މޯލްޑިވިއަން ޑިމޮކްރަޓިކް ޕާޓީގެ ޗެއާޕާސަން ކުރީގެ ރައީސް މުހައްމަދު ނަޝީދު ލިޔުއްވި ކުރުވާހަކަ، "80ގެ ކުރީކޮޅު" ފޮތް ނެރެފި އެވެ.
މި ފޮތް ނެރެފައިވަނީ މިރޭ ދޮންމަނިކު ރެސްޓޯރަންޓުގައި ބޭއްވި ހަފްލާއެއްގަ އެވެ. މި ފޮތް ނެރެދެއްވީ ގ.ކެނެރީގެ، ޒުހައިރާ އުމަރު އެވެ. އެއީ އެމަނިކުފާނުގެ ބޮޑުދައިތަ އެވެ. މި ފޮތް ވިއްކަނީ 250ރ. އަށެވެ.
"މި ފޮތް، މި ވާހަކަތައް އަޅުގަނޑު ލިޔެފައި މި ހުރީ 80 ގެ ވަރަށް ފަހުކޮޅު 90 ގެ ކުރީކޮޅު. މީގައި ޖަހާފައި އެބައޮތް 80 ގެ ކުރީކޮޅޭ. އެއީ ދެވަނަ ދެލިކޮޕީއިން ނުކުތް ބަދަލެއް. މި ވާހަކަތައް ލިޔުނީ 94 ގައި އަޅުގަނޑު ޖަލުން ގެއަށް ގެނެސް ގޭބަންދަށް ބަދަލުކުރިތާ،" ނަޝީދު ވިދާޅުވި އެވެ.
ފޮތުގައި އޮތީ ފަސްވާހަކަ އެވެ. އެއީ "ގައުމީ މަޝްރޫއު"، "މޫސަބަރު"، "ޗާލާ ޒަމާނާ"، "ރީތި ހަދިޔާ" އަދި "ހިތާއި ހިތުގެ ގުޅުން" އެވެ.
"ހިތާ ހިތުގެ ގުޅުން": ކުރުސީ އަކީ ނަޝީދުގެ ކާކު؟
"ބުމާގައި ހީވަނީ އެގްރިކަލްޗަރުން މުޑުވައްކޮށްގެން އިސްތަށި އިންދާ ހައްދާފައި ހުރިހެނެވެ... ހަދީޖާ ހީލި އެވެ. ނޮވެމްބަރު އެގާރަ ބާރައޭ ކުރުސީ ހިތަށް އެރި އެވެ. ހިނިތުންވުމުން ހީވީ ހަވާއަރުވާލިހެނެވެ."
މިރޭ ނަޝީދު ހާމަކުރެއްވި ގޮތުގައި 1989 އިން ފެށިގެން 2008 އާ ހަމައަށް އެމަނިކުފާނުގެ ހަޔާތުގެ މައްޗަށް ބިނާކޮށް ފޮތެއް ލިޔެފައިވާނެ އެވެ. އިނގިރޭސި ބަހުން ލިޔެފައިވާ އެ ފޮތް މިހާރު އޮތީ ޕަބްލިޝަރަކަށް ފޮނުވާފައި ކަމަށް ނަޝީދު ވިދާޅުވި އެވެ.
ނަޝީދުއަކީ ކުޅަދާނަ ލިޔުންތެރިއެކެވެ. އެމަނިކުފާނު ސިޔާސީ ދާއިރާއަށް ނުކުމެވަޑައިގަތުމުގެ ކުރިން ނޫސްވެރިކަން ކުރައްވައި ފޮތް ލިޔުއްވި އެވެ.
ސިޔާސީ މަސައްކަތުގައި އުޅުއްވަމުން ވެސް ފޮތް ލިޔުއްވި އެވެ. އޭގެ ތެރޭގައި "އެއްބަސްވެވޭ އިންގިލާބު"، "ދެ ރަދުން"، "ކިއްލާ މާލެ" އަދި "ދަގަނޑު ދަހަނާ" ފަދަ ފޮތްތައް ހިމެނެ އެވެ.
