އަންނަ މަހު އިންޑިއާގެ ބެންގަލޫރުގައި ފަށާ ސާފް ޗެމްޕިއަންޝިޕަށް ތައްޔާރުވުމުގެ ގޮތުން ކެމްބޯޑިއާއާ އެކު އެކުވެރިކަމުގެ މެޗެއް ކުޅެން ބަންގްލަދޭޝް އިން ނިންމައިފި އެވެ.
އަންނަ މަހު ސާފް ޗެމްޕިއަންޝިޕް އޮންނާނީ ޖޫން 21 އިން ޖުލައި ހަތަރަކަށެވެ. މި ފަހަރުވެ މުބާރާތުގައި ސާކްގެ ހަ ގައުމަކުންނާއި ސާކުން ބޭރު ދެ ގައުމަކުން ވާދަކުރެ އެވެ. ގްރޫޕް އޭގައި ހިމެނެނީ ކުވެއިތު، އިންޑިއާ، ނޭޕާލް އަދި ޕާކިސްތާނެވެ. ގްރޫޕް ދޭއްގައި ހިމެނެނީ ރާއްޖެ، ލެބަނަން، ބޫޓާން އަދި ބަންގްލަދޭޝް އެވެ.
މުބާރާތަށް ގިނަ ޓީމަތަކުން ތަައްޔާރީތައް ފަށާފައިވާއިރު އެކި ގައުމުތަކުން އަންނަނީ ގައުމުން ބޭރުގައި ތަމްރީން ކޭމްޕްތައް ކުރުމަށްވެސް ތައްޔާރު ވަމުންނެވެ.
ދާދި ފަހުން ބަންގްލަދޭޝް ފުޓްބޯޅަ ފެޑެރޭޝަނުން ވަނީ އެގައުމުގެ ތައްޔާރީތައް ކުރިއަށްގެންދާނެ ގޮތުގެ ތަފްސީލްތައް ހާމަކޮށްފަ އެވެ. އެ ގޮތުން އެގައުމުން ތަމްރީންތައް ރަސްމީކޮށް ފެށުމަށް ހަމަޖެހިފައިވަނީ ޖޫން މަހުގެ ކުރީކޮޅުގަ އެވެ. ސަބަބަކީ މިވަގުތު އެގައުމުގެ ލީގުގެ މެޗުތައް ކުރިއަށްދިޔުމެވެ.
ބަންގްލަދޭޝްގެ ގައުމީ ފުޓްބޯޅަ ޓީމުން ސާފް ޗެމްޕިއަންޝިޕަށް ޕްރެކްޓިސް ފަށާނީ ޖޫން ހަތަރެއްގަ އެވެ. އޭގެ ފަހުން ޖޫން 10 ގައި އެޓީމް ކެމްބޯޑިއާ އަށް ފުރާނެ އެވެ. އެ ގައުމުގައި ތަމްރީންތައް ކޮށް ޖޫން 15 ގައި ކެމްބޯޑިއާއާ ދެކޮޅަށް އެކުވެރިކަމުގެ މެޗެއް ކުޅޭނެ އެވެ. ބަންގްލަދޭޝް ޓީމު އިންޑިއާއަށް ދިޔުމަށް ހަމަޖެހިފައިވަނީ ޖޫން 16 ގަ އެވެ.
ސާފް ޗެމްޕިއަންޝިޕްގައި ޓީމްގެ ކުޅުން ރަނގަޅު ކުރުމަށް އެގައުމުގެ ފުޓްބޯޅަ އިދާރާއިން ވަނީ ސްޕެއިން ކޯޗު ހާވިއޭ ކަބްރޭރާގެ އެހީތެރިންގެ ގޮތުގައި ސްޕެއިންގެ ކޯޗެއްވެސް ގެންނަން ނިންމައިފަ އެވެ. ގޯލްކީޕަރު ޓްރެއިނަރާއި ޓީމްގެ ފިޒިއޯއަކަށް ވެސް ސްޕެއިންގެ އާ ދެ ކޯޗުން މިހާރުވަނީ ހަމަޖައްސައިފަ އެވެ.
ސާފް ޗެމްޕިއަންޝިޕަށް ތައްޔާރުވުމަށް ޓީމްތަކުން މިހާރު ކުރަން ނިންމާފައިހުރި ކަންކަމަށް ބަލާއިރު ނޭޕާލުން އަންނަ މަހު ކޭމްޕްކުރުމަށް ހަމަޖެހިފައިވަނީ ފިލިޕީންސްގަ އެވެ. އިންޑިއާ އިން އެގަ އުމުގައި އެކުވެރިކަމުގެ ފުޓްބޯޅަ މުބާރާތެއް ކުޅޭއިރު، ޕާކިސްތާނުން ވެސް މޮރީޝަސްގައި އޮންނަ ފޯ ނޭޝަންސް ކަޕެއްގައި ވާދަކުރާނެ އެވެ.
ރާއްޖޭގެ ގައުމީ ޓީމުން ޕްރެކްޓިސްތައް މި ދިޔަ އާދިއްތަ ދުވަހު ފެށިއިރު ގައުމީ ޓީމު އިތުރު ތަމްރީންތަކަށް އަންނަ މަހުގެ ފަސް ވަނަ ދުވަހު ޖަޕާނަށް ފުރާނެ އެވެ. ސާފް ޗެމްޕިއަންޝިޕަށް ރާއްޖޭގެ ޓީމުން އިންޑިއާއަށް ދާނީ ޖަޕާނުގެ ތަމްރީން ކޭމްޕް ނިންމައިފަ އެވެ.
