އައްޑޫ ސިޓީގެ ހިތަދޫގައި ގްރޫޕް ހަދައިގެން އެއްވެ އުޅޭ ހިސާބެއް ކަމަށްވާ އުސްގަނޑު ބީޗު ސަރަހައްދުން މިއަދު ހަވީރު ފުލުނުން ތޫނު ހަތިޔާރާއި މާރާމާރީ ހިންގުމަށް ބޭނުންކުރާ އެހެނިހެން ތަކެތި ހޯދައިފި އެވެ.
މިއީ އައްޑޫގައި ގްރޫޕް މާރާމާރީ އިތުރުވުމާ ގުޅިގެން ފުލުހުން ހިންގަމުން އަންނަ ހާއްސަ އޮޕަރޭޝަނެއްގައި ހޯދި އެއްޗިއްސެވެ. މި ތަކެތި ފެނުނީ އެ ސަރަހައްދުގެ އެކި ހިސާބުތަކުގައި ފޮރުވާފައި ހުއްޓަ އެވެ.
ފުލުހުން ހޯދި އެއްޗެހީގެ ތެރޭގައި މާރާމާރީ ހިންގުމަށް ތައްޔާރުކޮށްފައި ހުރިކަމަށް ބެލެވޭ ތޫނު ހަތިޔާރާއި، މޫނު ނިވާކުރުމަށް ބޭނުންކުރާ މާސްކާއި، އަންގި އާއި، އަންނައުނު އަދި އެހެނިހެން ބައެއް އާލާތްތައް ހިމެނެ އެވެ.
މި އޮޕަރޭޝަން ހިންގީ ހިތަދޫ ޕޮލިސް ސްޓޭޝަނާއި، ސައުތު ޕޮލިސް ސީރިއަސް ކްރައިމް ސެލް އާއި، ސްޕެޝަލިސްޓް އޮޕަރޭޝަންސް އަދި އިންޓެލިޖެންސް ގުޅިގެންނެވެ.
ފުލުހުން ބުނީ ގްރޫޕު މާރާމާރީތަކާ ގުޅިގެން، ގޭންގު ހަދައިގެން މާރާމާރީ ހިންގާ މީހުން ހުއްޓުވުމަށް ހާއްސަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން، ތުހުމަތުކުރެވޭ ގޮތަށް ގްރޫޕު ހަދައިގެން އެއްވެ ތިބޭ މީހުންނާއި، އާންމުކޮށް މީހުން އެއްވާ ތަންތަނާއި ގޭބިސީތައް ވެސް އަންނަނީ ފާސްކުރަމުންނެވެ.
މާރާމާރީތަކާ ގުޅިގެން އިއްޔެ ހައްޔަރުކުރި މީހާ ޝަރީއަތް ނިމެންދެން މިއަދު ބަންދު ކުރުމާއެކު, މިކަމުގައި ޖުމްލަ ބަންދުކުރި މީހުންގެ އަދަދު 11 އަށް ވަނީ އަރައިފަ އެވެ.
ދުވަސްތަކަކަށްފަހު އައްޑޫގައި އަނެއްކާވެސް ގޭންގު މާރާމާރީތައް އިތުރުވެފައިވާއިރު، މިދިޔަ އާދީއްތަ ދުވަހުން ފެށިގެން ފުލުހުން ކުރިއަށް ގެންދާ އޮޕަރޭޝަނުގައި ހައްޔަރުކުރީ ޖުމްލަ 12 މީހުންނެވެ. އޭގެ ތެރެއިން އެކަކު ބަންދުން ދޫކޮށްލާފައި ވާއިރު, ދެން ތިބި 11 މީހުން ވަނީ ޝަރީއަތް ނިމެންދެން ބަންދުކޮށްފަ އެވެ.
ބަންދުކޮށްފައި ތިބި މީހުންގެ ތެރޭގައި ހިމެނެނީ 18 އަހަރުގެ މީހަކާއި، 19 އަހަރުގެ ދެ މީހުންނާއި، 20 އަހަރުގެ ތިން މީހުންނާއި، 21 އަހަރުގެ މީހަކާއި 23 އަހަރުގެ ތިން މީހުންނެވެ. އަދި މިއަދު ބަންދުކުރި 19 އަހަރުގެ މީހާ އެވެ.
މިދިޔަ ހަފުތާގެ ތެރޭގައި އެ އަތޮޅުގައި ވަނީ މާރާމާރީ ހިންގައި ދެ މީހަކު ވަރަށް ބޮޑަށް ޒަހަމު ކޮށްލައިފަ އެވެ. އޭގެ ތެރެއިން މިދިޔަ އާދީއްތަ ދުވަހު ޒަހަމުކޮށްލި 20 އަހަރުގެ ޒުވާނާގެ ހާލު ސީރިއަސްވެ، އަންނަނީ މާލެއަށް ގެނެސް އައިޖީއެމްއެޗް ހޮސްޕިޓަލުގައި ފަރުވާ ދެމުންނެވެ.
