ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ބަލަން ނެގި ވޯޓުގައި ސަރުކާރު ބޮޑުތަނުން ބަލިވީ މައްސަލައިގެ ވާނުވާ އޮޅުންނުފިލުވާ ތިބެ ރައްޔިތުން ވޯޓު ދިނުމުން ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.
އޭޕްރީލް 4، ގައި ބޭއްވި ވޯޓަށްފަހު ފުރަތަމަ ފަހަރަށް ރައްޔިތުންނާ މުހާތަބު ކުރައްވަމުން މުއިއްޒު ވިދާޅުވީ، މޮޅު ގޮތަކީ ދެ އިންތިހާބު އެއްކޮލުން ކަމަށް އަދިވެސް ގަބޫލު ކުރައްވާ ކަމަށެވެ.
އެކަމަކު، އެންމެ ރަނގަޅު ގޮތަކީ ދެ އިންތިހާބު އެއްކޮށްލުންކަން ރައްޔިތުންނަށް ނޭނގުނީ ވެރިކަން ކުރާ ޕީޕަލްސް ނެޝަނަލް ކޮންގްރެސްއަށް އެކަން ކިޔައިނުދެވުމާއި އިދިކޮޅު ޕާޓީގެ "ދޮގު" ރައްޔިތުންނާ ހަމައަށް ދިޔުން ކަމަށް ރައީސް ވިދާޅުވި އެވެ.
"އެ ވޯޓުގަ އިދިކޮޅު ފަރާތްތަކުން އެކި ކަހަލަ ދޮގު ވާހަކަަތައް ފެތުރި. އެކި ކަހަލަ ދޮގުވާހަކަތައް ފެތުރީމަ އެ ވާހަކަތައް އެކަނި ރައްޔިތުންނާ ހަމައަށް ދިޔައީ. އެހެންވީމަ ކޮންފިއުޝަނެއްގައި [އޮޅުމެއްގައި/އޮޅުންނުފިލާ] ދިޔައީ މިކަން. އަޅުގަނޑުމެންނަކަށް ނެތް މިކަން ކިޔައިދެވިފައެއް،" އއ. ރަސްދޫ ކައުންސިލްގެ މެޖޯރިޓީ ލިބުން ފާހަގަ ކުރައްވަން އެ ރަށަށް ވަޑައިގެން ރައީސް ވިދާޅުވި އެވެ.
ރޭގެ ޖަލްސާގައި މުއިއްޒު ވަނީ ޕީއެންސީގެ ކެމްޕެއިން ޓީމުތަކަށް ވަރަށް ބޮޑަށް ފާޑުވިދާޅުވެފަ އެވެ. ވޯޓުން ބަލިވީ ޕީއެންސީގެ ކެމްޕެއިން ޓީމުތައް އެކަށީގެންވާ މަސައްކަތްތަކެއް ނުކުރުމުން ކަމަށް ވެސް މުއިއްޒު ވިދާޅުވި އެވެ.
"ދެ އިންތިހާބު އެއްދުވަހު ބޭއްވުމުގެ ނިންމުމުގައި އެކި ސަބަބުތަކާހުރެ ވޯޓު ނާކާމިޔާބުވެގެން ދިޔަ. އެކަން ވަރަށް ތަފްސީލުކޮށް އަޅުގަނޑުމެން ބެލިން. ބެލިއިރުގައި ވެސް ނާކާމިޔާބުވެގެން ދިޔަ ސަބަބުތަކުގެ ތެރޭގައި އަޅުގަނޑުމެންގެ ފަރާތުން މިދެންނެވި ޕީއެންސީގެ މުޅި ކެމްޕޭން ޓީމު ވަހަކަ މި ދައްކަނި. ހުރިހާ ރަށެއްގައި މަސައްކަތް ކުރަމުން ދިޔަ ޖުމުލަކޮށް ހުރިހާ އެންމެންގެ ފަރަތުން ހުރިހާ އެންމެންގެ ވާހަކަ، އެކަށީގެންވާ މަސައްކަތެއް ނުކުރެވޭ އެކަމަކަށް،" މުއިއްޒު ވިދާޅުވި އެވެ.
ފެންނަ ނުފެންނަ ވޯޓުގައި 216،539 މީހުން ވޯޓު ދިނެވެ. އެއީ ވޯޓު ދިނުމުގެ ހައްގު ލިބޭ މީހުންގެ 74.9 ޕަސެންޓު މީހުންނެވެ. އޭގެ ތެރެއިން 148،859 މީހުން ވޯޓު ދިނީ ދެ އިންތިހާބު އެއްކޮށްލަން ނުފެންނަ ކަމަށެވެ. އެއީ ވޯޓު ދިން މީހުންގެ 68.7 ޕަސެންޓު މީހުންނެވެ. އެއީ މިދިޔަ ރިޔާސީ އިންތިހާބުގައި މުއިއްޒަށް ލިބުނު ވޯޓަށްވުރެ ވެސް ގިނަ އަދަދެކެވެ.
އޭގެ އިތުރުން، ދެ އިންތިހާބު އެއްކޮށްލުމުގެ މައުލޫ ޕީއެންސީގެ ކެމްޕެއިން ޓީމުތަކަށް ނުކިޔައިދެވުނު ނަމަވެސް އެމަނިކުފާނު އެ ވާހަކަ ވަރަށް ރަނގަޅަށް ރައްޔިތުންނަށް ކިޔައިދީފައިވާނެ ކަމަށް ރޭގެ ޖަލްސާގައި މުއިއްޒު ވިދާޅުވި އެވެ.
"ކެމްޕޭން ނިންމާލާފަ ދެއްކި ވާހަކަ އަޅުގަނޑު ވާހަކަ ދެއްކިއިރުގައި ވަރަށް ކުރުކޮށް އަޅުގަނޑު މަސައްކަތް ކުރިން މުޅި މައުލޫ ކިޔައިދެވޭތޯ. އަޅުގަނޑު އެދެން އަޅުގަނޑުމެންގެ ސަޕޯޓަރުންގެ ކިބައިން އަނެއްކާ ވެސް އެދުވަހުގެ އަޅުގަނޑު ދެއްކި ވާހަކަ... ރިވައިންޑް ކޮށްލާފަ ބަލާލަން. ވަރަށް ކުރުކުރުކޮށް އަޅުގަނޑު ކިޔައިދިނިން ދެ އިންތިހާބު އެއްދުވަހު ބާއްވަން އަޅުގަނޑު ހުށަހެޅި ސަބަބު. އޭގަ ހުރީ ހުސް ފައިދާކަން، އެއްވެސް ގެއްލުމެއް ނެތްކަން،" އެމަނިކުފާނު ވިދާޅުވި އެވެ.
ނަމަވެސް ރައްޔިތުންގެ ނިންމުމަށް އިހުތިރާމް ކުރައްވާނެ ކަމަށް ރައީސް ރޭ ވިދާޅުވި އެވެ.
"އެކަން އެ ނުމުނީ އެ ހިސާބުން. ރައްޔިތުން އެ އޮތީ ގޮތް ނިންމާފައި.. ދެން މިހާރު މިއޮތީ ރައްޔިތުން ނިންމި ގޮތާ އެއްގޮތަށް ދާނީ. އޭގެ އެއްވެސް ބަދަލެއް ދެން ނާންނާނެ ގާނޫނުގެ ގޮތުން ރައްޔިތުން ނިންމި ގޮތާ އެއްގޮތަށް ކުރިޔަށް ދާނީ،" އެމަނިކުފާނު ވިދާޅުވި އެވެ.
