ފްރާންސްގެ ސަރުކާރުން ދިވެހި ރާއްޖެއަށް ކަނޑައަޅާފައި ހުރި ސަފީރު، ޖޯން-ފްރަންސުއާ ޕަކްތެތު އަވަހާރަވެއްޖެ އެވެ.
ކުދި ޖަޒީރާ ގައުމުތަކުގެ ކޮންފަރެންސަށް ވަޑައިގެން، އެންޓިގުއާ އެންޑް ބާބިއުޑާގައި މިވަގުތު ހުންނެވި ފޮރިން މިނިސްޓަރު މޫސާ ޒަމީރު ވަނީ ސަފީރު އަވަހާރަވުމާ ގުޅިގެން ތައުޒިޔާ ވިދާޅުވެ އެކްސްގައި ޕޯސްޓެއް ކުރައްވައިފަ އެވެ.
އެ ޕޯސްޓުގައި ޒަމީރު ވިދާޅުވީ ޕަކެތެތަކީ ރާއްޖޭގެ ގާތް މިތުރެއް ކަމަށާއި އޭނާގެ ހަދާންތައް އާކުރާނީ، ފްރާންސާއި ރާއްޖެއާ ދެމެދު އޮތް ގުޅުން ބަދަހިކުރަން ކުރެއްވި މަސައްކަތްތަކާއެކު ކަމަށެވެ. އަދި ޕަކެތެތުގެ އާއިލާ އަށާއި ލަންކާގައި ހުންނަ ފްރާންސުގެ އެމްބަސީއަށް ޒަމީރު ވަނީ ތައުޒިޔާ ރައްދުކުރައްވާފަ އެވެ.
ޕަކެތެތު އަކީ ފްރާންސް ސަރުކާރުން ރާއްޖޭގެ އިތުރުން ސްރީލަންކާއަށްވެސް ކަނޑައަޅާފައި ހުރި ސަފީރެވެ. އޭނާ މި އަހަރުގެ ކުރީކޮޅު ވަނީ ރާއްޖެއަށް ވަޑައިގެން ސަރުކާރުގެ އިސްވެރިންނާ ބައްދަލުކުރައްވާފަ އެވެ. ރައީސް ޑރ. މުހައްމަދު ހުވާ ކުރެއްވުމުގެ ޖަލްސާއަށްވެސް އޭނާ ވަޑައިގަތެވެ.
ސަފީރު ކަމަށް އޭނާ އައްޔަންކޮށްފައިވަނީ އޮކްޓޯބަރު 2022 ގަ އެވެ. ފްރާންސް ސަރުކާރުގެ ސަފީރުކަމުގެ ފަތްކޮޅު، ކުރީގެ ރައީސް އިބްރާހިމް މުހައްމަދު ސޯލިހަށް ޕަކެތެތު އެރުވީ ފެބްރުއަރީ 19، 2023 ގަ އެވެ. އޭނާ އަވަހާރަވީ އުމުރުން 54 އަހަރުގަ އެވެ.
ރާއްޖެއާއި ލަންކާއަށް ކަނޑައަޅާފައި ހުންނަ ސަފީރުކަމަށް އައްޔަން ކުރުމުގެ ކުރިން ޕަކެތެތު ވަނީ އެމެރިކާ އަދި ނޭޓޯގައި ހުންނަ ފްރާންސުގެ އެމްބަސީގައި މަސައްކަތް ކުރައްވާފަ އެވެ.
