އެމްޑީޕީ ބަލިކަށިކުރުމުގައި އެންމެ އިސް ދައުރެއް އަދާކުރި އެއް ބޭފުޅަކީ ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު (ވައްޑެ) ކަމަށް ވިދާޅުވެ، އެ ޕާޓީގެ ކުރީގެ ޗެއާޕާސަން ފައްޔާޒު އިސްމާއިލް ވަރުގަދަ ރައްދެއް ދެއްވައިފި އެވެ.
ފައްޔާޒު މިހެން ވިދާޅުވީ މިއަދު ހެނދުނު އެކްސްގައި ވަހީދުގެ ޕޯސްޓަކަށް ދެއްވި ރައްދެއްގަ އެވެ. ނަމަވެސް ވަހީދު ވަނީ އޭނާ ކުރެއްވި ޕޯސްޓު ފަހުން ޑިލީޓުކުރައްވާފަ އެވެ.
ފައްޔާޒު ވިދާޅުވީ މާޒީގައި ހިތަށްވީ ތަދުގެ ބަދަލު ހޯދަން އުޅެގެން އެމްޑީޕީއަށް ލިބޭނެ އެއްވެސް ކުރިއެރުމެއް ނެތް ކަމަށެވެ.
ފައްޔާޒު މި މޭރުމުން ވާހަކަ ދެއްކެވިއިރު، 2023 ވަނަ އަހަރުގެ ރިޔާސީ އިންތިހާބުގެ ތެރޭގައި އެމްޑީޕީއަށް ކުރިމަތިވި އެންމެ ބޮޑު ގޮންޖެހުމަކީ ޕާޓީގެ އެތެރޭގައި އުފެދުނު ބައިބައިވުމެވެ. އެގޮތުން އެމްޑީޕީގެ ރިޔާސީ ޕްރައިމަރީން ނާކާމިޔާބުވެވަޑައިގަތުމުން، ޕާޓީގެ ކުރީގެ ރައީސް މުހައްމަދު ނަޝީދު އިސްވެ ހުންނަވައި "ދަ ޑިމޮކްރެޓްސް" ގެ ނަމުގައި އާ ޕާޓީއެއް އުފެއްދެވިއެވެ. އޭރު މުހައްމަދު ވަހީދަކީ ނަޝީދުގެ އެންމެ އަރިސް ބޭފުޅެއްގެ ގޮތުގައި ހުންނަވައި އެމްޑީޕީއާ ދެކޮޅަށް ވަރުގަދައަށް މަސައްކަތް ކުރެއްވި ބޭފުޅެކެވެ.
ރިޔާސީ އިންތިހާބުގެ ކެމްޕޭން ތެރޭގައި އެމްޑީޕީ ރޫޅާލާނެ ކަމަށް ނަޝީދު ތަކުރާރުކޮށް ވިދާޅުވަމުން ގެންދެވިއެވެ. އަދި ސޯލިހުގެ ސަރުކާރުގައި އެންމެ ނުފޫޒުގަދަ ވަޒީރުގެ ގޮތުގައި ހުންނެވި ފައްޔާޒު އިސްމާއިލްގެ އިތުބާރު ނެތްކަމުގެ މައްސަލައެއް މަޖިލީހަށް ވެއްދުމަށްވެސް ނަޝީދު އިސްވެ ހުންނަވައި މަސައްކަތް ކުރެއްވިއެވެ. އެ މައްސަލައިގައި ބައެއް މެންބަރުންގެ ސޮއި ހޯދި ނަމަވެސް، އެ މައްސަލަ މަޖިލީހަށް ހުށަހަނާޅަ އެވެ.
ވަކި ކަމެއް ފާހަގަ ނުކުރައްވައި ފައްޔާޒުގެ ޕޯސްޓުގައި ވިދާޅުވީ ހިތަށްވީ ތަދުގެ ބަދަލު ހޯދަން އުޅެގެން އެމްޑީޕީއަށް ލިބޭނެ ކުރިއެރުމެސް ނެތަސް، "އެވީތަދުގެ ރިހުން އެބަހުރި" ކަމަށެވެ.
"[އެ] ހަނދާންތައް އެބަހުރި. ބޭނުމީ ކުރިއަށް ދެވެނެ ގޮތެއް. ގައުމު އަނބުރާ ހޯދުން. އެކަން ކުރެވެމުން އަންނަނީ،" ފައްޔާޒު ވިދާޅުވި އެވެ.
ފައްޔާޒުގެ މި ވާހަކަތަކުން ދޭހަވަނީ، އެމްޑީޕީގެ އެތެރޭގައި އުފެދުނު ހިޔާލުތަފާތުވުންތަކުގެ ސަބަބުން ލިބުނު ގެއްލުންތަކުގެ ހަނދާންތައް އަދިވެސް އާވެފައި ހުރި ނަމަވެސް، ޕާޓީގެ މިހާރުގެ އަމާޒަކީ ކުރިއަށް އޮތް ތަނުގައި ސިޔާސީ މައިދާން އަނބުރާ ކާމިޔާބު ކުރުން ކަމެވެ.
