ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ޓީސީ ސްޕޯޓްސް ކްލަބް އަތުން 3-0 އިން މޮޅުވެ، މާޒިޔާ ސްޕޯޓްސް އެންޑް ރެކްރިއޭޝަނުން ހަމަޖެހުމެއް ހޯދައިފި އެވެ.
އެންމެ ފަހުން ފަސް ސީޒަނުގެ ދިވެހި ޕްރިމިއާ ލީގުގެ ޗެމްޕިއަން، މާޒިޔާ އިން މިއަދުގެ މެޗަށް ނުކުތްއިރު، ލީގުގައި އެ ޓީމު އެންމެ ފަހުން ކުޅުނު ދެ މެޗުން ވެސް މޮޅެއް ނުލިބެ އެވެ. މިއީ، ފާއިތުވި ހަތް އަހަރު ތެރޭ މި ފަދަ ރެކޯޑަކާ މާޒިޔާ އިން ލީގުގައި ކުރިމަތިލި ފުރަތަމަ ފަހަރެވެ. ނިއު ރޭޑިއަންޓް ސްޕޯޓްސް ކްލަބުން ފަހު ވަގުތު ލަނޑު ޖަހައި، 3-2 އިން މާޒިޔާއާ ބަލިކުރިއިރު، ވިކްޓަރީ ސްޕޯޓްސް ކްލަބުން ފަހު ވަގުތު ލަނޑު ޖަހައި، 2-2 އިން މާޒިޔާއާ އެއްވަރުކުރި އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި މާޒިޔާ އިން ލީޑުނެގީ 34 ވަނަ މިނިޓްގަ އެވެ. މިއީ، މާޒިޔާގެ އަބްދުﷲ ލޫތު އިބްރާހިމް (ސާނޭ) އޭރިއާތެރެއަށް ނަގައިދިން ބޯޅައަކުން އިބްރާހިމް މަހުދީ (ފޭދޫ އިއްބެ) ޖެހި ގޯލެކެވެ. ފޭދޫ އިއްބެ، ފޮނުވާލި ބޯޅަ ވަނީ ގޯލުގެ މަތީ ކަނަށެވެ.
އެއް ގޯލުގެ ލީޑެއްގައި ފުރަތަމަ ހާފު ނިންމާލި މާޒިޔާ އިން ދެ ވަނަ ލަނޑު ޖެހީ 69 ވަނަ މިނިޓްގަ އެވެ. މިއީ، މާޒިޔާގެ އިބްރާހިމް އައިސަމް ނެގި ކޯނަރަކުން އެ ޓީމުގެ ސާބިއާ ޑިފެންޑަރު، ނަމަންޏާ ޑްރާވްކޮވިޗް ބޮލުން ޖެހި ގޯލެކެވެ.
މެޗުގެ 79 ވަނަ މިނިޓްގައި، މާޒިޔާ އިން ވަނީ ތިން ވަނަ ލަނޑު ޖަހައިފަ އެވެ. އޭރިއާތެރެއަށް ހުރަސްވި ބޯޅައަކުން މި ލަނޑު ޖެހީ ނައިޖީރިއާގެ ފޯވާޑް، ބެންޖަމިން ތޯމަސް ކުކޫ އެވެ. މިއީ، މާޒިޔާގެ ސާބިއާ މިޑްފީލްޑަރު، ނިކޯލާ ވުޖިޗިޗް ނެގި ހުރަހަކަށް އަރައި ކުކޫ ބޮލުން ޖެހި ގޯލެކެވެ.
ޓީސީން ވެސް މި މެޗުގައި ލިބުނު ފުރުސަތުތަކުގައި ކުރިއަށް ޖެހިގެން ކުޅެ ގޯލެއް ޖެހޭތޯ މަސައްކަތް ކުރަމުންދިޔަ ނަމަވެސް އެ ޓީމުގެ އެޓޭކްތައް މާޒިޔާ އިން ރަނގަޅަށް ޑިފެންސްކޮށްފައިވެ އެވެ.
މި މެޗުން ހޯދި ތިން ޕޮއިންޓާ އެކު، މާޒިޔާ ވަނީ ހަތަރު މެޗުން ހަތް ޕޮއިންޓް ހޯދައި، ލީގުގެ ތިން ވަނަ އަށް ޖެހިލައިފަ އެވެ. އަނެއްކޮޅުން، ޓީސީން ހަތަރު މެޗުން ލިބުނު ތިން ޕޮއިންޓާ އެކު އޮތީ ލީގުގެ ނުވަ ވަނައިގަ އެވެ.
