ނުކުޅެދުންތެރިކަން ހުންނަ ކުދިންނަށް ގޭގައި ކިޔަވައިދިނުމުގެ ފުރުސަތު ލިބޭ ގޮތަށް ތައުލީމުގެ ގާނޫނަށް ގެންނަން ހުށަހަޅާފައިވާ އިސްލާހުގައި، ހާއްސަ ހާލަތްތަކުގައިި އެ ހިދުމަތް ފޯރުކޮށްދެވޭ ކަމަށް ބަޔާންކޮށްފައި އޮތުމުން، އެ ހާލަތްތައް އިތުރަށް ސާފުކޮށްދޭންޖެހޭ ކަމަށް ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެ އެވެ.
އައިޝަތު އަލީ ފޭސްބުކް ގައި ވިދާޅުވީ، އިސްލާހުގައި ބަޔާންކޮށްފައިވާ ހާއްސަ ހާލަތްތައް ކަނޑައަޅަނީ ކޮންބައެއް ކަމާއި، އެ އަސާސްތައް ކަނޑައަޅަނީ ކޮން އަސާސެއްގެ މައްޗަށް ބިނާކޮށްކަން ވެސް އެނގެން ނެތް ކަމަށެވެ.
"ހޯމް ސްކޫލިންއަށް ފުރުސަތު ދެވޭ ފަރާތްތަކުގެ ތެރޭގައި ނަފްސާނީ އަދި ޖިސްމާނީ ނުކުޅެދުންތެރިކަން ހުންނަ ފަރާތްތަކުގެ އިތުރުން އެނޫންވެސް ހާއްސަ ހާލަތެއް މެދުވެރިވެފައިވާ ފަރާތްތައް ހިމަނާފައިވާތީ ސުވާލު އުފެދޭ. މި ދަންނަވާ ހާއްސަ ހާލަތްތަކަކީ ކޮބައިތޯ. އެ ހާލަތްތައް ކަނޑައަޅާނީ ކާކުތޯ. އަދި އެ ހާލަތްތައް ކަނޑައަޅާނީ ކޮން އަސާސެއްގެ މައްޗަށް ބިނާކޮށްތޯ،" އޭނާ ވިދާޅުވި އެވެ.
އައިޝަތު އަލީ ވިދާޅުވީ ގާނޫނެއްގައި އެފަދަ މުހިންމު މާއްދާއެއް ސާފުކޮށް މާނަކޮށްދީފައި ނުވާނަމަ، ތަފާތު ގޮތްގޮތަށް މާނަކޮށް، ކުޑަކުދިންގެ ހައްގުތަކަށް އުނިކަން ލިބިދާނެ ފަދަ ނިންމުންތައް ނިންމުމަށް ޖާގަ ހުޅުވިގެންދާނެ ކަމަށެވެ.
އޭނާ ވިދާޅުވީ ނުކުޅެދުންތެރިކަން ހުންނަ ބައެއް ކުދިން މަޖުބޫރީ ތައުލީމުން މުޅިން އިސްތިސްނާކުރެވިދާނެ ފަދަ ގޮތަކަށް އެފަރާތްތަކަށް ހޯމް-ސްކޫލިން ތައާރަފްކުރަން އުޅޭތީ ކަންބޮޑުވާ ކަމަށެވެ. އޭގެ އިތުރުން، އެ ކުދިންގެ ބޭނުންތައް ފުއްދައިދިނުމަށް ސްކޫލްތަކަށް ލާޒިމުކުރުމުގެ ބަދަލުގައި އެކުދިން ސްކޫލްތަކާ ދުރުކުރެވިދާނެތީ ވެސް އައިޝަތު ކަންބޮޑުވުން ފާޅުކުރެއްވި އެވެ.
ތައުލީމަށް ހުރި ގޮންޖެހުންތަކުގެ ހައްލަކަށް ވާންވާނީ ސްކޫލްތައް ބާރުވެރިކޮށް ހަރުދަނާކުރުން ކަމަށާއި ސްކޫލްތަކުން ކުދިން ބާކީކުރެވިދާނެ ފަދަ މަގުތަކެއް ފަހިކުރުން ނޫން ކަމަށް ވެސް އޭނާ ވިދާޅުވި އެވެ.
"މި އިސްލާހުތައް ފާސްކުރުމުގެ ކުރިން، މި ހުށަހެޅިފައިވާ ބަދަލުތަކުން ކޮންމެ ކުއްޖެއްގެ ހައްގުތައް ރައްކާތެރިކޮށްދޭނީ ކިހިނެއްކަން އޮޅުންފިލުވައިދޭން ޖެހޭ. ކުދިންނަށް ތައުލީމީ ފުރުސަތުތައް ގެއްލިގެން ދިޔަ ނުދިނުމަށްޓަކައި ސާފު މާނަކުރުންތަކާއި، ރައްކާތެރިކަމުގެ ފިޔަވަޅުތަކާއި، އަދި ޖަވާބުދާރީކުރުވޭނެ ނިޒާމުތައް ގާނޫނުގައި ހިމެނެން ޖެހޭނެ،" އޭނާ ވިދާޅުވި އެވެ.
ރާއްޖޭގެ އެއްވެސް ކުއްޖެއް ބާކީ ނުކޮށް ހުރިހާ ކުދިން ޝާމިލުކޮށްގެން ކިޔަވައިދިނުމުގެ ސިޔާސަތު ބިނާވެފައިވަނީ ކޮންމެ ކުއްޖަކަށްމެ އުނގެނުމާއި، ބައިވެރިވުމާއި މުޖުތަމައުގެ ބަޔަކަށްވުމުގެ ފުރުސަތު ހޯދައިދިނުމުގެ އުސޫލުތަކުގެ މައްޗަށް ކަމަށް އޭނާ ވިދާޅުވި އެވެ.
"ކުއްޖެއްގެ ކިބައިގައި ހުންނަ ނުކުޅެދުންތެރިކަމަކީ، ތައުލީމު ފޯރުކޮށްދިނުމަށް ދައުލަތުގެ މައްޗަށް އޮންނަ ވާޖިބު ކެނޑިގެންދާނެ ސަބަބަކަށް ދުވަހަކު ވެސް ވެގެން ނުވާނެ. ކުއްޖަކަށް ސްކޫލަށް ހާޒިރުވެވެން ނެތް ހާލަތެއްގައި، ދައުލަތުގެ ޒިންމާއަކަށް ވާންވާނީ އެ ކުއްޖަކަށް ތައުލީމު އުނގަންނައިދެވޭނެ އެކަށީގެންވާ ގޮތެއް ހޯދުން. އެ ކުއްޖާ ތައުލީމުން އިސްތިސްނާކުރުމެއް ނޫން،" އައިޝަތު ވިދާޅުވި އެވެ.
ހޯމް-ސްކޫލިން ޕްރޮގްރާމުގެ ދަށުން ތައުލީމު ފޯރުކޮށްދެވޭ އަސާސީ ޝަރުތުތައް:
- ކުއްޖާއަކީ، ކުއްޖާގެ ކިބައިގައި ހުރި ޖިސްމާނީ ނުކުޅެދުންތެރިކަމެއް ނުވަތަ ނަފްސާނީ އަދި ހާއްސަ ހާލަތެއްގެ ސަބަބުން، ސްކޫލަށް ހާޒިރުވެގެން ތައުލީމު ހާސިލުކުރުމަށް ނުކުޅެދިފައިވާ ކުއްޖެއް ކަމުގައިވުން.
- ކުއްޖާގެ ބެލެނިވެރިންނަކީ، ހޯމް ސްކޫލިން ޕްރޮގްރާމުގެ ދަށުން ކުއްޖާއަށް ތައުލީމު ފޯރުކޮށްދިނުމުގެ މާލީ ގާބިލުކަން ހުރި ފަރާތެއް ކަމުގައިވުން.
- މަދުރަސީ ތައުލީމީ ނިޒާމުގެ ތެރެއިން ސްކޫލަށް ހާޒިރުވުމަށްޓަކައި، ސްކޫލެއްގައި ކުއްޖާ ރަޖިސްޓްރީވެފައިވުން.
މި އިސްލާހުގައި ބުނަނީ މަޖުބޫރު ތައުލީމު ލާޒިމުވާ އުމުރުގެ ކުއްޖަކު، އެ ކުއްޖާގެ އުމުރުން 16 އަހަރު ފުރުމުގެ ކުރިން ރާއްޖޭގެ ރަސްމީ ތައުލީމުގެ ނިޒާމު ގަބޫލުކުރާ ސާނަވީ ތައުލީމުގެ މަރުހަލާ ފުރިހަމަކޮށްފައިވާނަމަ، އެ ކުއްޖަކު ސްކޫލަށް ދިޔުން ލާޒިމެއް ނުވާނެ ކަމަށެވެ.
ހޯމް ސްކޫލިންގެ ނަމުގައި ރާއްޖޭގެ ޒުވާން ޖީލު މަގުފުރައްދައި ހަލާކުކުރުމުގެ ފުރުސަތު ދީގެން ނުވާނެ ކަމަށް އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދުވެސް ވަނީ ވިދާޅުވެފަ އެވެ.
