ޕެރިސް، ފްރާންސް (އެޕްރީލް 21) - މީގެ 43 އަހަރު ކުރިން ފްރާންސްގެ ވެރިރަށް ޕެރިހުގައި ޔަހޫދީންގެ ފައްޅިއަކަށް ހަމަލާދިން ކަމަށް ސާބިތުވެ ކެނެޑާ އާއި ލުބްނާނަށް ނިސްބަތްވާ ސޯސިއޮލޮޖީ ޕްރޮފެސަރަކު ފްރާންސްގައި އުމުރަށް ޖަލަށް ހުކުމްކޮށްފި އެވެ.
މިހާރު އުމުރުން 69 އަހަރުގެ ހަސަން ދިއާބްގެ މައްޗަށް ހުކުމް އިއްވީ ގައިރު ހާޒިރުގަ އެވެ. އޭނާގެ މައްޗަށް ސާބިތުވީ 1980 ވަނަ އަހަރު ބޮމެއް ގޮއްވާލި ކަމަށެވެ. އެ ހަމަލާގައި ހަތަރު މީހުން މަރުވެ 46 މީހުންނަށް އަނިޔާވި އެވެ.
ދިއާބްއާ ދެކޮޅަށް ހިންގި ތިން ހަފުތާގެ ޝަރީއަތަށް ފަހު ހުކުމް އިއްވުމުން, މަރުވި މީހުންގެ އާއިލާތަކުން ހިތްހަމަޖެހުން ފާޅުކުރި އެވެ. ޕްރޮސެކިއުޓަރުން ބުނީ ހަމަލާގެ ތުހުމަތު ކުރެވެނީ ހަމައެކަނި ދިއާބްއަށް ކަމަށާއި އެއީ އޭނާ ހިންގި އަމަލެއް ކަމާ މެދު އެއްވެސް ޝައްކެއް ނެތް ކަމަށެވެ.
އެ ހަމަލާގެ ޒިންމާ އެއްވެސް ގްރޫޕަކުން އުފުލާފައެއް ނުވެ އެވެ. އެކަމަކު ފުލުހުން ތުހުމަތު ކުރީ ޕޮޕިޔުލާ ފްރަންޓް ފޯ ދަ ލިބެރޭޝަން އޮފް ޕެލެސްތީންއާ ގުޅުން ހުރި ގްރޫޕަކަށެވެ. ފްރާންސްގެ ޖާސޫސީ އޭޖެންޓުން ދިއާބްއަށް ތުހުމަތު ކުރީ 1999 ވަނަ އަހަރު އެވެ.
އޭޖެންޓުން ތުހުމަތު ކުރީ ހަމަލާގައި ބޭނުންކުރި 22 ކިލޯގެ ބޮން އުފެއްދީ އޭނާ ކަމަށެވެ. ހެކީގެ ގޮތުގައި އޭޖެންޓުން ހުށަހެޅީ ތުހުމަތު ކުރެވޭ މީހެއްގެ ސްކެޗް ކުރެހުމަކާއި އަތުލިޔުމުގެ އެނެލިސިސް އެވެ. އެ ހެކީގެ އަލީގައި ހަމަލާގައި ބޭނުންކުރި ސައިކަލެއްގެ ވެރިޔަކީ ދިއާބް ކަމަށް ތުހުމަތު ކުރި އެވެ.
އޭގެ އިތުރުން 1981 ވަނަ އަހަރު ރޯމްގައި ހިފެހެއްޓި ދިއާބްގެ ޕާސްޕޯޓެއް ވެސް ހެކީގެ ގޮތުގައި ހުށަހެޅި އެވެ. އެ ޕާސްޕޯޓުގައި ހުރީ ސްޕެއިންއަށް އެތެރެވެ އަދި ބޭރުވި ކަމުގެ ސްޓޭމްޕްތަކެވެ. އޭޖެންޓުން ގަބޫލުކުރި ގޮތުގައި ހަމަލާ ރޭވީ ސްޕެއިންގަ އެވެ.
ހަސަން ދިއާބް.-- ފޮޓޯ: އޭއެފްޕީ
ދިއާބްއަކީ މިހާރު ކެނެޑާގައި ދިރިއުޅޭ ޕްރޮފެސަރެކެވެ. ފްރާންސްގެ އެދުމަށް ކެނެޑާއިން 2014 ވަނަ އަހަރު އޭނާ ހިފަހައްޓައި، ފްރާންސަށް ފޮނުވި އެވެ. އެހެން ނަމަވެސް ތަހުގީގީ ޓީމުތަކަށް އޭނާގެ މައްޗަށް ކުށް ސާބިތު ކުރެވޭ ގޮތެއް ނުވި އެވެ.
އެހެންވެ، ބަންދުން ދޫކޮށްލުމާ އެކު އޭނާ ފްރާންސް ދޫކޮށް އަލުން ކެނެޑާއަށް ދިޔައީ 2018 ގަ އެވެ. އޭގެ ފަހުން އަލުން ޝަރީއަތް ހިންގަން ޖެހޭނެ ކަމަށް ފްރާންސްގެ ކޯޓަކުން ނިންމީ 2021 ގަ އެވެ. އާ ޝަރީއަތުގައި ހުށަހެޅި ގިނަ ހެކި ބިނާވެފައި އޮތީ ޖާސޫސީ މަސްދަރުތަކަށެވެ.
ދިއާބް ބުނެފައި ވަނީ ހަމަލާ ދިން ވަގުތު އޭނާ ހުރީ ލުބްނާންގައި އިމްތިހާނެއްގައި ބައިވެރިވުމަށް ކަމަށެވެ. އޭނާގެ ކުރީގެ ލޯބިވެރިޔާ އާއި ކުރީގެ ދަރިވަރުން ވަނީ އެއީ ތެދެއް ކަމަށް ހެކިބަސް ދީފަ އެވެ.
އެހެން ނަމަވެސް، ކުށް ސާބިތުވާ ކަމަށް އަލުން ނިންމުމާ އެކު ދިއާބް ހައްޔަރު ކުރުމުގެ އަމުރެއް ނެރޭނެ ކަމަށް ބެލެވެ އެވެ. އަދި އޭނާ ފްރާންސަށް ފޮނުވުމަށް އެ ގައުމުގެ ސަރުކާރުން ކެނެޑާއަށް ޕްރެޝަރު ކުރާނެ ކަމަށް ބެލެވެ އެވެ.
ފްރާންސްގައި ދިއާބްއާ ދެކޮޅަށް ޝަރީއަތް ހިންގި ނަމަވެސް، ގިނަ ބައިނަލްއަގްވާމީ ޖަމިއްޔާތަކުން ވަނީ ފްރާންސްގެ އިދާރާތަކަށް ފާޑުކިޔައިފަ އެވެ. އެގޮތުން އެމްނެސްޓީ އިންޓަނޭޝަނަލްއިން ވެސް ބުނީ ހަމަލާގެ ވަގުތު އޭނާ ހުރީ ލުބްނާންގައި ކަމަށް ބުނާ ވާހަކައިގެ ބުރަދަން އެބަ އޮތް ކަމަށެވެ.
