ވަޒީފާ ބަހައިގެން ސަރުކާރަށް ވޯޓު ލިބޭނެ ކަމަށް އުންމީދުކުރިޔަސް، އެގޮތަށް ވޯޓު ނުލިބޭނެ ކަމަށް އިދިކޮޅު މައި ޕާޓީ، މޯލްޑިވިއަން ޑިމޮކްރަޓިކް ޕާޓީގެ ޗެއާޕާސަން، ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި ނަޝީދު ވިދާޅުވީ 2023 ވަނަ އަހަރުގައި ބޭއްވި ރިޔާސީ އިންތިހާބުގައި އެމްޑީޕީން ވަޒީފާ ބަހައިގެން އަދި ޕީއެންސީގެ ސަރުކާރުން ނިމިދިޔަ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓާ ދިމާކޮށް ވަޒީފާ ބަހައިގެންވެސް ވޯޓެއް ލިބިފައި ނުވާ ކަމަށެވެ.
"ކުރެވެމުންދާ އިސްރާފު އިންތިހާއަށް ބޮޑު. ސަރުކާރުގެ އުންމީދަކީ މި ދެވޭ ވަޒީފާތަކުގެ ސަބަބުން ސަރުކާރަށް ވޯޓެއް ލިބިދާނެ ކަމުގެ އުންމީދުކޮށްގެން ތިބުން. އެހެންނަމަވެސް ސަރުކާރަށް އެނގިވަޑައިގަންނަވަންވީ ހަގީގަތްތަކެއް އެބަހުރޭ. އެއްވެސް ސަރުކާރަކުން ވަޒީފާ ބަހައިގެނެއް ވޯޓެއް ނުލިބުނު،" ނަޝީދު ވިދާޅުވި އެވެ.
"2023 ވަނަ އަހަރުގައިވެސް ނުލިބުނު. އަދި ލޯކަލް ކައުންސިލް އިންތިހާބުގައިވެސް މި ސަރުކާރަކަށްވެސް ނުލިބުނު އަދި ފެންނަ ނުފެންނަ ވޯޓު ނެގިއިރުގައި އެކަމަކުންވެސް މި ސަރުކާރަކަށްވެސް ނުލިބުނު."
ނަޝީދު ވިދާޅުވީ ވޯޓު ހޯދުމުގެ ނިޔަތުގައި ބަހާ ވަޒީފާއަކީ ދެމެހެއްޓިނިވި ވަޒީފާއެއް ނޫން ކަމަށާއި ދެމެހެއްޓިނިވި ވަޒީފާއަކީ އިގްތިސޯދީ ހަރަކާތެއް ގެނެސްގެން ކުރިއަށްގެންދާ ވަޒީފާ ކަމަށެވެ.
ތިން އަހަރުން 6،500 މުވައްޒަފުން އިތުރުވެ، ސަރުކާރުގެ މުސާރައިގެ ހަރަދު 14.4 ބިލިއަން ރުފިޔާއަށް
ވޭތުވެދިޔަ ތިން އަހަރު ތެރޭގައި ސަރުކާރު މުވައްޒަފުންގެ އަދަދު ވަނީ 55,466 އަށް އަރާފަ. މުވައްޒަފުން އިތުރުވުމާ ގުޅިގެން ވޭޖު ބިލު ވަނީ 13.9 ބިލިއަން ރުފިޔާއަށް އުފުލިފަ. ކުރީގެ ތިން އަހަރާ އަޅާބަލާއިރު މުވައްޒަފުން އިތުރުވާ ނިސްބަތް އަވަސްވެ، މުސާރައިގެ ހަރަދަށް އަހަރަކު އެވްރެޖްކޮށް 1.2 ބިލިއަން ރުފިޔާ އަންނަނީ އިތުރުވަމުން.
އަންނަ އަހަރަށް ލަފާކުރާ ދައުލަތުގެ ބަޖެޓުގައި ރިކަރަންޓު ހަރަދު 70 ޕަސަންޓުގައި ހުރިކަން ފާހަގަކުރައްވާ ނަޝީދު ވިދާޅުވީ ރަށްރަށުގެ އިންޖީނުގެތަކުގައި މުވައްޒަފުން ތިބީ ތިބެންޖޭ މިންވަރަށްވުރެ އިތުރަށް ކަމަށެވެ.
މިގޮތުން އެއް މެގަވަޓް ކަރަންޓު ނުއުފައްދާ އިންޖީނުގެތަކުގައި 50 އެއްހާ މުވައްޒަފުން ތިބޭއިރު، ފަސް މެގަވަޓް ކަަރަންޓު އުފައްދާ ރިސޯޓެއްގައި އެކަމަށް ތިބޭނީ ފަސް ވަރަކަށް މުވައްޒަފުން ކަމަށް ނަޝީދު ވިދާޅުވި އެވެ.
މި ސަރުކާރު ވެރިކަމާ ހަވާލުވި ފަހުން ވޭތުވެދިޔަ ތިން އަހަރު ދުވަހުގެ ތެރޭގައި ސަރުކާރު މުވައްޒަފުންގެ އަދަދަށް 6،530 މީހުން އިތުރުވެފައިވާ ކަމަށް، ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހެޅި 2027 ވަނަ އަހަރުގެ ބަޖެޓުން ދައްކަ އެވެ.
ބަޖެޓު ފޮތުގައި ހުރި ތަފުސީލުތަކަށް ބަލާއިރު، ކުރީ ސަރުކާރުގެ ދައުރު ނިމުނު އަހަރު ކަމުގައިވާ 2023 ގެ ނިޔަލަށް ސަރުކާރުގައި ތިބީ 48،936 މުވައްޒަފުންނެވެ. މިހާރު އެ އަދަދު ވަނީ 55،466 އަށް އަރާފަ އެވެ.
އަންނަ އަހަރު މުސާރައިގެ ހަރަދަށް ބަޖެޓުކޮށްފައި ވަނީ 14.4 ބިލިއަން ރުފިޔާ އެވެ. މިއީ މި އަހަރަށް ވުރެ 500 މިލިއަން ރުފިޔާ އިތުރު އަދަދެކެވެ. މީގެ ތެރެއިން މުސާރައަށް 7.9 ބިލިއަން ރުފިޔާ ހޭދަވާއިރު، އިނާޔަތްތަކަށް 6.5 ބިލިއަން ރުފިޔާ ހޭދަވާނެ އެވެ.
