މެންޗެސްޓާ (އޮކްޓޫބަރު 16) - އާޖެންޓީނާގެ ޑިފެންޑަރު، ލިސަންޑްރޯ މާޓިނޭޒް، އެ ކްލަބްގެ ސީނިއާ މެނޭޖްމަންޓަށް ފާޑުކިޔައި ދިން އިންޓަވިއުއެއްގެ މައްސަލަ ހޫނުވެއްޖެ އެވެ.
އަންގާރަ ދުވަހުގެރޭ ޗެމްޕިއަންސް ލީގުގައި އެތުލެޓިކޯ މެޑްރިޑް އަތުން 2-0 އިން ޔުނައިޓެޑް ބަލިވި މެޗަށް ފަހު ދިން އިންޓަވިއުއެއްގައި މާޓިނޭޒް ވަނީ ޔުނައިޓެޑްގެ ވެރިންނަށް ފާޑުކިޔައިފަ އެވެ. އެ ގޮތުން، މާޓިނޭޒް ބުނެފައިވަނީ، ތަކުރާރުކޮށް ކްލަބްގެ ކޯޗުން ބަދަލުކުރުމަކީ ކްލަބްގެ ހުރި މައްސަލަތައް ހައްލުވާނެ ކަމެއް ނޫން ކަމަށެވެ. އަދި، ޔުނައިޓެޑްގައި މި ވަގުތު އޮތީ ޗެމްޕިއަންސް ލީގުގައި ވާދަކުރެވޭނެ ވަރުގެ ސްކޮޑެއް ނޫން ކަމަށާއި ކްލަބްގެ ހުރި މައްސަލަތަކުގައި ޒިންމާނަގަން ޖެހޭ މީހުން އެކަން ކަން ރަނގަޅަށް ބަަލައި ކުރަން ޖެހޭ ކަންކަން ކުރުމުން ނޫނީ ކުރިއަށް ނުދާނެ ކަމަށް ބުނެ، މާޓިނޭޒް ވަނީ ފާޑުކިޔައިފަ އެވެ.
ރިޕޯޓްތައް ބުނާގޮތުން، ޔުނައިޓެޑްގެ މެނޭޖްމަންޓުން ވަނީ މާޓިނޭޒާ ބައްދަލުކޮށްފަ އެވެ. އަދި، އޭނާ އަށް ޖޫރިމަނާއެއް އަންނާނެ ކަމަށް ބެލެވޭއިރު، އެ ބައްދަލުވުމާ ގުޅޭގޮތުން، މާޓިނޭޒް ވަނީ ސޯޝަލް މީޑިއާގައި ބަޔާނެއް ނެރެފަ އެވެ.
އެ ބަޔާނުގައި މާޓިނޭޒް، 28، ބުނެފައިވަނީ، ކްލަބްގެ މެނޭޖްމަންޓާ އެކު ބޭއްވީ ވަރަށް ޕޮޒިޓިވް ބައްދަލުވުމެއް ކަމަށާއި ކުރިން އިންޓަވިއުގައި ދެކެވުނު ވާހަކަތަކަކީ، ކްލަބްގެ ހައްގުގައި އެ ވަގުތު ޖަޒުބާތުގައި ޖެހިގެން ކުރެވުނު ކަމެއް ކަމަށެވެ. އަދި، އެ ވަގުތު ވާހަަކަތައް ގެންދެވުނީ އެންމެ ރަނގަޅަށް ނޫން ކަމަށާއި އެކަމާ މައާފަށް އެދޭ ކަމަށް ވެސް މާޓިނޭޒް ވަނީ ބުނެފަ އެވެ.
އަޔަކްސް އަށް ކުރިން ކުޅުނު މާޓިނޭޒް، ޔުނައިޓެޑާ އެކު ކޮންޓްރެކްޓް އޮތީ މި ސީޒަނުގެ ނިޔަލަށެވެ. ޔުނައިޓެޑުން ބޭނުންނަމަ، އެއްބަސްވުން އިތުރު އެއް އަހަރަށް އާ ކުރުމުގެ އިހުތިޔާރު އެބައޮތެވެ. އެކަމަކު، މި އިންޓަވިއު މައްސަލައިގައި ޔުނައިޓެޑުން މިހާރު ވިސްނަނީ، މާޓިނޭޒް މި ސީޒަނަށް ފަހު ދޫކޮށްލުމަށް ކަމަށް ރިޕޯޓްތައް ބުނެ އެވެ.
މި އިންޓަވިއުއާ ގުޅިގެން، ޔުނައިޓެޑްގެ ކުރީގެ ދެ ކުޅުންތެރިން ކަމަށްވާ ވޭން ރޫނީ އާއި ރޯއީ ކީންގެ ފާޑުކިޔުން މާޓިނޭޒް އަށް ވަނީ އަަމާޒުވެފަ އެވެ.
