ރިޔާސީ އިންތިހާބުގެ ކެމްޕޭނަށް ރައީސް އިބްރާހިމް މުހައްމަދު ސޯލިހު މިއަދު މ. ދިއްގަރަށް ވަޑައިގެންނެވި ވަގުތު މުޒާހަރާކުރި ދެ މީހަކު ހައްޔަރުކޮށްފައި ވާއިރު، ހޯމް މިނިސްޓަރުގެ މަގާމުގައި ހުންނެވި އަދާލަތު ޕާޓީގެ ރައީސް އިމްރާން އަބްދުﷲގެ ވަރުގަދަ އިންޒާރެއް އިދިކޮޅަށް މިރޭ ދޫކޮށްލައިފި އެވެ.
"ޑިމޮކްރެޓްސް ބޭފުޅުން ކަމަށް ވިޔަސް، ޕީޕީއެމް ބޭފުޅުން ކަމަށް ވިޔަސް އެނޫން ޕާޓީއެއްގެ ބޭފުޅުން ކަމަށް ވިޔަސް އަޅުގަނޑުމެން ރަށްރަށަށް އަރާއިރުގައި ތި ސަކަރާތް ޖަހަން ދެން ނުހަދާ. ހުރިހާ ރަށަކުން. ތި ސަކަރާތް ޖަހަން ހައްދަވައިފިއްޔާ އަޅުގަނޑުމެން މާ ވަރުގަދަވާނެ،" ކުރިން އެމްޑީޕީއާ ދެކޮޅަށް އޭރުގެ އިދިކޮޅު ޕާޓީތަކުން ކުރި މުޒާހަރާތަކުގައި އިސްކޮށް ހުންނެވި އިމްރާން ވިދާޅުވި އެވެ.
ރައީސް ސޯލިހު މ. އަތޮޅުގެ ރަށްތަކަށް ކުރައްވާ ކެމްޕެއިން ދަތުރުގައި މިއަދު ހަވީރު ދިއްގަރަށް ވަޑައިގެންނެވި ވަގުތު 14 ވަރަކަށް މީހުން ރައީސާ ދެކޮޅަށް އަޑުއުފުލި އެވެ. އެ މީހުންގެ ތެރެއިން ދެ މީހަކު ހައްޔަރުކޮށްފައިވާ ކަމަށް "އަދަދު" ނޫހަށް ވަނީ އެނގިފަ އެވެ.
މ. ދިއްގަރުގައި ބޭއްވި ޖަލްސާގައި ރައީސް ސޯލިހު. -- ފޮޓޯ: މިރާޝް ނާޝިމް/ އަދަދު
ނަމަވެސް ފުލުހުން ރަސްމީކޮށް އެކަން ކަށަވަރެއް ނުކޮށްދެ އެވެ.
ދިއްގަރުގެ އިތުރުން ރައީސް ސޯލިހު ވަޑައިގެންނެވި ބައެއް ރަށްރަށުން އެ މަނިކުފާނާ ދެކޮޅަށް މަދު ބަޔަކު ނުކުމެ އަޑުއުފުލި އެވެ. ނަމަވެސް ކުރިން އެއްވެސް މީހަކު ހައްޔަރެއް ނުކުރެ އެވެ.
ދިއްގަރު ޖަލްސާގައި އިމްރާން ވިދާޅުވީ މިއަދު ހަވީރު އެ ރަށުގައި ކުރި މުޒާހަރާއަކީ ދެހާހުގެ ކުރީކޮޅު ފެނުނު ފަދަ މަންޒަރެއް ކަމަށެވެ. އޭރު ސިޔާސީ ހަރަކާތްތަކުގައި ގަޔަތް ބޮލަށް އަތްލައި، ވެލި އުކައި ފެންޖަހައި ހެދި ކަމަށާއި އެކަން މާޒީވެ ގޮސްފައިވާ ކަމަށް އޭނާ ވިދާޅުވި އެވެ. އެކަން އެގޮތަށް ކުރާން ޖާގަ ނުދޭނެ ކަމަށް ވިދާޅުވި އެވެ.
"ސިޔާސީ ހަރަކާތް ހިންގަން ރާއްޖެ ތަސައްރަފު ފުދިފަ މި އޮތީ. ޑިމޮކްރަސީއަށް ފައްކާވެފައި މި އޮތީ. މިއަދުގެ ހާލަތުގައި ސިޔާސަތު ވިއްކައިގެން، ތިމަންނަމެން ރައްޔިތުންނަށް ބުނެދީގެން، އަމަލީ ގޮތުން ސާބިތިކޮށްދީގެން މިއަދު ސިޔާސީ ހަރަކާތް ކުރިއަށް ގެންދާނީ،" އިމްރާން ވިދާޅުވި އެވެ.
ސިޔާސީ ފަރާތްތަކުންނާއި ޕާޓީތަކުން ވެސް އެފަދަ ނާތަހުޒީބު އަމަލުތައް ހުއްޓާލަން އިމްރާން ގޮވާލެއްވުމަށް ފަހު ވިދާޅުވީ އެކަން އެގޮތަށް ކުރަން ބޭނުންވާނަމަ ރައީސް ސޯލިހުގެ ޓީމް މާއަޑުގަދަވާނެ ކަމަށެވެ.
"މިއަދު އެކަން ނިންމާލައްވާ. ހުރިހާ ބޭފުޅުން ނިންމާލައްވާ. ހުރިހާ ޕާޓީތަކުން ނިންމާލައްވާ. އެކަން އެގޮތަށް ކުރަން ބޭނުން ނަމަ ދެން ވެސް އެކަން ކުރަން މާ މޮޅު ޓީމެއް ރައީސާއެކު އެބަ އޮތް. އަޅުގަނޑުމެން މާ ބާރަށް މުޒާހަރާ ކުރާނަން އިނގޭތޯ. މާއަޑުގަދަ ވާނެ، މުޒާހަރާ ކުރާނެ،" ރައީސް އަބްދުﷲ ޔާމީންގެ ވެރިކަމާ ދެކޮޅަށް އަޑުއުފުލަން މެއި 1، 2015 ގައި ކުރި މުޒާހަރާގައި ދެއްކެވި ވާހަކަތަކާ ގުޅިގެން ހައްޔަރުކުރި އިމްރާން ވިދާޅުވި އެވެ.
މުޒާހަރާކޮށް، ގަޔަށް ބޮލަށް އަތްލައި ހެދުން އެއީ ފަނާކުރަނިވި އަދި ގެއްލުން ބޮޑު ކަމެއްކަން ފާހަގަ ކުރެއްވެވި އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގެ ކެމްޕެއިން ދަތުރުތައް ރައީސް ސޯލިހު ކުރައްވާއިރު، އެންމެ ވާދަވެރި އިދިކޮޅު ޕާޓީ، ޕީޕީއެމްގެ ޓިކެޓު ހަވާލުކޮށްފައިވާ ކުރީގެ ރައީސް އަބްދުﷲ ޔާމީނަށް ވާދަކުރެއްވޭނެކަން ކަށަވަރެއް ނުވެ އެވެ.
އިންތިހާބުގައި ވާދަ ކުރައްވާނެ ކަމަށް މިހާތަނަށް އިއުލާނުކޮށްފައިވަނީ ރައީސް ސޯލިހު، ޖުމްހޫރީ ޕާޓީގެ ލީޑަރު، އެމްއެންޕީގެ ރައީސް މުހައްމަދު ނާޒިމެވެ.
