ފްރާންސްގައި ފުރާވަރު އުމުރުގެ ކުއްޖެއްގެ ގަޔަށް ފުލުހުން ބަޑި ޖަހައި މަރާލި މައްސަލައިގައި ހިނގަމުންދާ ހަމަނުޖެހުން ފަސް ވަނަ ދުވަހަކަށް ދިގުދެމިގެން ގޮސް، އެތައް ސަތޭކަ ބަޔަކު ހައްޔަރުކޮށްފި އެވެ.
މާސެއި ސިޓީގައި ހަމަނުޖެހުން ކޮންޓްރޯލް ކުރަން ފުލުހުން ކަރުނާ ގޭސް ބޭނުންކުރި އެވެ. އެ ސިޓީއިން ރޭ 56 މީހުން ހައްޔަރުކުރި އެވެ.
ވެރިރަށް ޕެރިހުގައި ފުލުހުން މަގުމަތި ޕެޓްރޯލް ކުރުން އިތުރުވުމާ އެކު އެ ސިޓީގައި މިހާރު މާ ބޮޑު ހަމަނުޖެހުމެއް ނެތެވެ.
އުމުރުން 17 އަހަރުގެ ނާހެލް އެމްގެ މެޔަށް ބަޑި ޖަހައި މަރާލީ ޓްރެފިކް ސްޓޮޕެއްގައި ހުއްޓަން އެންގުމުން، މަޑުނުކޮށް ދާން އުޅުމުންނެވެ. އޭނާގެ ޖަނާޒާގައި ގިނަ ބަޔަކު ބައިވެރިވި އެވެ.
އިންޓީރިއާ މިނިސްޓަރުު ގެރަލްޑް ޑަރްމަނިން ވިދާޅުވީ ހަމަނުޖެހުންތަކާ ގުޅިގެން އެކި ސިޓީތަކުން ރޭ ހައްޔަރުކުރި މީހުންގެ އަަދަދު 427 އަށް އަރާ ކަމަށެވެ.
ހަމަނުޖެހުންތައް ކޮންޓްރޯލް ކުރަން 45،000 އަށް ވުރެ ގިނައިން އިތުރު ފުލުހުން މަގުތަކަށް ނެރިފައިވެ އެވެ. ހުކުރު ދުވަހުގެ ރޭ 1،300 މީހުން ހައްޔަރުކުރި އިރު، ބުރާސްފަތި ދުވަހުގެ ރޭ 900 މީހުން ހައްޔަރުކުރި އެވެ.
