މިހާރު ކުރިއަށްދާ ހޭންޑްބޯލް މޯލްޑިވްސް ޗެމްޕިއަންޝިޕްގެ އަންހެން ބައިގެ ފައިނަލުން ރެޑްހޯކްސް ސްޕޯޓްސް ކުލަބާއި ކީންސް ސްޕޯޓްސް ކުލަބު ޖާގަ ހޯދައިފި އެވެ.
ޖުމްލަ އެކު، 27 ޓީމައިއެކު މިދިޔަ މަހުގެ 20 ވަނަ ދުވަހު ފެށި މުބާރާތުގެ އަންހެން ބައިގެ ފައިނަލުން ރެޑްހޯކްސް ޖާގަ ހޯދީ މިދިޔަ އަހަރުގެ ޗެމްޕިއަން އޮރިކްސް ހޭންޑްބޯޅަ ކުލަބު ބަލިކޮށްގެންނެވެ. ކީންސް ފައިނަލުން ޖާގަ ހޯދީ ތުޅާދޫ ޔަންގް އީގަަލްސް ސްޕޯޓްސް ބަލިކޮށްގެންނެވެ.
އަންހެން ބައިގެ ދެ ސެމީ ފައިނަލު މެޗުވެސް ފެނުނީ ވަރަށް ފޯރިގަދަކޮށެވެ. ފުރަތަމަ ފައިނަލުގައި އޮރިކްސް އަތުން ރެޑްހޯކްސް ކުރި ހޯދީ 22-20 އިންނެވެ. މެޗު ފަށައިގެން ހަމަހަމަކޮށް ފެނުނުއިރު އޮރިކްސް އިން ތިން ފަހަރަކަށް ދެ ގޯލުގެ ލީޑެއްވެސް ނެގި އެވެ. ނަމަވެސް ދެވަނަ ހާފުގައި ރެޑްހޯކްސް ޑިފެންސް ވަރުގަދަކޮށް ނަތީޖާ އަނބުރާލި އެވެ. މެޗުގެ އެންމެ ދޮޅު މިނެޓާ ހަމައަށް އެއްވަރުވެފައި އޮއްވާ ރެޑްހޯކްސް އިން ދެ ގޯލުގެ ލީޑެއް ނަގައި އެ ލީޑު ހިފެހެއްޓި އެވެ.
މިއީ މިދިޔަ ދެ އަހަރުވެސް ގައުމީ މުބާރާތުގެ ތަށި ހޯދި އޮރިކްސް އުފެދުނީސުރެ ސީނިއާ މުބާރާތެއްގެ ފައިނަލުން ފުރުސަތު ނުލިބުނު ފުރަތަމަ ފަހަރެވެ.
އަންހެން ބައިގެ ފައިނަލުން ކީންސް ޖާގަ ހޯދީވެސް ވާދަވެރި އަދި ފޯރިގަދަ ސެމީ ފައިނަލަކަށްފަހުގަ އެވެ. މުބާރާތުގައި ރަނގަޅު ކުޅުމެއް ދައްކަމުން އައި ތުޅާދޫ ޓީމް އަތުން ކީންސް މޮޅުވީ 31-30 އިންނެވެ. މި މެޗުވެސް ހަމަހަމަކޮށް ގޮސް ނަތީޖާ ކަނޑައެޅުނީ މެޗު ނިމެން 30 ސިކުންތު އިންދައި ކީންސް އިން ޖެހި ގޯލުންނެވެ.
އެއް މެނޭޖްމަންޓެއްގެ ދަށުން މަސައްކަތްކުރަމުން އަންނަ ކީންސް އާއި ރެޑްހޯކްސް ވާދަކުރާ ފައިނަލް މެޗު ކުޅޭނީ މަދާމާ ރޭގަނޑު އެވެ.
ހޭންޑްބޯލް މޯލްޑިވްސް ޗެމްޕިއަންޝިޕްގެ ފިރިހެން ބައިގެ ފައިނަލްވެސް މާދަމާރޭ ކުޅޭނެ އެވެ. ފައިނަލުގައި ވާދަކުރާނީ ދިވެހި ސިފައިންގެ ކުލަބާއި ކުލަބު ޒެފްރޯލް އެވެ.
