އޭއެފްސީ އޭޝިއަން ފުޓްސަލް ކަޕް ކޮލިފައިންގައި ރާއްޖޭން ކުޅެން ޖެހުނީ މަތީ ފަންތީގެ ތަޖުރިބާ ބޮޑު ރަނގަޅު ލެވަލްގެ ގައުމުތަކަކާ ކަމަށްވާއިރު، އެ ފަދަ ޓީމުތަކާ ދެކޮޅަށް ކުޅޭއިރު، ގައުމީ ފުޓްސަލް ޓީމުގެ ނަތީޖާތަށް ކުރިއަށް އޮތްތަނުގައި ވެސް ރަނގަޅު ކުރެވޭނީ ރާއްޖޭގައި އެ ފެންވަރުގެ ވަސީލަތް ވެސް ހުރެ ރަނގަޅަށް ތައްޔާރުވެގެން ކަމަށް ގައުމީ ފުޓްސަލް ޓީމުގެ ތަރި އަލީ ހާފިޒް (ހާއްޕެ) ބުނެފި އެވެ.
މިިދިޔަ އަހަރުގެ ކޮލިފައިންއާ އަޅާކިޔާއިރު، މި އަހަރު ގައުމީ ފުޓްސަލް ޓީމުގެ ނަތީޖާތަކާއި ކުޅުން ވެސް ރަނގަޅެވެ. އިތުބާރާ އެކު ކުޅެ އިދިކޮޅު ޓީމު ޕްރެޝަރަށް ވެސް ވައްޓާލެވުނު ވަގުތުތަކެއް ދިޔަ އެވެ. އެކަމަކު، ރާއްޖޭގައި ރަސްމީ ފުޓްސަލް ކުޅޭނެ ވަސީލަތެއް ނެތި ތަމްރީނުތަކެއް ކޮށްގެން ގޮސް ކުޅެން ޖެހުމުން، މެޗުގެ ޕްރެޝަރު ވަގުތުގައި، ވަރުގަދަ ޓީމުތަކުން ފައިދާނަގައިގެން ތަފާތު ނަގައި ރާއްޖެ އަތުން މޮޅުވަނީ އެވެ.
މި ފަހަރު ގައުމީ ފުޓްސަލް ޓީމުގެ ނަތީޖާތަކަށް ބަލާއިރު، ދުނިޔޭގެ ރޭންކިން ހަ ވަނައިގައި އޮތް އިރާން އަތުން ބަލިވީ 18-2 އިންނެވެ. ދެ ވަނަ މެޗުގައި ލެބަނަން ކައިރިން ރާއްޖޭން ލީޑުނެގިޔަސް، އެ މެޗުން ވެސް ބަލިވީ 6-1 އިންނެވެ. ގްރޫޕްގެ ފަހު މެޗުގައި ކިރްގިސްތާން އަތުން ބަލިވީ 8-3 އިންނެވެ.
އޭޝިއަން ކަޕްގެ ކޮލިފައިންގައި މިދިޔަ އަހަރުގެ ތިން މެޗުން ރާއްޖެ ކޮޅަށް 31 ގޯލު ވަދެފައިވާއިރު، ޖެހުނީ އެންމެ ގޯލެކެވެ. ޕޮއިންޓެއް ނުލިބުނުއިރު، ރާއްޖޭގެ ގެއްލުން 30 ގޯލު އޮތެވެ. މި ފަހަރު ރާއްޖެ ކޮޅަށް ތިން މެޗުން ވަދެފައިވަނީ 32 ގޯލެވެ. ރާއްޖޭން މި ފަހަރު ޖުމްލަ އެކު ހަ ގޯލު ޖަހާފައިވެ އެވެ. ޕޮއިންޓް ތާވަލަށް ބަލާއިރު، ރާއްޖޭގެ ގެއްލުން އޮތީ 26 ގޯލެވެ.
ގައުމީ ޓީމުގެ ވޯމްއަޕެއްގެ ތެރެއިން ހާއްޕެ: މި ފަހަރުގެ ކޮލިފައިން ތިން މެޗުގައި ވެސް ހާއްޕެ ވަނީ މޮޅު ކުޅުމެއް ދައްކާފައި.--- ފޮޓޯ: ކިރްގިސްތާން އެފްއޭ
ގައުމީ ފުޓްސަލް ޓީމުގައި މި ފަހަރުގެ ކޮލިފައިން މެޗުތަކުގައި ވިދާލާފައިވަނީ ތިން މެޗުން ހަތަރު ގޯލު ޖެހި ހާއްޕެ އެވެ. މިއީ ހާއްޕެގެ ކެރިއަރުގެ ވެސް ހާއްސަ މުބާރާތެކެވެ.
ހާއްޕެ، "އަދަދު" އަށް ބުނީ ކުޅުން ރަނގަޅުކުރަން ޓީމުން އެކުގައި ވަރަށް މަސައްކަތް ކުރާ ކަމަށާއި އެކަން މެޗުތަކުގައި ފެނުނު ކަމަށެވެ.
"އެކަމަކު، މި ލެވަލްގައި ކުޅެންޏާ އެބަޖެހޭ ރާއްޖޭގައި ވެސް ރަނގަޅު ވަސީލަތްތަކެއް ހުންނަން. އިންޑޯއެއްގައި ކުޅެފައި ޕްރެކްޓިސްތަކެއް ކޮށްފައި، އެހެން ގަވާއިދުން ރަނގަޅަށް މަސައްކަތްތަކެއް ކޮށްގެން އައިސް މި ލެވަލްގައި މި އަށް ވުރެ ރަނގަޅު ނަތީޖާ ވެސް ނެރެވިދާނެ. ބޭނުންވަނީ ވަސީލަތްތައް، ހުނަރު ހުރި ކުޅުންތެރިން އެބަތިބި،" ހާއްޕެ ބުންޏެވެ.
"ފުޓްސަލް ކުޅެވޭ ރަނގަޅު އިންޑޯއެއް އޮވެފައި، ގައުމީ ފުޓްސަލް ލީގެއް، ވެސް ކުޅެ، ގަވާއިދުން ރަނގަޅު ލެވަލްގެ މުބާރާތްތަކެއް ވެސް އޮތުން މުހިންމު،"
ގައުމީ ފުޓްސަލް ޓީމުގެ މެނޭޖަރު، އަލީ ނަދީމް (ކޮކޯ) އާއި ޓީމުގެ ކޯޗު އަބްދުﷲ ނަސީރު (އަބޯ) ވެސް ވަނީ މި ލެވަލްގައި ގިނައިން ކުޅެގެން ތަޖުރިބާ ހޯދައިގެން ކުރިއެރުން ލިބޭނެ ކަމަށާއި އެކަމަކު އެންމެ މުހިންމީ ރާއްޖޭގައި ކުޅުންތެރިން އެންމެ އެކަށޭނެ ގޮތުގައި ޑިވެލޮޕްކުރަން ބޭނުންވާ ވަސީލަތްތައް ގާއިމްވެފައި ހުރުން ކަމަށެވެ.
