ރިސޯޓު ލީގުގެ ޗެމްޕިއަނުންގެ މެދުގައި ކުޅޭ ސުޕަ ލީގުގައި ބަރޮސް އަތުން ސަން ސިޔާމް އޮޅުވެލިން އެގްރިގޭޓަށް ބަލާއިރު ތަފާތު ބޮޑު މޮޅެއް ހޯދައިފި އެވެ.
މި ދެ ޓީމުގެ ފުރަތަމަ ލެގުގެ މެޗުން އޮޅުވެލި 2-1 އިން މޮޅުވިއިރު، އިއްޔެ ހަވީރު ކުޅުނު ދެ ވަނަ ލެގުގެ މެޗުން އޮޅުވެލި ކުރިހޯދީ 5-1 އިންނެވެ. އެހެންކަމުން، އޮޅުވެލި އަށް އެގްރިގޭޓަށް ބަލާއިރު ކުރި ލިބުނީ، 7-2 އިންނެވެ.
އިއްޔެގެ މެޗުގައި އޮޅުވެލީގެ ލަނޑުތައް ޖެހީ، މުހައްމަދު ވިގާމް ދެ ލަނޑާއި، އަބްދުﷲ ސިނާން، އަލީ ޝިއާއު އަދި މުހައްމަދު ޔައިޝް ވަހީދު ކޮންމެ ކުޅުންތެރިއަކު ގޯލެކެވެ. މި މެޗުގައި، ބަރޮސްގެ ހަމައެކަނި ލަނޑު ޖެހީ، ހަސަން ސަލީމް އެވެ. މި މެޗުގައި ބަރޮސްގެ މުހައްމަަދު ނާހިލް އަށް ރަތް ކާޑެއް ދެއްކި އެވެ.
ރިސޯޓް ސުޕަ ލީގުގައި ދެން ވާދަކުރަނީ، ނ. ޒޯނުގެ ޗެމްޕިއަން، ވެލާ ޕްރައިވެޓް އައިލެންޑް، ބ. ޒޯންގެ ޗެމްޕިއަން، ފިނޮޅު މޯލްޑިވްސް، އަރި ޒޯންގެ ޗެމްޕިއަން، ކޮންރެޑް މޯލްޑިވްސް ރަންގަލި އައިލެންޑް އަދި ދ. ޒޯންގެ ޗެމްޕިއަން، ސެއިންޓް ރެޖިސް ވޮއްމުލި އެވެ.
ދެން، ރިސޯޓް ސުޕަ ލީގުގައި އޮތީ، ވެލާ އާއި ފިނޮޅުން ބައްދަލުކުރާ ހޯމް އެންޑް އަވޭ މެޗާއި ކޮންރެޑް އާއި ވޮއްމުލިން ކުޅޭ ހޯމް އެންޑް އަވޭ މެޗެވެ.
ހޯމް އެންޑް އަވޭ މެޗުތައް ނިމުމަށް ފަހު، އެގްރިގޭޓުން އެންމެ ރަނގަޅު ނަތީޖާ ނެރޭ ޓީމަކަށް ފައިނަލުގެ ސީދާ ޖާގައެއް ލިބޭނެ އެވެ. އަދި، ދެ ވަނަ އަށް އެންމެ ރަނގަޅު އެގްރިގޭޓް ނެރޭ ޓީމަކާއި ތިން ވަނަ އަށް އެންމެ ރަނގަޅު އެގްރިގޭޓް ނަތީޖާ ހޯދާ ޓީމެއްގެ މެދުގައި ސެމީ ފައިނަލް މެޗެއް ކުޅޭނެ އެވެ.
ސެމީ ފައިނަލް އޮތީ މި މަހު 27 ވަނަ ދުވަހު އެވެ. އަދި، ފައިނަލް އޮތީ މި މަހު 29 ވަނަ ދުވަހު އެވެ.
މިދިޔަ އަހަރުގެ ރިސޯޓް ސުޕަ ލީގުގެ ފައިނަލުގައި ޖޯލި މޯލްޑިވްސްގެ މައްޗަށް ޕެނަލްޓީ ޖަހައިގެން ކުރިހޯދައި، ކޮންރެޑް މޯލްޑިވްސް ރަންގެލި އައިލެންޑުން މުބާރާތުގެ ޗެމްޕިއަންކަން ހޯދި އެވެ. ޖުމެއިރާ އޮޅަހާލި އައިލެންޑްގައި ކުޅުނު ފައިނަލް މެޗުގެ ފުރިހަމަ ވަގުތު ހަމަވިއިރު، މެޗުގެ ނަތީޖާ ވަނީ 1-1 އިން އެއްވަރުވެފަ އެވެ. އަދި، ނަތީޖާ ނެރެން ޕެނަލްޓީ ޖަހަން ޖެހުނުއިރު، ކޯންރެޑުން ވަނީ ހަތަރު ޕެނަލްޓީ ކާމިޔާބުކޮށްފަ އެވެ. ޖޯލި އަށް ދެ ޕެނަލްޓީ ވައްދާލެވުނުއިރު، ޕެނަލްޓީ ނިމުނީ، 4-2 އިން ކޮންރެޑް މޮޅުވެގެންނެވެ.
