ޑުބާއީ (ޑިސެމްބަރު 20) - ކުރިއަށް އޮތް އިންޑިއަން ޕްރިމިއާ ލީގު (އައިޕީއެލް)ގެ އޯކްޝަންގައި އޮސްޓްރޭލިއާގެ ދެ ފާސްޓް ބޯލަރުން ކަމަށްވާ މިޝެލް ސްޓާކާއި ޕެޓް ކަމިންގްސް ރެކޯޑް އަގުތަކެއްގައި އެ ލީގުގެ ދެ ޓީމަކާ ގުޅިއްޖެ އެވެ.
މި އަހަރު އިންޑިއާގައި އޮތް އައިސީސީ ކްރިކެޓް ވޯލްޑް ކަޕްގައި ސްޓާކް އާއި ކަމިންގްސް ވަނީ ވިދާލައިފަ އެވެ. އެ މުބާރާތް އޮސްޓްރޭލިއާ ކާމިޔާބުކުރިއިރު ޓީމުގެ ކެޕްޓަންކަން ކުރީ ކަމިންގްސް އެވެ.
ޑުބާއީގައި އިއްޔެ ކުރިއަށްދިޔަ އައިޕީއެލްގެ އޯކްޝަންގައި އެންމެ ފުރަތަމަ ރެކޯޑް ހެދީ ކަމިންގްސް އެވެ. ސަން ރައިޒާސް ހައިދަރުއާބާދުން ކަމިންގްސް އެ ޓީމަށް ގެންދިޔައީ 2.47 މިލިއަން ޑޮލަރުގެ މުސާރަ އަކަށެވެ. މިއީ އެ ވަގުތު، އައިޕީއެލްގެ ޓީމަކުން ކުޅުންތެރިއެއްގެ މުސާރަ އަށް ދިން އެންމެ ބޮޑު އަގެވެ.
އެކަމަކު، އޭގެ ފަހުން، ކޮލްކަޓާ ނައިޓް ރައިޑާސް އިން ވަނީ ކަމިންގްސްގެ ރެކޯޑް މުގުރާލައި، 2.98 މިލިއަން ޑޮލަރުގެ މުސާރަ އަކަށް ސްޓާކް އެ ޓީމަށް ގެނެސްފަ އެވެ.
މީގެ ކުރިން އައިޕީއެލްގެ އެންމެ މުސާރަ ބޮޑު ކުޅުންތެރިއެއްގެ ގޮތުގައިހުރީ އިންގްލެންޑްގެ ސޭމް ކުރެން އެވެ. ޕަންޖާބް ކިންގްސް އިން މިދިޔަ ސީޒަންގައި ކުރެން ގެންދިޔައީ 2.23 މިލިއަން ޑޮލަރުގެ މުސާރަ އަކަށެވެ.
ސްޓާކް އެންމެ ފަހު އައިޕީއެލްގައި ކުޅުނީ މީގެ އަށް އަހަރު ކުރިންނެވެ. ޝެޑިއުލް ބާރުބޮޑުވާތީ މިދިޔަ ސީޒަންގެ އައިޕީއެލްގައި ކަމިންގްސް ނުކުޅެ އެވެ.
އައިޕީއެލްގެ އޯކްޝަންގައި ސްޓާކް އާއި ކަމިންގްސްގެ މުސާރަ ފެށީ 240،000 ޑޮލަރުންނެވެ. މިއީ އައިޕީއެލްގެ އޯކްޝަންގެ އެންމެ މަތީ ލެވެލްގެ ދެ ކުޅުންތެރިންނެެވެ.
އޯކްޝަންގައި ތިން ވަނަ އަށް އެންމެ ބޮޑު މުސާރައެއް ލިބުނީ ނިއު ޒީލެންޑްގެ އޯލް ރައުންޑަރ ޑެރީލް މިޗެލްއެވެ. މިޗެލް އަށް ޗެންނާއީ ސުޕަ ކިންގްސް އިން 1.6 މިލިއަން ޑޮލަރުގެ މުސާރައެއް ދޭނެއެވެ.
މި ފަހަރުގެ އޯކްޝަންގައި 300 އަށްވުރެ ގިނަ ކުޅުންތެރިން ބައިވެރިވިއެވެ. އަންނަ އަހަރު އައިޕީއެލް ކުރިއަށްދާނެ ކަމަށް ބެލެވެނީ މާޗު މަހު އެވެ.
