މިހާރު ކުރިއަށްދާ އިންޓަ ރިސޯޓް ޗެމްޕިއަންސް ލީގުގައި އިއްޔެ ކުޅުނު މެޗުން އެންމެ ފަހުގެ ޗެމްޕިއަން، ބަނޑޮސް މޯލްޑިވްސް އަތުން ވަން އެންޑް އޮންލީ ރީތި ރަށް ވަނީ ސީދާ ތިން ސެޓުން މޮޅުވެއްޖެ އެވެ.
މިއީ، މި ފަހަރުގެ އިންޓަ ރިސޯޓް މުބާރާތުގައި ބަނޑޮސް ބަލިވި ފުރަތަމަ މެޗެވެ. ބަނޑޮހުން ވަނީ ފަސް ސެޓު ކުޅެގެން ރީތި ރަށް ބަލިކޮށް ޒޯން އެކެއްގެ ތަށި އުފުލާލައިފަ އެވެ.
އެކަމަކު، އިއްޔެ ޒޯން ޗެމްޕިއަންސް ލީގުގައި ރީތި ރަށުން ވަނީ ބަނޑޮހުގެ މައްޗަށް ކުރިިހޯދައިފަ އެވެ. ރީތި ރަށް ވޮލީ ކޯޓުގައި ކުރިއަށްދިޔަ މި މެޗުގެ ސެޓުތައް ރީތި ރަށުން ގެންދިޔައީ 26-24، 25-20 އަދި 25-19 އިންނެވެ. މެޗުގެ މޮޅު ކުޅުންތެރިޔަކީ ރީތި ރަށް ޓީމަށް ކުޅޭ ގައުމީ ވޮލީ ޓީމުގެ ކެޕްޓަން، އަލީ ހުޒާމް (ހުޒަންޓެ) އެވެ.
ޒޯން ޗެމްޕިއަންސް ލީގުގެ ފުރަތަމަ މެޗުގައި އަނަންތަރާ ކިހާވަށް މޯލްޑިވްސް އަތުން 3-1 ސެޓުން ވައްކަރު މޯލްޑިވްސް ވަނީ މޮޅުވެފަ އެވެ. މި މެޗުގެ ސެޓުތައް ދިޔައީ 25-21، 27-29، 26-28 އަދި 23-25 އިންނެވެ. މެޗުގެ މޮޅު ކުޅުންތެރިޔަކީ ވައްކަރުގެ ގުރުގޭ ވިޑޫރާ އެވެ.
ޒޯން ޗެމްޕިއަންސް ލީގުގައި މިއަދު ދެ މެޗެއް ކުޅެވިގެންދާނެ އެވެ. އެ ގޮތުން، ބަނޑޮސް ވޮލީ ކޯޓުގައި ކުޅޭ މެޗުގައި ބަނޑޮހުން ބައްދަލުކުރާނީ އަނަންތަރާއާ އެވެ. އަދި ރީތި ރަށުގައި ކުޅޭ މެޗުގައި އެ ޓީމުން ކުޅޭނީ ވައްކަރުއާ އެވެ. ދެ މެޗު ވެސް ފަށާނީ 16:15 ގަ އެވެ.
