މެންޗެސްޓާ (ޖުލައި 12) - މެންޗެސްޓާ ސިޓީގެ ކޯޗު ޕެޕް ގާޑިއޯލާ، މިދިޔަ އަހަރު އޭނާ ގާތުގައި ބަރުދަން ލުއިކުރަންޖެހޭ ކަމަށް ބުނުމުން، އެންމެ ފުރަތަމަ އެކަން ބަލައިގަންނަން އުނދަގޫވި ކަމަށް ސިޓީ އަށް ކުޅޭ އިނގިރޭސި މިޑްފީލްޑަރު ކަލްވިން ފިލިޕްސް ބުނެފި އެވެ.
މިދިޔަ ޑިސެމްބަރު މަހު އިނގިރޭސި ލީގު ކަޕްގައި ލިވަޕޫލާ ދެކޮޅަށް ސިޓީން ކުޅުނު މެޗަށް އެ ޓީމުން ނެގި ސްކޮޑުގައި ފިލިޕްސް ނުހިމެނީ އޭނާ ބަރުވެ، ނުކުޅެވޭ ހާލަތެއްގައި ހުރުމުން ކަމަށް އެ މެޗުގެ ކުރިން ގާޑިއޯލާ ވަނީ މީޑިއާގައި ބުނެފަ އެވެ.
ގަތަރު ވޯލްޑް ކަޕަށް ދިއުމުގެ ކުރިން ފިލިޕްސް ކުޅެފައިވަނީ ސިޓީގެ ހަތަރު މެޗުގަ އެވެ. އަނިޔާގެ ސަބަބުން ފިލިޕްސް އަށް ސިޓީއާ ގުޅުނުތަނާ ގިނަ މެޗުތަކެއް ގެއްލުނެވެ.
ލީޑްސް ޔުނައިޓެޑް ދޫކޮށް 55 މިލިއަން ޑޮލަރުގެ އަގަކަށް ސިޓީ އަށް ބަދަލުވި ފިިލިޕްސް ބުނީ އޭނާ ބަރުވެފައި ހުރި ކަމަށް ގާޑިއޯލާ ބުނުމުން އެންމެ ފުރަތަމަ ގަބޫލެއް ނުކުރެވުނު ކަމަށެވެ. އެއީ އޭނާ ދެކޭ ގޮތުގައި އޭރު ވެސް ބަރުވެފައި ނެތް ކަމަށާއި ހުރީ މެޗެއް ރަނގަޅަށް ކުޅެވޭ ހާލަތެއްގައި ކަމަށްވާތީ ކަމަށް ފިލިޕްސް ވަނީ ބުނެފަ އެވެ.
"އަހަރެން އެކަމަކު ވިސްނީ ޕޮޒިޓިވްކޮށް ނަގައި، ވީ އެންމެ ފިޓްކޮށް ހުންނަން މަސައްކަތް ކުރަން. އޭގެ ދެން ހުރި ދެ ފަރާތަށް ވެސް ވާހަކަ ނުދެކެވި ދިމާވި ކަންތައްތަކެއް، ފަހުން ކަންކަން ހައްލުވެ، އަހަރެން ހުރީ ފިޓްކޮށް މެޗުތައް ވެސް ކުުޅުނިން،" ސީޒަނުގައި ސިޓީ އަށް 21 މެޗުގައި ކުޅެ، ސިޓީން ތިން ތަށި ހޯދަން ކުރި މަސައްކަތުގައި އެހީވެވުނީތީ ހިތްހަމަޖެހިފައި ހުރެ ފިލިޕްސް ބުންޏެވެ.
ފިލިޕްސް ބުނީ އޭނާގެ އަނިޔާގެ ވާހަކަތަކާއި ބަދުދަނާ ބެހޭގޮތުން އައި ކަންކަމާ ގުޅޭ އިތުރު ކަންކަން މި މަހު ރިލީސްކުރާ ސިޓީގެ ޑޮކިއުމެންޓަރީގައި ފެނިގެންދާނެ ކަމަށެވެ. މި މަހު 19 ވަނަ ދުވަހު ސިޓީގެ "ދަ ރޯޑް ޓު ސިޓީ" ދައްކަން ވަނީ ނިންމައިފަ އެވެ.
