ރައްޔިތުންނަށް އަސާސީ ހިދުމަތްތައް ފޯރުކޮށްދިނުމުގައި ވަކި ރަށަކަށް، ވަކި ފިކުރަކަށް ނުބަލާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އާބާދީގައި 400 އެއްހާ މީހުން ދިރިއުޅޭ ފ. ދަރަނބޫދޫގެ ބަނދަރު ރަސްމީކޮށް ހުޅުވައިދެއްވުމަށްފަހު ވާހަކަ ދައްކަވަމުން ރައީސް ވިދާޅުވީ މީގެ ކުރިން އައި ސަރުކާރުތަކުން ކަންކަން ކޮށްދެމުން އައީ ސިޔާސީ މަންފާތަކަށް ވިސްނައިގެން ކަމަށެވެ.
އެގޮތުން އާބާދީ ކުޑަ ރަށަކަށް ހިދުމަތްތައް ފޯރުކޮށްދެނީ އެ ރަށަކަށް ނިސްބަތްވާ ސަރުުކާރު ހިންގާ ޕާޓީގެ މަޖިލިސް މެމްބަރެއް ނުވަތަ މިނިސްޓަރެއް ނުވަތަ ކައުންސިލަށް ޕާޓީގެ މެޖޯރިޓީ އޮތުމުން ކަމަށް ރައީސް ވިދާޅުވި އެވެ.
"ދަރަނބޫދޫއަކީ އާބާދީ ކުޑަ ރަށެއް، އެހެންނަމަވެސް އެ ސަބަބުތަކަށް ޓަކައި ހުރެ ކުރީގެ ސަރުކާރުތަކުގެ ސިޔާސަތަކީ ކުދިކޮށް ހުރި ރަށްތަކަކީ މީހުން ދިރިއުޅުނަސް އަސާސީ ހިދުމަތްތައް ފޯރުކޯށްދޭން ނުޖެހޭ ކަމަށް،" ރައީސް ވިދާޅުވި އެވެ.
ރައީސް ވިދާޅުވީ ސަރުކާރެއް ހޮވަނީ އެއްވެސް ތަފާތު ކުރުމެއް ނެތި ބޭނުންވާ ކަންކަން ހުރިހާ ރަށަކަށް ކޮށްދިނުމަށް ކަމަށެވެ.
"ދިރިއުޅޭ ރަށެއް ފިކުރު ހުރި ގޮތެއް ބެލުމެއް ނެތި ރައްޔިތުންނަށް ބޭނުންވާ އަސާސީ ހިދުމަތްތައް ފޯރުކޮށްދިނުމަށް،" ރައީސް ވިދާޅުވި އެވެ. "އަސާސީ ހިދުމަތްތައް ފޯރުކޮށްދިނުން ތަފާތެއް ނެތި ދަނީ ކުރިއަށް."
ދަރަނބޫދޫ ބަނދަރު ރަސްމީކޮށް ހުޅުވައިދިނުން
ބަނދަރު ހުޅުވައިދެއްވުމަށް ފަހު ދެއްކެވި ވާހަކަފުޅުގައި ރައީސް ވަނީ ހަތަރު އަހަރު ކުރިން، ރިޔާސީ އިންތިހާބުގެ ކެމްޕެއިނަށް މި ރަށަށް ކުރެއްވި ދަތުރުގެ ހަނދާން އާ ކުރައްވައިފަ އެވެ.
"އެއީ ވިއްސާރަ ދުވަހެއް، ވަރަށް ކަނޑުގަދަ ދުވަހެއް، މި ރަށަށް ވަންނަން ބޭރުގައި ބައިގަޑިއިރެއްހާއިރު މަޑުކުރަން ޖެހުނު، އެއީ ގަދަ ވެގެން ނުވަދެވިގެން،" އެ ދުވަހުގެ ހަނދާން އާ ކުރައްވައި ރައީސް ވިދާޅުވި އެވެ.
މި ރަށުގެ ބަނދަރުގެ އަމަލީ މަސައްކަތް ފަށާފައިވަނީ މީގެ ތިން އަހަރު ކުރިން މި ދުވަހު އެވެ. ރައީސް ވިދާޅުވީ މަސައްކަތް ލަސްވީ ކޮވިޑުގެ ސަބަބުން ކުރިމަތިވި ބައެއް ގޮންޖެހުންތަކުގެ ސަބަބުން ކަމަށެވެ.
ރައީސް ވަނީ ކުރިއަށް އޮތީ ރިޔާސީ އިންތިހާބުކަން ފާހަގަކުރައްވައި "ތަފާތު ކުރުމެއްނެތި" ދެން ވެސް މި ރަށަށް ވާ ވައުދު ފުއްދައިދެއްވާނެ ކަމަށް ވިދާޅުވެފަ އެވެ.
ދަރަނބޫދޫގައި ކުރިން ބޭނުން ކުރަމުން އައީ 2007 ވަނަ އަހަރު ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ގާއިމް ކުރި ބަނދަރެކެވެ.
ބަނދަރު އަޕްގްރޭޑް ކުރުމުގެ މަޝްރޫއުގެ ދަށުން 46,600 ކިއުބިކް މީޓަރުގެ ސަރަހައްދެއްގެ ބަނދަރު ފުންކޮށް، 253 މީޓަރުގެ އެއްގަމުތޮށި ލައި، 410 މީޓަރުގެ ބޭރުތޮށި ލައި، 64 މީޓަރުގެ ސަރަހައްދެއްގައި ރިވެޓްމެންޓް ވަނީ ޖަހައިފަ އެވެ.
