ދަ ޑިމޮކްރެޓްސް އިން މިއަދު ބޭއްވި ރިޔާސީ ޕްރައިމެރީގައި ބެހެއްޓި ފޮށިތައް ބަންދުކޮށް ވޯޓު ގުނުމުގެ މަސައްކަތް ފަށައިފި އެވެ.
އެ ޕާޓީގެ ޕްރައިމެރީގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ކުރިމަތިލެއްވި ހަމައެކަނި ކެންޑިޑޭޓް ހުޅުދޫ ދާއިރާގެ މެމްބަރު އިލްޔާސް ލަބީބް ވޯޓު ދެއްވި އެވެ.
މި ހިނގާ ޖުލައި 2، ގައި ރަޖިސްޓްރީ ކުރި ޑިމޮކްރެޓްސްގެ ދަފްތަރުގައި 4100 މެމްބަރުން އޮތް އިރު އެ އެންމެނަށް ވެސް ވޯޓުލުމުގެ ފުރުސަތު ލިބެ އެވެ. އަދި މިއަދުގެ އިންތިހާބު ހިނގަމުންދާއިރު ވެސް ޕާޓީއަށް ސޮއިކޮށް، ވޯޓުލުމުގެ ފުރުސަތު ލިބޭނެ އެވެ.
އެ ޕާޓީގެ ހިންގާ ގަވާއިދުގައި ބުނެފައިވާ ގޮތުން ވޯޓުލާ މީހުންގެ ތެރެއިން 10 ޕަސެންޓު މީހުންގެ ތާއީދު ލިބިގެން އިލްޔާސްއަށް ޕާޓީގެ ރިޔާސީ ޓިކެޓު ލިބޭނެ އެވެ.
ކެންޑިޑޭޓު އިލްޔާސް ވޯޓުލާ މަރުކަޒެއްގައި: ވޯޓުލީ މީހުންގެ 10 ޕަސެންޓު ތާއީދު ލިބިއްޖެ ރިޔާސީ ޓިކެޓު ކާމިޔާބު ކުރެއްވޭނެ -- ފޮޓޯ: މުހައްމަދު ޝަހުޒާން/އަދަދު
ޕާޓީން ނިންމާފައި އޮތީ 20 މެމްބަރުން ހަމަވާ ކޮންމެ ރަށެއްގައި ފޮއްޓެއް ބެހެއްޓުމަށެވެ. އެ ޕްރައިމަރީގައި ހާޒިރުވެގެން ވޯޓުލުމުގެ އިތުރުން އޮންލައިންކޮށް ވޯޓުލުމުގެ ފުރުސަތު ވެސް އޮތެވެ.
ވޯޓުތައް މިހާރު ގުނަން ފަށާފައިވާއިރު މިރޭގެ ވަގުތެއްގައި އިންތިހާބުގެ ވަގުތީ ނަތީޖާ އިއުލާނު ކުރެވޭނެ ކަމަށް ބެލެވެ އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަ ކުރައްވަނީ ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމް ކުރިމަތިލައްވަ އެވެ.
އެންމެ ބޮޑު އިދިކޮޅު ޕާޓީ ޕްރޮގްރެސިވް ޕާޓީ އޮފް މޯލްޑިވްސް އިން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް ޔާމީން ކަމަށެވެ.
