ފްރާންސްގައި މިދިޔަ ހަފުތާގައި ހިނގި ހަމަނުޖެހުންތަކާ ގުޅިގެން ސޯޝަލް މީޑިއާ ކަނޑާލަން ގޮވާލުމުން ރައީސް އިމޭނުއެލް މެކްރޯންއަށް ފާޑުކިޔުން އަމާޒުވެއްޖެ އެވެ.
މެކްރޯން ވިދާޅުވީ ހަމަނުޖެހުން ހިންގައި ހާލަތު ކޮންޓްރޯލް ނުވެ، ގިނަސް ދުވަސްވާ ނަމަ ސޯޝަލް ނެޓްވޯކްތައް މަނާކުރުމާ މެދު ވިސްނަން ޖެހޭނެ ކަމަށެވެ.
ފްރާންސްގެ ސަރުކާރުން ބުނީ ސްނެޕްޗެޓް، ޓިކްޓޮކް އަދި ޓެލެގްރާމް ފަދަ ޕްލެޓްފޯމްތަކުން ހަމަނުޖެހުމުގެ ފޮޓޯ ފަތުރައި، އިތުރު ހަމަނުޖެހުމަށް ހިތްވަރުދޭ ކަމަށެވެ.
ފްރާންސްގައި ހަމަނުޖެހުން އުފެދުނީ އުމުރުން 17 އަހަރުގެ ކުއްޖެއްގެ ގަޔަށް ފުލުހަަކު ބަޑި ޖަހައި މަރާލުމުންނެވެ.
މެކްރޯންގެ ވާހަކަތަކާ ގުޅިގެން ގްރީންސް ޕާޓީގެ ލީޑަރު މެރީން ޓޮންޑެލިއާ ވިދާޅުވީ ހަމައެކަނި ހައްލަކީ ސޯޝަލް ނެޓްވޯކް ކަނޑާލުން ކަމަށް ވާ ނަމަ އެއީ ކަންބޮޑުވާ މައްސަލައެއް ކަމަށެވެ.
އެހެން އިދިކޮޅު ލީޑަރުން ވެސް ވަނީ އެ ހުށަހެޅުމާ ދެކޮޅު ހަަދައިފަ އެވެ. އެއީ ހުދުމުހުތާރު ވެރިއެއްގެ ސިފަ ކަމަށް ބުނެ، މެކްރޯންއަށް ވަރަށް ބޮޑަށް ފާޑުކިޔުން އަމާޒުވި އެވެ.
