ރާއްޖޭގައި ވިސާނެތި ދަހަރަކަށްވުރެ ގިނަ ދުވަހު އުޅެމުންދިޔަ އާއިލާ ފުރުވާލުމުގެ މަސައްކަތް ފަށާފައިވާ ކަމަށް އިމިގްރޭޝަނުން ބުނެފި އެވެ.
ދެމަފިރިޔަކާއި އެ މީހުންގެ ފަސް ކުދިން ތ. ވޭމަންޑޫގައި ދިރިއުޅުމެންދާ ވާހަކަ މިއަދު ތިލަވީ އެ ހަބަރު "މިހާރު" ނޫހުން ގެނެސްދިނުމުންނެވެ. މިއީ އެ މީހުން ޓޫރިސްޓު ވިސާގައި ރާއްޖެ އައިސް ދިރިއުޅެމުންދާތާ 12 ވަނަ އަހަރު ކަމަށްވެ އެވެ. ވޭމަންޑޫގެ ކުރިން ދެތިން ރަށެއްގައި ދިރިއުޅުނު ކަމަށްވެސް އެ ހަބަރުގައި ބުނެފައިވެ އެވެ.
އިމިގްރޭޝަން ކޮންޓްރޯލާ ޖެނެރަލް މުހައްމަދު ޝައްމާނު އެކްސްގައި ކުރެއްވި ޕޯސްޓެއްގައި ވިދާޅުވީ، މި މީހުންގެ ޝަކުވާއެއް ލިބުނީ ޖުލައި 18، ގައި ކަމަށެވެ. އެ މައްސަލަ ބެލުމަށްފަހު އާއިލާގެ އިސް ފަރާތް ކަަމަށްވާ ފިރިހެން މީހާ އިމިގްރޭޝަނަށް ހާޒިރުކޮށްފައިވާ ކަމަށް ވެސް ޝައްމާނު ވިދާޅުވެފައިވެ އެވެ.
އަދި، އާއިލާގެ ޕާސްޕޯޓުގެ މުއްދަތު ހަމަވެފައިވާތީ ފޮރިން މިނިސްޓްރީއާ ގުޅިގެން މިހާރު ކުރެވެމުންދަނީ ފުރުވާލުމަށް ބޭނުންވާ ޓްރެވަލް ޑޮކިއުމަންޓު ހެދުމުގެ މަސައްކަތް ކަމަށާއި ގާނޫނާ ހިލާފަށް ރާއްޖޭގައި އެއްވެސް މީހަކަށް ނޫޅެވޭނެ ކަމަށްވެސް ޝައްމާނު އެކްސްގައި ލިޔުއްވާފައިވެ އެވެ.
މި މީހުން ފްރާންސް ދޫކޮށްލީ އިސްލާމް ދީން ގަބޫލުކުރުމަށްފަހު ދިމާވި ނުތަނަވަސްކަމާއެކު ކަމަށާއި އެނބުރި ގައުމަށް ގޮސްފިނަމަ ޖަލަށް ދިޔުންފަދަ ބިރުތަކެއް ހުރި ކަމަށް އެ މީހުން ވޭމަންޑޫ މީހުން ކައިރި ބުނި ކަމަށް ނޫސްތަކުން ރިޕޯޓުކޮށްފައިވެ އެވެ.
އިންސާނީ ހައްގުތަކެއްވެސް އެކުލެވޭ މި ކަންބޮޑުވުންތައް ހުރުމާއެކު އިތުރު ތަފުސީލު ހޯދުމަށް މި ނޫހުން ޝައްމާނު އަށް ގުޅުމުން އޭނާ ވިދާޅުވީ، ފިރިހެން މީހާ ހާޒިރުކޮށް ނެގި އިންޓަވިއުގައި އެނބުރި ގައުމަށް ދިޔުމާމެދު ޝަކުވާ ކޮށްފައި ނުވާ ކަމަށެވެ. ޝައްމާނު ވިދާޅުވީ އެ މީހުން ފްރާންސް ދޫކޮށްލީ އިސްލާމް ދީން ގަބޫލުކުރުމާ ގުޅިގެން ކަމަށް ބުނެ ދެކެވޭ ވާހަތަކަކީ ދޮގެއް ކަމަށެވެ.
ނަމަވެސް, އެ އާއިލާއިން ފުރަތަމަ ބޭނުންވީ ރާއްޖޭގައި ވަޒަންވެރިވެ ތިބުމަށް ކަމަށް ޝައްމާންވެސް ފާހަގަކުރެއްވި އެވެ. އަދި، ފްރާންސަކީ އިންސާނީ ހައްގުތަކަށް އިސްކަންދީ ރެފިއުޖީންނަށް ވެސް އެހީތެރިވާ ގައުމެއް ކަމުން އެފަދަ ވާހަކަތައް ގަބޫލުކުރަން އުނދަގޫ ކަމަށް ވެސް ޝައްމާން ވިދާޅުވި އެވެ.
އޭނާ މިހެން ވިދާޅުވި ނަމަވެސް ފަހުގެ ތާރީހުގައި ފްރާންސް ވެގެންގޮސްފައިވަނީ އިސްލާމް ދީނާ ދެކޮޅު ހިޔާލުތައް މަޝްހޫރު، އަދި އިސްލާމް ދީނާއި މުސްލިމުންނާ ދެކޮޅަށް ގިނަ ހަރަކާތްތަކެއް ހިންގާފައިވާ ގައުމެއްގެ ގޮތުގަ އެވެ.
އެގޮތުން މުސްލިމުންނަށް އަމާޒުކޮށް ހަމަލާތައް ދިނުމުގެ އިތުރުން، ފުރާންސުގެ ގާނޫނު ހަދާ މަޖިލީހުން ވަނީ 2010 ގައި އެ ގައުމުގައ މޫނުބުރުގާ އެޅުންވެސް މަނާކޮށްފަ އެވެ. މިހާރު ފުރުވާލަން އުޅޭ އާއިލާގައި މޫނުބުރުގާ އެޅި އަންހެނުންތަކެއް ހިމެނެ އެވެ.
މި ހަބަރު ޝާއިއުކުރި ފަހުން ކުރެއްވި ޓްވީޓެއްގައި ޝައްމާނު ވަނީ އެ އާއިލާ ވަކި ގައުމަކަށް ފުރަން އިމިގްރޭޝަނުން ނާންގާނެ ކަމަށް ވިދާޅުވެފަ އެވެ.
"މި ފަރާތްތަކުގެ ޓްރެވެލް ޑޮކިއުމަންޓް ލިބުމުން މި ފަރާތްތައް ފުރުވާލުމުގައި އެހީތެރިކަން ފޯރުކޮށްދެވޭނެ. އަދި މި ފަރާތްތައް ވަކި ގައުމަކަށް ފުރުމަށް އިމިގްރޭޝަނަކުން ނާންގާނެ," އޭނާ އެކްސްގައި ލިޔުއްވި އެވެ.
