ރިޔާސީ އިންތިހާބާ ގުޅިގެން އެކި މައްސަލަތަކުގައި މި ވަގުތާ ހަމައަށް ހަ މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.
ފުލުހުން ބުނި ގޮތުގައި ހައްޔަރު ކުރި މީހުންގެ ތެރެއިން ގިނަ މީހުން ދޫކޮށްލާފައިވާ އިރު، ދެ މީހަކު އަދިވެސް ތިބީ ހައްޔަރުގަ އެވެ. ނަމަވެސް މި މީހުން ހައްޔަރު ކުރީ ސީދާ ކޮން މައްސަލަތަކެއްގައި ކަމެއް ފުލުހުން ނުބުނެ އެވެ.
މިފަހަރުގެ އިންތިހާބު އޮބްޒާވް ކުރަމުން ގެންދާ ގިނަ ފަރާތްތަކުން ބުނަނީ ޖުމްލަކޮށް އިންތިހާބުގެ ކަންކަން ކުރިއަށް ދަނީ ސުލްހަވެރިކަމާ އެކީ، ބޮޑު މައްސަލައެއް ދިމާ ނުވެ ކަމަށެވެ.
މިހާތަނަށް ބޮޑު މައްސަލައެއް ޖެހުނީ އއ. ރަސްދޫގަ އެވެ.
އެ ރަށުގައި، ޕީޕީއެމްގެ ބައެއް އޮބްޒާވަރުންތަކެއް ވޯޓުލާ މަރުކަޒުން ބޭރުކުރަން އެންގި މައްސަލައެއްގައި، ހަމަނުޖެހުން ހިންގައި، ވޯޓު ލުން މެދުކަނޑާލަން ޖެހުނެވެ.
ފުލުހުން އެ ހަމަނުޖެހުން ކޮންޓްރޯލްކުރމުން މިހާރު ވަނީ އެ ރަށުގެ ފޮށިތަކަށް ވޯޓުލުން އަލުން ފަށައިފަ އެވެ.
