އިންޓަ ރިސޯޓް ވޮލީބޯލް ޗެމްޕިއަންޝިޕްގެ ޒޯން އެކެއްގައި އިއްޔެ ކުޅުނު މެޗުން ވަން އެންޑް އޮންލީ ރީތި ރަށުން ފަސޭހަކަމާ އެކު ސީދާ ތިން ސެޓުން ޖުމެއިރާ އަތުން މޮޅުވެއްޖެ އެވެ.
ރީތި ރަށު ވޮލީކޯޓުގައި އިއްޔެ ހަވީރު ކުޅުނު މެޗުން ރީތި ރަށް މޮޅުވީ 25-15، 25-23 އަދި 25-20 އިންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ރީތި ރަށަށް މި މެޗުގައި މޮޅު ކުޅުމެއް ދެއްކި ގައުމީ ޓީމުގެ ކެޕްޓަން، އަލީ ހުޒާމް (ހުޒަންޓެ) އެވެ.
ޒޯން އެކެެއްގައި ރީތި ރަށާއި ޖުމެއިރާގެ އިތުރުން ދެން ވާދަކުރަނީ އެންމެ ފަހުގެ ޗެމްޕިއަން، ބަނޑޮސް މޯލްޑިވްސް އާއި ފޯ ސީޒަން އެވެ. މިއަދު ހަވީރު ބަނޑޮސް އާއި ފޯ ސީޒަން ބައްދަލުކުރާ މެޗު އޮންނާނެ އެވެ. އެ މެޗު ކުޅޭނީ ބަނޑޮސް ވޮލީ ކޯޓުގަ އެވެ.
ޕޮއިންޓެއް ހޯދުމަށް ފަހު ރީތި ރަށުގެ ކުޅުންތެރިން އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
ރިސޯޓް ވޮލީބޯޅަ މުބާރާތުގައި ދެން އެންމެ އަވަހަށް ފަށަން ތާވަލުކޮށްފައިވަނީ ޒޯން ފަހެއް އަދި ހައެކެވެ. އެ ގޮތުން މި ޒޯނުގައި ވާދަކުރަނީ ސޮނޭވާފުށި، ވައްކަރު، ކޮރަކޮރާ އަދި އަނަންތަރާ އެވެ. މި ޒޯނުގެ މެޗުތައް ފަށަން ނިންމާފައިވަނީ މި މަހު 13 ވަނަ ދުވަހު ސޮނޭވާފުށީގަ އެވެ.
ރާއްޖޭގައި ބޭއްވޭ އެންމެ ފޯރިގަދަ އެއް ވޮލީބޯޅަ މުބާރާތް އިންޓަ ރިސޯޓް ވޮލީބޯޅަ މުބާރާތް މިދިޔަ ފަހަރު ކުރިއަށްގެންދިޔައީ ޓޫރިޒަމް މިނިސްޓްރީއާ ގުޅިގެންނެވެ.
އެ ގޮތުން، މުބާރާތުގެ ޓައިޓަލް ސްޕޮންސަރެއްގެ ނަމުގެ ގޮތުގައި މިދިޔަ އަހަރު ރާއްޖޭގެ ޓޫރިޒަމަށް 50 އަހަރު ފުރުން ފާހަގަކުރުމުގެ ގޮތުން "ގޯލްޑަން އިޔާ"ގެ ނަމުން މުބާރާތަށް ނަން ދެވުނެވެ. މުބާރާތުގެ ޒޯން އެކެއްގެ ޗެމްޕިއަންކަން ޖެހިޖެހިގެން ތިން ވަނަ ފަހަރަށް ހޯދި ބަނޑޮހެވެ.
