ރައްޔިތުންގެ މަޖިލީހުގެ ރައީސް ކަމުން ވަކިކުރަން ގިނަ މެމްބަރުންތަކެއް މަސައްކަތް ފަށްޓަވައިފި ނަމަ މަގާމުގައި ދެމިނުހުންނަވާނެ ކަމަށާއި އެފަދަ ކަމެއްގައި މަޖިލިސް ނުހުއްޓޭނެ ކަަމަށް މަޖިލީހުގެ އާ ރައީސް މުހައްމަދު އަސްލަމް، މިއަދު ވިދާޅުވެއްޖެ އެވެ.
ނަވާރަ ވަނަ ރައްުޔިތުންގެ މަޖިލީހުގެ ދައުރު ފެށުނީއްސުރެ މަޖިލީހުގެ ރައީސްކަމުގައި ހުންނެވުމަށް ފަހު ރާއްޖޭ ކުރީގެ ރައީސް މުހައްމަދު ނަޝީދު މަގާމުން އިސްތިއުފާ ދެއްވީ މިދިޔަ ހޯމަ ދުވަހު އެވެ. އެމަނިކުފާނު އިސްތިއުފާ ދެއްވީ މަގާމުން ވަކިކުރަން އެމްޑީޕީން ދެވަނަ ފަހަރަށް ހުށަހެޅި ގަރާރު ކުރިއަށް ނުގެންދެވި، އެތައް ދުވަހެއް ހޭދަވުމަށް ފަހުގަ އެވެ.
މަޖިލީހުގެ ގަވާއިދު، ވަކި ގޮތަކަށް މާނަކޮށް އެ މައްސަލަ އެޖެންޑާ ނުކުރާތީ އެމްޑީޕީން ސުޕްރީމް ކޯޓަށް ދުސްތޫރީ މައްސަލައެއް ވެސް ހުށަހެޅި އެވެ. ސުޕްރީމް ކޯޓުން އެ މައްސަލަ ނިންމީ އެމްޑީޕީއާ އެއްކޮޅަށެވެ.
މަޖިލީހުގެ ރައީސް ކަމަށް އަސްލަމް ވަޑައިގެންނެވީ ނަޝީދު އިސްތިއުފާ ދެއްވުމުންނެވެ.
ރައްޔިތުންގެ މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލެއްގައި އެހީ މަޖިލީހުގެ ރައީސްކަމުން ނަޝީދު ވަކިކުރުމުގެ މައްސަލަ ދިގުލައި ދިޔައީ "މަޖިލީހުގެ ގަވައިދުގައި ހުރި އުނިކަމެއްގެ ސަބަބުން ކަމަށް ވާއިރު އެފަދަ ކަމެއް ތަކުރާރުވިޔަ ނުދިނުމަށް ޓަކައި ގަވާއިދު އިސްލާހުކުރަން ކިހާ އިސްކަމެއް ދެއްވާނަންތޯ" އެވެ.
އެ ސުވާލުގެ ޖަވާބުގައި އަސްލަމް ވިދާޅުވީ މަޖިިލީހުގެ މަސައްކަތް ހުއްޓެން މެދުވެރިވާ ސަބަބަކީ ގާނޫނެއް ގަވާއިދެއް ނެތުމެއް ނޫން ކަމަށާއި އެކަންކަމުގައި އަމަލުކުރެވޭ ގޮތް ކަމަށެވެ.
"މިސާލަކަށް މަޖިލީހުގެ 44 މެމްބަރުންނަށް ވުރެ ގިނަ މެމްބަރުން ސޮއިކޮށްފައި އަޅުގަނޑުގެ އިތުބާރު ނެތްކަމުގެ މައްސަލައެއް މިއަދު މި ގަޑީގައި ލިޔަސް، އަަޅުގަނޑަށް، އެ މައްސަލަ ލައިފިކަން އެނގޭ ހިސާބުން، މަޖިލިސް އިން ނުކުންނާނީ އަޅުގަނޑުގެ އިސްތިއުފާގެ ސިޓީގައި ސޮއިކޮށްފައި،" އަސްލަމް ވިދާޅުވި އެވެ.
އެހެން ނަމަވެސް އެފަދަ ކަންތައްތަކުގައި އެކި ބޭފުޅުން އަމަލުކުރައްވާނީ އެކި ގޮތްގޮތަށް ކަމަށް ވެސް އެމަނިކުފާނު ވިދާޅުވި އެވެެ.
"އެ ސުވާލު އެގޮތަށް އަމާޒުކުރައްވާ ކަމަށް ވަނީ ނަމަ، [ދަންނަވަން އޮތީ] އަޅުގަނޑާ ހެދީ އެއް މަޖިލިސް ހުއްޓިގެން ދާކަށް ނުޖެހޭނެ،" އަސްލަމް ވިދާޅުވި އެވެ.
