ޖަރުމަންގެ ބާލިންގައި މިހާރު ކުރިއަށްދާ ސްޕެޝަލް އޮލިމްޕިކްސް ވޯލްޑް ގޭމްސްގައި ރާއްޖޭގެ އައިޝަތު މާނިޔާ އާދަމް އާއި އައިޝަތު ލައިކާ ހުސެއިން ރަން މެޑަލް ހޯދައިފި އެވެ.
މި މަހުގެ 17 އިން ފެށިގެން 25 ޖޫންގެ ނިޔަލަށް ކުރިއަށްދާ ސްޕެޝަލް އޮލިމްޕިކްސްގައި މާނިޔާ ރަން މެޑަލް ހޯދީ ބެޑްމިންޓަން އިވެންޓުންނެވެ. އަދި ލައިކާ ރަން މެޑަލް ހޯދީ ލެވެލް ބީ - އެފް07 ޑިވިޝަނުގެ 100 މީޓަރު ދުވުމުންނެވެ.
ބެޑްމިންޓަންގެ އަންހެން ރަން މެޑަލް ހޯދި މާނިޔާ ވަނީ ކުޅުނު ފުރަތަމަ މެޗުގައި ޖޯޑަންގެ ކުޅުންތެރިޔާ އަތުން 21-10 އަދި 21-12 އިން މޮޅުވެފަ އެވެ. އޭގެ އިތުރުން މޮންގޯލިއާ ކުޅުންތެރިޔާ އަތުން 21-13 އަދި 21-15 އިން މޮޅުވި އެވެ.
ފައިނަލް މެޗު މާނިޔާ ކާމިޔާބުކުރީ ބަލްގޭރިއާގެ ތިޔަންކަ ޖޯޖީވާ އާ ވާދަކޮށް ސީދާ ދެ ސެޓުންނެވެ. މެޗުގެ ސެޓުތައް މާނިޔާ ގެންދިޔައީ 21-19 އަދި 21-10 އިންނެވެ.
ފުރަތަމަ ފަހަރަށް ސްޕެޝަލް އޮލިމްޕިކް ގޭމްސްގެ ބެޑްމިންޓަން އިވެންޓުގައި މިއަހަރު ރާއްޖެއިން ވާދަކުރާކުރަނީ މާނިޔާ އާއި މުހައްމަދު ރާއިފް ޝަރީފް އެވެ. ފިރިހެން ކުދިންގެ ބައިގެ ތިން ވަނަ ހޮވާ މެޗުގައި މިއަދު ރާއިފް ވާދަކުރާނެ އެވެ.
މިއަދު ލައިކާ ރަން މެޑަލް ހޯދީ ލެވެލް ބީ - އެފް07 ޑިވިޝަނުގެ 100 މީޓަރު ދުވުން 23.44 ސިކުންތުން ނިންމައިގެންނެވެ. ފައިނަލް ހީޓުގައި ރާއްޖޭގެ ޒާނާ އަލީ ޝަރީފްވެސް ދުވި އެވެ. ޒާނާއަށް ވަނީ 100 މީޓަރު ދުވުމުން ހަތަރު ވަނަ ހޯދާފަ އެވެ.
ސަތޭކަ މީޓަރު ދުވުުމުން ހަތަރުވަނަ ލިބުނު ނަމަވެސް ޒާނާ ވަނީ އިއްޔެ އޮތް ލެވެލް ސީ - ޑިވިޝަން އެފްއޯ3 ކެޓަގަރީގެ 200 މީޓަރު ދުވުމުން ބްރޯންޒް މެޑަލް ހޯދާފަ އެވެ.
މި ފަހަރުގެ މުބާރާތުގައި ރާއްޖެއިން މިހާތަނަށް ދެ ރަން މެޑައްޔާއި އެއް ބްރޯންޒް މެޑަލް ހޯދާފައިވާއިރު މީގެ ކުރިން 2019ގައި އޮތް ސްޕެޝަލް އޮލިމްޕިކް ވޯލްޑް ގޭމްސްގައި ވާދަކޮށް ރާއްޖެއިން ދެ މެޑަލް ހޯދި އެވެ. އެއީ ނިއުނޭޝަންގެ 100 މީޓަރ ކެޓަގަރީގެ އަންހެން ބައިން ޝިފްނާ އިބްރާހިމް ހޯދި ރަން މެޑައްޔާއި ނިއުނޭޝަންގެ 200 މީޓަރ ކެޓަގަރީގެ ފިރިހެން ބައި ވަސްމީ ވަހީދު ހޯދި ރިހި މެޑައްޔެވެ.
