ވައިގެ މަގުން ރާއްޖެއަށް އެތެރެކުރަން އުޅުނު 3.8 ކިލޯގެ މަސްތުވާތަކެތި މޯލްޑިވްސް ކަސްޓަމްސް ސާވިސް އިން އަތުލައިގެންފި އެވެ.
ކަސްޓަމްސްއިން ބުނީ، އެ ތަކެތި އަތުލައިގެންފައި ވަނީ މިދިޔަ ހުކުރު ދުވަހު ކަމަށެވެ. އަތުލައިގެންފައި ވަނީ ކެނެބިސްކަމަށް ވެސް އޭނާ ވިދާޅުވި އެވެ.
އެ ތަކެތި ފެނިފައި ވަނީ ވައިގެ މަގުން ރާއްޖެއަށް ގެނެސްފައިވާ އެއާފްރައިޓް ޝިޕްމެންޓެއްގެ ތެރެއިން ކަމަށް ކަސްޓަމްސްއިން ބުންޏެވެ. އަދި، އެ ޝިޕްމެންޓު ބަލައިފާސްކުރީ އޭގެ ތެރޭގައި މަސްތުވާތަކެތި ހުރިކަމަށް ޝައްކު ކުރެވިގެން ކަމަށް ވެސް އެ މުއައްސަސާއިން ބުންޏެވެ.
ވައިގެ މަގުން ރާއްޖެއަށް އެތެރެކުރަން އުޅެނިކޮށް 3.8 ކިލޯގެ ކެނެބިސް ކަސްޓަމްސްއިން އަތުލައިގެންފައިވާއިރު، ޕޯސްޓު މެދުވެރިކޮށް ރާއްޖެއަށް އެތެރެކުރަން އުޅެނިކޮށް މިދިޔަ ހަފުތާގައި ވެސް ވަނީ 3.2 ކިލޯގެ ކެނެބިސް އަތުލައިގެންފަ އެވެ.
ނަމަވެސް، އެ ދެ މައްސަލައާ ގުޅިގެން ވެސް މީހަކު ހައްޔަރުކުރިކަމެއް ނުވަތަ ނޫންކަމެއް މިހައިތަނަށް ފުލުހުން ހާމައެއް ނުކުރެ އެވެ.
