ވޭތުވެދިޔަ ދެ ހަފުތާތެރޭގައި ހިންގި އޮޕަރޭޝަންގައި މަސްތުވާތަކެތީގެ މައްސަލަތަކުގައި ހައްޔަރުކުރި ދިވެހިންނަށް ވުރެ ބިދޭސީންގެ އަދަދު އިތުރުވެއްޖެ އެވެ.
ނޮވެމްބަރު 29 އިން ފެށިގެން ފުލުހުންނާއި އިމިގްރޭޝަން، ކަރެކްޝަންސް އަދި ކަސްޓަމްސް ގުޅިގެން ކުރިޔަށް ގެންދާ އޮޕަރޭޝަންގައި މި މަހުގެ 16 ގެ ނިޔަލަށް މަސްތުވާތަކެތީގެ މައްސަލަތަކާ ގުޅިގެން ގާތްގަނޑަކަށް 70 މީހުން ހައްޔަރުކުރިކަން "އަދަދު" ނޫހަށް ވަނީ އެނގިފަ އެވެ.
އެ އޮޕަރޭޝަންގެ ތަފުސީލު މައުލޫމާތު އެއްވެސް އިދާރާއަކުން ރަސްމީކޮށް އަދި ހާމަ ނުކުރިޔަސް، އޮޕަރޭޝަންގެ މައުލޫމާތު އެނގޭ މީހަކު ނަން ނުޖެހުމަށް ޝަރުތުކޮށް ވިދާޅުވީ މަސްތުގެ ހާލުގައި ތިބި 28 ބިދޭސީއަކު ހައްޔަރުކުރިއިރު، މަސްތުވާތަކެއްޗާއެކު ހަތް ބިދޭސީއަކު ހައްޔަރު ކުރި ކަމަށެވެ.
އޮޕަރޭޝަންގެ އެ މުއްދަތުގައި މަސްތުވާތަކެއްޗާއެކު 31 ދިވެހިން ހައްޔަރުކުރިއިރު، މަސްތުގެ ހާލުގައި ތިއްބައި ހައްޔަރުކުރީ ތިން ދިވެހީން ކަމަށް އޭނާ ވިދާޅުވި އެވެ.
titledesc
ވޭތުވެދިޔަ ދެ ހަފުތާ ތެރޭގައި 5.5 މިލިއަން ރުފިޔާގެ މަސްތުވާތަކެތި އަތުލައިގަނެ، އަދި ގަވާއިދާ ހިލާފަށް އުޅެމުންދިޔަ 53 ބިދޭސީއަކު ބެލުމުގެ ދަށަށް ގެނެސްފައިވާ ކަމަށް ހޯމްލޭންޑު ސެކިއުރިޓީ މިނިސްޓަރު އަލީ އިހުސާން ރޭ ވަނީ ވިދާޅުވެފަ އެވެ.
އަދަދަށް އެނގިފައިވާ ގޮތުގައި މި އޮޕަރޭޝަންގައި ހައްޔަރުކުރި ބައެއް ބިދޭސީން ވަނީ ޑީޕޯޓުކޮށްލައިފަ އެވެ.
މިހާރު ރާއްޖޭގައި ތިބީ 90،000 ބަންގްލަދޭޝް މަސައްކަތްތެރިން ކަމަށް ސަރުކާރުން ބުނެފި އެވެ.
