ފުޅާ ދާއިރާއެއްގައި މަސްތުވާތަކެތި ވިޔަފާރިކުރާ ކަމުގެ ތުހުމަތުގައި ވޮލީ ކުޅުންތެރިޔާ، ވ. ކެޔޮދޫ، ދޭލިޔާގެ، އަހްމަދު ފާޒިލް، 31، މިދިޔަ ބުރާސްފަތި ދުވަހު ކެޔޮދޫއިން ހައްޔަރުކޮށްފި އެވެ.
ފުލުހުން ބުނީ ޑްރަގް އެންފޯސްމަންޓާއި، ކައުންޓާ ނާކޮޓިކްސް އިންޓެލިޖެންސާއި، ވ. އަތޮޅު ފުލުހުން ގުޅިގެން ހިންގި މި އޮޕަރޭޝަންގައި ފާޒިލް މަސްތުވާތަކެތި ވިއްކައި ވިޔަފާރިކުރާ ކަމަށް ތުހުމަތުކުރެވޭ ދެ ގެއެއް ބަލައި ފާސްކޮށް، މަސްތުވާތަކެތި ކަމަށް ބެލެވޭ 265.01 ގްރާމުގެ ތަކެތި ފެނިފައިވާ ކަމަށެވެ.
މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 10 ދުވަހަށް ބަންދުކުރުމަށް ވަނީ އަމުރުކޮށްފަ އެވެ.
މާރާމާރީއެއްގެ މައްސަލައެއްގައި މަޝްހޫރު ވޮލީ ކުޅުންތެރިންތަކެއް ކެޔޮދޫއިން ހައްޔަރުކޮށްފި
ވ. ކެޔޮދޫގައި 58 އަހަރުގެ މީހަކާ މާރާމާރީ ހިންގި މައްސަލައެއްގައި، ގައުމީ ވޮލީ ޓީމުގެ ކުޅުންތެރިޔާ ފައިރޫޒާއި ގައުމީ ޓީމުގެ ކުރީގެ ކުޅުންތެރިޔާ ފާޒިލް ވަނީ ހައްޔަރުކޮށްފައި. މި މާރާމާރީއާ ގުޅިގެން ހައްޔަރުކުރި މީހުންގެ ބަންދަށް ކޯޓުން ވަނީ ތިން ދުވަހާއި ފަސް ދުވަހުގެ މުއްދަތެއް ދީފައި.
މިދިޔަ މަހު ކެޔޮދޫގައި ހިންގި މާރާމާރީއެއްގެ މައްސަލައެއްގައިވެސް ފާޒިލް ހައްޔަރުކުރި އެވެ. އެ މައްސަލައިގައި އޭނާގެ އިތުރުން ގައުމީ ވޮލީ ޓީމުގެ ކުޅުންތެރިޔާ އަހްމަދު ފައިރޫޒް ވެސް ހައްޔަރުކުރި އެވެ.
ފައިރޫޒްއަކީ ގައުމީ ވޮލީ ޓީމުގައި ހިމެނި ފުލް ޓީމަށް ކުޅޭ ކުޅުންތެރިޔެކެވެ. އޭގެއިތުރުން އޭނާއަކީ ސަރުކާރު ހިންގާ ޕީއެންސީގެ ކެޔޮދޫ ދާއިރާގެ ޒުވާނުންގެ ރައީސް އެވެ.
މާރާމާރީގެ މައްސަލައިގެ އިތުރުން މަސްތުވާަތަކެތީގެ މައްސަލަވެސް ފުލުހުން ގެންދަނީ ތަހުގީގު ކުރަމުންނެވެ.
