ދަތުރުފަތުރުގެ ނިޒާމަކުން ރާއްޖެ ގުޅާލަން ފެށި ރާއްޖެ ޓްރާންސްޕޯޓް ލިންކް (އާރުޓީއެލް) ގެ ސަބަބުން ރަށްތަކަށް ލިބުނު އިޖުތިމާއީ-އިގުތިސޯދީ ފައިދާ ދެނެގަތުމުގެ ގޮތުން ދިރާސާއެއް ކުރަން ޕްލޭނިން މިނިސްޓްރީން ބަޔަކާ ހަވާލުކޮށްފި އެވެ.
ޕްލޭނިން މިނިސްޓްރީން މި މަސައްކަތް ހަވާލުކުރީ އެފްޖޭއެސް ކޮންސަލްޓިން ޕްރައިވެޓް ލިމިޓެޑާ އެވެ. އެ ކުންފުންޏާ ހަވާލުކުރީ އާރުޓީއެލް ހިދުމަތް ފުރަތަމަ ފެށި ހއ، ހދ އަދި ށ އަތޮޅު (ޒޯން 1) ގެ ރަށްތަކުގެ ދިރާސާ ކުރާށެވެ.
މިކަމާ ގުޅޭގޮތުން އެ މިނިސްޓްރީން ނެރުނު ނޫސް ބަޔާނުގައި ބުނީ، މި ދިރާސާގެ މައިގަނޑު މަގުސަދަކީ އާރްޓީއެލް ފެރީތައް ބޭނުންކުރާ މީހުންނަށާއި ދައުލަތުގެ މުއައްސަސާތަކުގެ އިތުރުން ވިޔަފާރިތަކަށާއި ތަފާތު ސިނާއަތްތަކަށް ކުރާ އަސަރުތައް ދެނެގަތުން ކަމަށެވެ. އެގޮތުން, ސާވޭ އާއި ފޯކަސް ގްރޫޕް ޑިސްކަޝަންތަކާއި އިންޓަވިއު ފަދަ ގޮތްތަކުން އެ މައުލޫމާތު އެއްކުރަން ވަނީ ހަމަޖެހިފައެވެ.
ޕްލޭނިން މިނިސްޓްރީން ވަނީ މި ދިރާސާއަށް ބޭނުންވާ މައުލޫމާތު ހޯދުމަށް އެއްބާރުލުން ދޭން އިލްތިމާސްކޮށްފައެވެ.
އާރްޓީއެލްއަކީ މުޅި ރާއްޖެއަށް އަމާޒުކޮށް ފަސިންޖަރުން އަދި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕެޝަލް ޕްލޭން ގައި ހިމެނޭ ތިން ޒޯން އާއި ހަ ރީޖަނެއް ގުޅުވައި ދިނުމަށް ފަރުމާ ކޮށްފައިވާ ވިއުގައެކެވެ. މި ހިދުމަތް ފޯރުކޮށްދޭނީ ސަރުކާރާއީ އާންމުން ހިއްސާވާ ޓްރާންސްޕޯޓު ކުންފުނި އެމްޓީސީސީންނެވެ.
އެ ފެރީ ނެޓްވޯކުން ހަ ސަރަހައްދުގައިވާ ހުރިހާ ރަށްތަކެއް ގުޅުވައިލާ އިރު، އެއް ސަރަހައްދު އަނެއް ސަރަހައްދާ ވެސް ގުޅުވައިލާނެ އެވެ. ފަސިންޖަރުން އުފުލާ ފެރީ ގުޅުވައި ލާނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް،" "ނަން-ކޮމިއުޓް ލިންކް،" އަދި "ހައިވޭ ލިންކް" މެދުވެރިކޮށެވެ.
އެމްޓީސީސީން މީގެ ކުރިން ބުނެފައިވާ ގޮތުގައި އަންނަ އަހަރުގެ ސެޕްޓެމްބަރު މަހު ރާއްޖޭގެ ހުރިހާ އަތޮޅެއް އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކުން ގުޅާލާނެ އެވެ. މިހާރު މި ހިދުމަތް ލިބެނީ ހއ، ހދ އަދި ށ އަތޮޅުގެ އިތުރުން ޅ އަތޮޅާއި ހުވަދޫ އަތޮޅުންނެވެ.
