ޕެރިސް، ފްރާންސް (ޖުލައި 3) - ފްރާންސްގައި މިދިޔަ ހަފުތާގައި ފުރާވަރު އުމުރުގެ ކުއްޖެއްގެ ގަޔަށް ބަޑި ޖަހައި މަރާލި ފުލުސް މީހާ އަދި އޭނާގެ އާއިލާއަށް އެހީވުމަށް ހުޅުވާލި ފަންޑަށް 1.1 މިލިއަން ޑޮލަރު ލިބިއްޖެ އެވެ.
ގޯފަންޑްމީ ވެބްސައިޓްގައި ކަނާއަތު ފިޔައިގެ މީޑިއާ ކޮމެންޓޭޓަރަކު ފެށި ފަންޑަށް ފައިސާ ދިނީ 40،000 އަށް ވުރެ ގިނަ މީހުންނެވެ.
ބަޑި ޖެހުމުން މަރުވި އުމުރުން 17 އަހަރުގެ އަލްޖީރިއާ ދަރިކޮޅުގެ ނަހެލް އެމްގެ އާއިލާއަށް އެހީވުމަށް ހަމަ އެ ވެބްސައިޓުގައި ހުޅުވާލި ފަންޑަށް މާ ބޮޑު ތަރުހީބެއް ނުލިބެ އެވެ. މިހާތަނަށް ލިބުނީ އެންމެ 200،000 ޔޫރޯ އެވެ.
އެކަމާ ގުޅޭ ގޮތުން ނޫސްތަކުން ސުވާލު ކުރުމުން ނަހެލްގެ މާމަ ބުނީ ކުޑަކުއްޖަކު މަރާލި ފުލުހަކަށް ލިބެމުންދާ ތަރުހީބު ފެނިފައި "ހިތްހަލާކުވާ" ކަމަށެވެ.
"އޭނާ އެ ހުރީ އަހަރެންގެ މާމަ ދަރިފުޅުގެ ފުރާނަ ނަގާލައިގެން. އޭނާ އެ ކުރި ކުށުގެ އަގު އޭނާ އަދާކުރަން ޖެހޭ،" އެ ކުއްޖާގެ މާމަ ބުންޏެވެ.
ފްރާންސްގެ ބައެއް ސިޔާސީ ފަރާތްތަކުން ވަނީ ފުލުސް މީހާގެ ހައްގުގައި ފަންޑެއް ހުޅުވުން ކުށްވެރިކޮށްފަ އެވެ. ފަންޑު ހުޅުވި ޖޯން މެސީހާއަކީ އިސްލާމްދީނާ ދެކޮޅު ސިޔާސީ ލީޑަރު އެރިކް ޒެމޫރްއާ ގާތް މީހެކެވެ.
ބައެއް މީހުން މެސީހާ ކުށްވެރިކޮށްފައިވާ އިރު، އިތުރު މީހުން ވަނީ އެފަދަ ފަންޑަކަށް ފުރުސަތު ދިނުމުން ގޯފަންޑްމީއަށް ވެސް ފާޑުކިޔައިފަ އެވެ.
އޭގެ އިތުރުން މީގެ ކުރިން އެފަދަ ފަންޑުތައް ހުޅުވުމުން، ސަރުކާރުން ހުއްޓުވާފައިވާ އިރު، މި ފަހަރު އަޅާ ނުލުމުން ވެސް ފާޑުކިޔުން އަމާޒުވި އެވެ.
ފުލުސް މީހާގެ ފަންޑަށް މިހާތަނަށް އެކަކު ޖަމާކުރި އެންމެ ބޮޑު އަދަދަީ 3000 ޔޫރޯ އެވެ. ފްލޯރިއަން އެމްގެ ގޮތުގައި ނޫސްތަކުން ފާހަގަކޮށްފައިވާ ފުލުސް މީހާ ހައްޔަރުކޮށް މީހަކު މެރިކަމުގެ ތުހުމަތު ވަނީ އުފުލައިފަ އެވެ.
