ޕެރިސްގެ މަޝްހޫރު ލޫވާ މިއުޒިއަމް ފަޅާލިތާ ދެ ދުވަސް، ވަގުން އަތު ނުވޭ

Oct 21, 2025, 4:42 PM
ލޫވާ މިއުޒިއަމްއަށް ވަންނަން ވަގުން ބޭނުންކުރި އެލަވޭޓަރު ޓްރަކު: ހަތަރު ވަގުންގެ ގްރޫޕުން ވަދެ ގެންދިޔައާއި އަގުނުކުރެވޭ ވަރުގެ ތަރިކަތަކެއް --- ފޮޓޯ: އޭއެފްޕީ

ލޫވާ މިއުޒިއަމްއަށް ވަންނަން ވަގުން ބޭނުންކުރި އެލަވޭޓަރު ޓްރަކު: ހަތަރު ވަގުންގެ ގްރޫޕުން ވަދެ ގެންދިޔައާއި އަގުނުކުރެވޭ ވަރުގެ ތަރިކަތަކެއް --- ފޮޓޯ: އޭއެފްޕީ

ފްރާންސްގެ ޕެރިހުގައި ހުންނަ މަޝްހޫރު، ލޫވާ މިއުޒިއަމްގައި ހުރި ނަޕޯލިއަން ޒަމާނުގެ ގަހަނާތަކެއް ވަގަށް ނެގި މައްސަލައިގައި ހިމެނޭ މީހުން އަދިވެސް އަތުނުވާ ކަމަށް އެ ގައުމުގެ ފުލުހުން ބުނެފި އެވެ.

މިދިޔަ އާދިއްތަ ދުވަހު, ރޯ މާ ދުވާލު އެތައް ބަޔެއްގެ ކުރިމަތީގައި ހިންގި މި ވައްކަމުގައި، ވަގުން ލޫވާގެ ތެރޭގައި ހޭދަކުރީ އެންމެ ހަތް މިނިޓެވެ.

ހަތަރު މީހުން ހިމެނޭ ވަގުންގެ ގްރޫޕުން ލޫވާގެ ތެރެއަށް ވަންނަން ބޭނުންކުރީ ލިފްޓެއް ހަރުކޮށްފައި ހުންނަ ވައްތަރުގެ އެލަވޭޓަރު ޓްރަކެކެވެ. މި އުޅަނދު ކައިރި ކުރީ ލޫވާގެ ޑެނަން ވިންގާ ދިމާލަށެވެ.

Advertisement

ދުނިޔޭގެ އެންމެ ބޮޑު ދާރުލްއާސާރުގައި ބަހައްޓާފައި ހުރި އެންމެ އަގުހުރި ކަލެކްޝަންތައް ހުންނަ އެޕޯލޯ ގެލަރީ ހުންނަނީ މި ވިންގުގެ އެއް ވަނަ ފަންގިފިލާގަ އެވެ. މި ގެލަރީގައި ހުންނަނީ ކުރީގެ ފަރަންސޭސީ ރަސްރަސްކަލުންނާއި ރަސްގެފާނު ނަޕޯލިއަންގެ އާއިލާއިން ގެންގުޅުނު ގަހަނާތަކެވެ.

އެޕޯލޯ ގެލަރީއާ ދިމާލަށް ޓްރަކުގެ ހަރުގަނޑު ލެއްގުމަށް ފަހު، ވަގުން އެތަނަށް ވަނީ މަސައްކަތު މީހުން އަޅާ ކަހަލަ ފްލޮރިސެންޓު ރީނދޫ ކުލައިގެ "ހައި-ވިސް" ވެސްޓުތަކެއް އަޅައިގެންނެވެ. މި މީހުން އެ ބެލްކަަންޏަށް އެރީ ގިނަ ބަޔަކު ބަލަން ތިއްބަ އެވެ.

ގެލަރީއަށް ވަންނަން ވަގުން ބޭނުންކުރީ ކުޑަދޮރެކެވެ. މި ކުޑަދޮރު ގަދަކަމުން ހުޅުވަން ބޭނުންކުރީ އޭންގަލް ގްރައިންޑަރެކެވެ. ވަގުންގެ ގްރޫޕުން ގެލަރީ ތެރެއަށް ވަނުމުން އެ މީހުންނާ ކުރިމަތިލީ ސެކިއުރިޓީ ގާޑުންނަށް ބިރުދައްކަން ވެސް އެ މީހުން ބޭނުންކުރީ މި ގްރައިންޑަރުތަކެވެ.

ފްރާންސުގެ ލެ މޮންޑޭ ނޫހާ ހަވާލާދީ ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުގައި ގެލަރީއަށް ވަގުން ވަން ގަޑީގައި ތިބީ ހަތަރު ސެކިއުރިޓީ ގާޑުންނެވެ. އެ ގެލަރީގައި ފޯރިމަރަން ފަސް ގާޑުން ތިބޭ ނަމަވެސް، ވަގުން ވަނީ އެ ތަނުން އެކަކުގެ ބްރޭކު ގަޑި ބަލާފަ އެވެ.

މި ވައްކަން ކުރަނިކޮށް ނަގާފައިވާ ވީޑިއޯއެއް ސޯޝަލް މީޑިއާގައި އަންނަނީ ދައުރުވަމުންނެވެ. ވަގުން ވަދެގަތް ގަޑީގައި އެ ތަނުގައި ހުރި މީހަކު ނެގި އެ ވީޑިއޯއިން ފެންނަނީ ވަގުންގެ މީހަކު ވަރަށް ހަމަޖެހިލައިގެން ހުރެ ޑިސްޕްލޭ ކަފަމުން ދިޔަ މަންޒަރެވެ. ވަގުން ވަނީ ނުވަ ގަހަނާ ވަގަށް ނަގާފަ އެވެ.

ނަމަވެސް ފިލަން ދުވަނިކޮށް ވަގުންގެ އަތުން ވަނީ އެ މީހުން ވަގަށް ނެގި ތާޖެއް ވެއްޓިފަ އެވެ. ވަގުން އަތުން ދޫވީ ތާޖަކީ، ފްރާންސުގެ އެންމެ ފަހުގެ ރަސްގެފާނު، ނަޕޯލިއަން ތިނެއްގެ އަނބިކަނބަލުން، ރާނީ ޔޫޖެނީގެ ތާޖެވެ. މި ތާޖު ޖަރީކުރަން 1،354 އަލިމަހާއި 56 ޒުމައްރަދު (އެމެރަލްޑު) ބޭނުންކޮށްފައި ވެ އެވެ.

ފިލުމުގެ ކުރިން ވަގުން ވަނީ އެ މީހުން ބޭނުންކުރި އުޅަނދު އަންދާލަން މަސައްކަތްކޮށްފަ އެވެ. މިކަން ނާކާމިޔާބުވީ ދާރުލްއާސާރުގައި މަސައްކަތް ކުރާ މީހެއްގެ ހުށިޔާރުކަމުންނެވެ. ހަތަރު ވަގުން ފިލީ، އެ ތަނުން ދެ މީހަކު އައި ދެ ސްކޫޓަރެއްގަ އެވެ.

ފަރަންސޭސީ އޮފިޝަލުން ބުނީ ވަގަށް ނެގީ އަގު ނުކުރެވޭ ވަރުގެ އާސާރީ ތަރިކަތަކެއް ކަމަށެވެ. އެ މީހުންގެ އެންމެ ބޮޑު ބިރަކީ މި ގަހަނާތައް އަބަދަށް ގެއްލިގެން ގޮސްދާނެ ކަމުގެ ބިރެވެ. އެއިން އެއްވެސް އެއްޗަކީ އެ ހުރި ގޮތަށް ވިއްކޭނެ އެއްޗެއް ނޫން ކަމުން، ވަގުންނަށް އެ ވިއްކޭނީ ހަލާކުކޮށްލައިގެންނެވެ.

ވަގަށް ނެގި ތަކެތީގެ ތެރޭގައި އަލިމަހާއި އިތާމުތުން ޖަރީކޮށްފައިވާ ތާޖަކާއި އަލިމަހުން ޖަރީކޮށްފައި ހުރި އާދަޔާހިލާފު ފަންނުވެރިކަމެއް ހިމެނޭ މަތީގައި ޖަހާ ދެ ދައްޗާއި ޒުމައްރަދު ހާރަކާއި ކަންފަތުލާ މުދިތަކަކާއި ނީލަމާއި އަލިމަހުގެ ގަހަނާ ސެޓެއް ހިމެނެ އެވެ. މި ހުރިހާ ގަހަނާއަކީ ވެސް ފްރާންސުގެ ރަސްމަތިފުށު ކަނބަލުން ތުރުކުރެއްވި ގަހަނާތަކެވެ.

މިއީ 1911 ގައި ލޫވާގައި ހުރި މަޝްހޫރު މޮނަލީސާ ކުރެހުން ވަގަށް ނެގި ފަހުން ހިންގި އެންމެ އާދަޔާހިލާފު ވައްކަމެވެ. އެންމެ ފަހުން ލޫވާއިން ވައްކަން ކުރީ 1998 ގަ އެވެ. އެ ފަހަރު ވަގުން ގެންދިޔަ ކެމިލް ކެރޮޓުގެ ކުރެހުން އަދިއަދަށް ދާން ދެން ވެސް ނުފެނެ އެވެ.

ކޮމެންޓް

ފަހުގެ ޚަބަރު

ސްޕޭސްއެކްސްއަށް ފަންޑިން ހުއްޓުވުމުގެ އިންޒާރު

ޔޫކްރެއިންގައި ބޭނުންކުރާ ސްޓާޝީލްޑްގެ ޚިދުމަތަށް ބަދަލުތަކެއް އައި މައްސަލައިގައި، ސްޕޭސްއެކްސްއަށް ދޭ ފަންޑިން ހުއްޓާލާނެ ކަމުގެ އިންޒާރު އެމެރިކާގެ ކޮންގްރެސް މެންބަރު ޖިމް ހައިމްސް ދެއްވައިފިއެވެ. އޭނާ އެދިވަޑައިގަންނަވަނީ މި ބަދަލުތަކަކީ ކުންފުނިން އަމިއްލައަށް ނިންމި ނިންމުމެއްތޯ ނުވަތަ ސަރުކާރުގެ އެންގުމަކަށް ކުރި ކަމެއްތޯ ސާފުކޮށްދިނުމަށެވެ. ސަރުކާރުގެ ފުރިހަމަ ކޮންޓްރޯލް ނެތް ނިޒާމުތަކަށް ފައިސާ ދޫނުކުރާނެ ކަމަށް ވިދާޅުވެ، މިކަމާ ގުޅޭގޮތުން އީލޮން މަސްކާ ބައްދަލުކުރުމަށްވެސް ހައިމްސް ވަނީ އެދިވަޑައިގެންފައެވެ.

ރަޝިޔާ އާއެކު މަޝްވަރާއަށް ތައްޔާރު: ޔޫރަޕުގެ ލީޑަރުން

ޔޫކްރެއިން ހަނގުރާމަ ހުއްޓާލުމަށް ރަޝިޔާއާއެކު މަޝްވަރާކުރުމަށް ތައްޔާރަށް ތިބިކަން ޔޫރަޕުގެ ލީޑަރުން ހާމަކޮށްފައިވާއިރު، މި މަޝްވަރާތަކުގައި ވިލާތުގެ ބައިވެރިވުން ހިމެނުމަށް އެމެރިކާއިން ދަނީ ބާރުއަޅަމުންނެވެ. ރަޝިޔާގެ ރައީސް ޕޫޓިން ވަނީ ވިލާތުގެ ގައުމުތަކުގެ ސިޔާސަތުތައް ސާފުކުރުމަށްޓަކައި މޮސްކޯއަށް ޒިޔާރަތްކުރުމަށް އެ ގައުމުތަކަށް ދައުވަތު ދެއްވާފައެވެ.

އެންތްރޮޕިކް 1.76 ޓްރިލިއަން ޑޮލަރުގެ ކުންފުންޏަކަށް

އޭއައި ކުންފުނި އެންތްރޮޕިކް ހިއްސާގެ ބާޒާރަށް ނުކުތުމާއެކު، އެ ކުންފުނީގެ އަގު 1.76 ޓްރިލިއަން ޑޮލަރަށް އަރައި ދުނިޔޭގެ އެންމެ އަގުބޮޑު ކުންފުނިތަކުގެ ތެރޭގައި ހިމެނިއްޖެއެވެ. ހިއްސާގެ އަގަށް އައި ކުރިއެރުމާއެކު އޭއައި ދާއިރާއަށް އޮތް ބޮޑު ޝައުގުވެރިކަން ހާމަވީ ނަމަވެސް، މިއީ އިގްތިސާދީ "ބަބުލް" އެއްގެ ގޮތުގައި ބައެއް މާހިރުން ސިފަކުރެއެވެ. ކްލޯޑް ޗެޓްބޮޓް އުފެއްދި މި ކުންފުނިން އެންމެ ބޮޑު އިސްކަމެއް ދެނީ އޭއައިގެ ރައްކާތެރިކަމަށެވެ.

ވެން ގޯގެ ކުރެހުމެއް 190 މިލިއަން ޑޮލަރަށް ވިއްކާލައިފި

ވިންސެންޓް ވެން ގޯގެ "ޗެސްޓްނަޓް ޓްރީޒް އިން ބްލޮސަމް" ކުރެހުން 190.4 މިލިއަން ޑޮލަރަށް ވިއްކާލައި، ދުނިޔޭގެ އާ ރެކޯޑެއް ގާއިމުކޮށްފިއެވެ. މި ކުރެހުން ނީލަމުގައި ވިއްކާލާފައިވަނީ، ނާޒީންގެ ދުވަސްވަރު މަޖުބޫރުވެގެން މި ކުރެހުން ވިއްކާލަން ޖެހުނު އާއިލާއާއި މިހާރުގެ މިލްކުވެރިންގެ މެދުގައި އުފެދުނު ގާނޫނީ މައްސަލައަށް ހައްލެއް ހޯދުމަށްފަހުގައެވެ.

ރޮހިންޔާ ގަތުލުއާންމުގައި މިޔަންމާ ކުށްވެރިވެއްޖެ

މި މައްސަލައިގައި ދަ ގެމްބިއާއަށް ތާއީދުކޮށް، ރާއްޖެއިން ވަނީ ބައިނަލްއަގުވާމީ ވަކީލުންނާއެކު ކޯޓުގައި މިޔަންމާއާ ދެކޮޅަށް ވަކާލާތުކޮށް އިސް ދައުރެއް އަދާކޮށްފަ. ކޯޓުގެ ހުކުމުގައި މިޔަންމާ ކުށްވެރިކޮށް، ގެއްލުމުގެ ބަދަލު ދިނުމުގެ ޕްރޮގްރާމެއް އެކުލަވާލުމަށް ވެސް ވަނީ އަމުރުކޮށްފަ.

ޕެޓިންސަން ހަތްވަނަ ބޮންޑަށް ހޮވުމުގައި ބޭޒޯސްގެ ބޮޑު ދައުރެއް

އާ ޖޭމްސް ބޮންޑުގެ ރޯލަށް އެކްޓަރު ރޮބަޓް ޕެޓިންސަން ހަމަޖެއްސުމުގައި އެމެޒޯންގެ ޗެއާމަން ޖެފް ބޭޒޯސް މުހިންމު ދައުރެއް އަދާކޮށްފައިވާކަން އޭނާ ހާމަކުރައްވައިފިއެވެ. ޑެނިއަލް ކްރެއިގްގެ ފަހުން ހަތްވަނަ ބޮންޑުގެ ގޮތުގައި ޕެޓިންސަން ފެނިގެންދާ 26 ވަނަ ފިލްމު، ޑެނިސް ވިލެނޫވްގެ ޑައިރެކްޝަނުގެ ދަށުން 2028 ވަނަ އަހަރު ރިލީޒްކުރުމަށް ވަނީ ތާވަލުކޮށްފައެވެ.

އެންތްރޮޕިކް އުފެއްދި 7 ބާނީން ބިލިއަނަރުންގެ ލިސްޓަށް

އޯޕަން އޭއައި އިން ވަކިވި ހަތް މީހަކު 2021 ވަނަ އަހަރު އުފެއްދި އެންތްރޮޕިކް ކުންފުނި ހިއްސާގެ ބާޒާރަށް ނެރުމާއެކު، އެ ކުންފުނީގެ ބާނީން ބިލިއަނަރުންގެ ލިސްޓަށް އެރުމަށް ވަނީ ތައްޔާރުވެފައެވެ. އޭއައިގެ ރައްކާތެރިކަމަށް އިސްކަންދޭ މި ޒުވާން ޓީމުގެ ކުންފުނިން އުފެއްދި "ކްލޯޑް" އާއެކު، އެންތްރޮޕިކް މިހާރު ވަނީ ޓެކްނޮލޮޖީގެ ދާއިރާގެ ބޮޑު ބާރަކަށް ބަދަލުވެފައެވެ.

Newsletter

Get the latest news delivered straight to your inbox