ބުނެފަ އެވެ. އަދި، އަތޮޅު ތެރެއިން އައިސް ރާއްޖޭގެ މައި ފުޓްބޯޅަ ލީގަށް ވަންނަ ޓީމުތަކަށް، އެފްއޭއެމްގެ ދާއިމީ މެމްބަރުކަން ދިނުމަކީ، ފުޓްބޯޅަ އަށް އިތުރު ކުރިއެރުމެއް ކަމަށް ވެސް އެފްއޭއެމް އިން ދެކެ އެވެ.
