އުމުރުން 11 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ދިވެހި ދެ ފިރިހެނުން ހައްޔަރުކޮށްފި އެވެ.
ފުލުހުން މިރޭ ބުނި ގޮތުގައި އެންމެ ދެކުނުގެ ހަތަރު އަތޮޅުގެ ތެރެއިން އަތޮޅެއްގެ ރަށެއްގައި ކުރި ޖިންސީ ގޯނާގެ މި މައްސަލަ ޕޮލިހަށް ހުށަހަޅާފައި ވަނީ ރޭ (ހޮނިހިރު ދުވަހުގެ ރޭ) ގައި ކަމަށެވެ.
އެ މައްސަލައިގެ ތުހުމަތުގައި ކޯޓު އަމުރެއްގެ ދަށުން ފުރަތަމަ ހައްޔަރު ކުރީ 63 އަހަރުގެ މީހެކެވެ. އެއަށް ފަހު 25 އަހަރުގެ މީހަކު ހައްޔަރު ކުރި އެވެ.
މި މައްސަލަ ތަހުގީގު ކުރަމުން އަންނާތީ ފުލުހުން އިތުރު ތަފުސީލެއް ނުދެ އެވެ.
ފުލުހުންގެ ވެބްސައިޓުގައި ހިމެނޭ ތަފާސްހިސާބުން ދައްކާ ގޮތުގައި ޖީންސީ ކުށުގެ 71 މައްސަލައެއް މި އަހަރު ރިޕޯޓުކޮށްފައިވެ އެވެ. އޭގެ ތެރޭގައި ދެކުނުގެ ހަތަރު އަތޮޅުގެ ތެރެއިން އައްޑޫން ހަތަރު މައްސަލަ، ފުވައްމުލަކުން ދެ މައްސަލަ، ގދ. އަތޮޅުން ދެ މައްސަލަ، އަދި ގއ. އަތޮޅުން ހުށަހަޅާފައިވާ ދެ މައްސަލަ ހިމެނެ އެވެ.
ކުޑަކުއްޖަކާއެކު ޖިންސީ އަމަލެއް ހިންގުން ހިންގުމުގެ ކުށް ސާބިތުވެއްޖެ މީހެއްގެ އަދަބަކީ 10 އަހަރާއި 14 އަހަރާ ދެމެދުގެ މުއްދަތަކަށް ޖަލަށްލުމެވެ.
